مصريين، يوناني (في فترة الأزمة الاقتصادية)، إيرلندي، وباكستاني! دي حصيلتي في عالم التعارف والعلاقات، والحب، هم لسه قليلين أنا عارفه، ربنا يكرم ونقفل باقي الجنسيات، بس التنوع ده خلاني أبصم بالعشرة إن الراجل هو الراجل مهما اختلف الديكور. ومشاكل الست مع الراجل متشابهة جدا مهما بان مختلف، ومش بتخرج غالبا عن كونه بيحب شعور الاستحواذ وبيغير أو إن رغباته وأهدافه من العلاقة مختلفة عن أهدافك ورغباتك، أو بيمل بسرعه ومحتاج لتطبيق نظرية الشد والجذب طول الوقت وده اللي هنتكلم عنه في المقال، وخلي بالك في فرق بين إن الراجل يطفش خالص، وإنه يفضل معاكي وخلاص، وإنه يبقي معاكي وملهوف عليكي. - حضري ورقة وقلم من أول يوم في العلاقة واقسميها نصين بالطول، نص للعيوب والحاجات اللي بتضايقك منه، ونص للمميزات والحاجات الحلوة اللي بيعملهالك، عشان لو نص العيوب والأذية بقي أكتر بكتير تقدري تسيبيه وتنسيه بسهوله أكتر مما تبقي مشتتة ومش عارفه تنسي، ده هيخليكي متماسكة أكتر لو حصل انفصال أو العلاقة باظت، وفي نفس الوقت النص الحلو من الورقة تقدري تستخدميه في المناسبات وعيد ميلاده مثلا، لو كتبتيه في كارت، هينبسط إنك فاكراله كل التفاصيل الحلوة.
- الرجالة مهما كانوا أذكيا جدا في حياتهم العملية، أغلبهم مش عارفين هما عايزين ايه بالضبط من العلاقة، (هما عارفين عايزين ايه من الأنثى بس مش عارفين عايزين ايه من العلاقة) يعني في أغلب الوقت مبيبقاش محدد العلاقة ممكن تنتهي على ايه، اللي بيعمل صايع وبيقول أنا مش بتاع جواز بيطب وبيتجوز عادي واللي عامل جد بيطلع صايع، ملهمش كتالوج، بس دي ممكن نعتبرها ميزه مش عيب، لو انتي ذكيه ممكن تستغلي النقطة دي لصالحك، وبذكائك توجهي المركب للشط اللي يناسبك. - لازم تعرفي هو بيدور على ايه بنفسك، وتخليه يلاقي اللي بيدور عليه فيكي، ومتعتمديش على ردوده وبس لأنه ممكن يقولك إنه مبيحبش غير البنت الرفيعة أو الشقرا أو اللي بتحب الكورة وتلاقيه وقع في حب واحده مختلفة تماما عن كده
- خليكي واضحه معاه من الأول، اديله إشارة بنوع العلاقة اللي بتفضليها فعلا، متقوليش حاجه مش شبهك لمجرد إنها تبان روشة، لو شايفة صاحبتك شكلها شيك وهي بتقول " إنها مش عايزه تتجوز" وانتي من جواكي عايزه تتجوزي في الفترة الحالية، يبقي متقلديهاش، رغباتنا وأهدافنا في الحياة مفيهاش شيك ومدهول ولا موضة وقديم، والأحلام الصغيرة والعادية مش عيب، المهم تكوني واضحه ومحدده في نوع العلاقة اللي عايزاه لأن الرجالة مش هيفضلوا يفتشوا وراكي عن المعني اللي بين السطور، ساعات في بنات بتبقي بتقول إنها مش عايزه تتجوز خالص بس هي قصدها إنها خايفه أو محتاجه قدر أكبر من الاهتمام عشان تغير رأيها وتطمن، لكن هو مش هيفهم غير الجملة اللي سمعها ودي مش غلطته، لو سألك خليكي واضحه لو الموضوع اتفتح، بس في نفس الوقت بلاش تنطي المراحل، وتبقي بتختاري لون الأوضة واسم العيال في مراحل التعارف والاستكشاف الأولي، نهدي كده. نهدي وبلاش جو عريس ياماي، لازم تشبعي جانب المغامرة عنده، الراجل بيحب يحس إنه صياد وتعب عشان يوصل بذكائه مش بفرضك العلاقة عليه.
- حاولي تشوفي الطفل اللي جواه وتتعاملي معاه، ساعتها هتقدري تفهميه ببساطه أكتر ومع الوقت لما العلاقة تتطور هتقدري تسامحيه وتحتويه، وساعتها مش هيقدر يستغني عنك، لأنك هتبقي حاجة صعب تتكرر تاني في حياته.
- ثقي في نفسك، وفي مستوي جمالك، متتغريش بس ثقي في نفسك، انتي نسخه واحده بس، كل ست في العالم في منها نسخه واحده بس متفردة، متخليش حد يهز ثقتك أو يحسسك إنه متفضل عليكي، وأنا بكتب المقال كتبت بوست عالفيس بوك إني بجهز مقال عن الموضوع ده، فقام واحد معلق بصورة لبنات أجانب وكتب تحتها، إن سبب فشل البنات المصرية في العلاقات هو إنهم غفر وإن ده الفرق بينهم وبين فلاحات روسيا اللي في الصورة مكدبتش خبر دخلت علي بروفايله لقيته دكتور جامعه، استغربت جدا إن ده تفكيره، بس رديت عليه بنفس الفكر، وخدت صورة بروفايله بالبدلة الزيتي والكرافته الصفرا والقميص اللبني وحطيتهاله في الرد علي التعليق بتاعه وقولتله إنه لو هيحكم علي الناس بالشكل فهيحكموا عليه بنفس الطريقة، وفي الحالة دي النتيجة مش هتبقي لصالحه أبدا.
- لو انتي بتحطي ميكب كتير، وقالك بحب البنت اللي مش بتحط ميكب، فده مش معناه إنك تفاجئيه تاني يوم بغسل وشك تماما ويلاقي هالات سودا وحبوب، هو ميقصدش إنه عايز يشوف كده، هو يقصد إنه عايز أقرب شكل للطبيعي وأقل عدد ألوان في وشك، يعني ممكن تقللي الميكب تدريجيا، لغاية ما توصلي لكحل وروج أو كحل بس، لكن بلاش لوك المرض أرجوكي، في الواقع خليه ميحسش إنك حاطه ميكب لكن متتخليش عنه كله مرة واحده.
- البسي حلو طبعا وخليكي شيك ومنظمة، بس بلاش تجمعي كل الحاجات الغالية اللي عندك في طقم واحد وتبقي كأنك بتعرضيها، بلاش تبقي شوية ماركات فوق بعض، كده ممكن يقلق منك، ويحس إنه مش قدك أو مش من مستواكي ويخلع، في نفس الوقت اللي ممكن الحقيقه تكون إنك من مستواه أو أقل بس انتي صدرتيله المعلومة الغلط، وحسستيه إن وجودك في حياته هيبقي عبئ مادي ونفسي أو إنه أقل منك.
- يفضل تلبسي كعب عالي (لو هنتكلم عليه صحيا ومن منطلق دفاعي بقي والجو ده هنقضيها فلات) بس الحق يتقال هو فعلا حلو ومؤثر. صدقيني مؤثر، بس بلاش غشم وبلاش كعب في دريم بارك أرجوكي.
- بلاش جمل " دلوعة بابي" زي أنا بحب السوشي أوي، النهارده اليوم كان صعب موت عشان ضوافري اتقصفت، أنا مبشربش غير المية المعدنية أم سبعة جنيه، الشغالة بوظتلي ترتيب دباديبي، كده يا هيشوفك تافهة يا مصطنعة، يا فشارة، يا دلوعة لدرجة لا تصلحي لعلاقة جد أو مستقبلية.
- مش معلومة مهمة بالنسباله أبدا إنه يعرف إن انتي ونيللي كريم بتروحوا لنفس الكوافير، الرسالة اللي هتوصله من معلومة زي دي هي يا إنك فشارة يا عندك عقدة نقص يا بتحبي المنظرة، يا عايزة تفهميه إنك بتدفعي نص مرتبه في السيشوار وده غالبا هيبعده مش هيقربه.
- أنا بعمل دايت، بعمل دايت، أوه مش هعرف آكل معاك عشان الدايت، أنا مش عارف ايه عشان الدايت، أوعي، كده هيعرف إنك تافهة، واحنا مش عايزين نقوله دلوقتي، خلينا مخبيين عليه شوية أرجوكي، أو متتكلميش كده لو ده مش حقيقة نظام حياتك أصلا، وبتقوليه لمجرد المنظرة، بلاش يشوفك مهتمة بحاجه واحده بس وكأن حياتك فارغة، أو يشوفك عاملة مناحة عشان مقاس البنطلون زاد نمرة، هيجيله جلطه كده يموت فيها ويضيع الشاب من أيدينا، وبعد ما يموت هتدخلي اوضته تلاقيه معلق صور بنات كيرفي عالحيطة وانتي من جواكي أصلا كنتي بتسفي محشي من وراه، وهتندمي إنك مكنتيش نفسك.
- موضوع الأكل ده حقيقي معقد، الست اللي تلاقي راجل تقدر تاكل قدامة فاكهة كبيرة أو سندوتش طبقات من غير ما تتكسف محظوظة، بس لازم نتأقلم مع حقيقة إن مش كل الناس محظوظة، فبلاش ياخدك العشم زيادة عن اللزوم في الأكل على طبيعتك معاه خصوصا في مرات مقابلتكم الأولي، وكمان بلاش التصنع يعني متقسميش شريحة الشيبسي أربع حتت !! خليكي في النص. - هيقولك مبحبش البنت التنكه، وبحب البنت اللي واخده الموضوع بسهولة كده، وأكلمها في أي وقت ألاقيها دايسه في أي حاجه، بس وحيااااة النوتيلا اللي هتدفينا في ليالي الشتا يا شيخه بيموتوا برده في التقيلة الراسية، وتقيله مش يعني متعبريهوش خالص، لاء، كده ده غشم، وهيطفش، تقيلة يعني أحيانا يلاقيكي بتردي بالقطارة بس بتردي، وساعات يلاقيكي ألطف شويه أو شويتين، بس ميبقاش عارف امتي، يعني تبقي غير متوقعة طول الوقت، بس في نفس الوقت مش كشرة ولا نكدية ولا قماصة.
- العالم مش بيتمحور حواليكي، لازم تبقي مدركة لده، مهما كان بابا وماما مدلعينك، انتي مش أهم حاجه في العالم، ولا أهم حاجه بالنسباله على الأقل في الأول، هو عنده أولويات تانية ممكن تكوني من ضمنها بس انتي مش اهم حاجه فيها، ومتنتظريش تكوني أهم حاجه فيها من غير عشرة ووقت ومجهود، انتي ملكيش رصيد عنده فعليا.
- بلاش أسئلة زي مرتبك كام، ونوع عربيتك ايه، وشقتك كام أوضه، ولو مطلق " بتدفع النفقة ولا لاء"، آه لازم تعرفي إجابات الأسئلة دي، لكن مش مرة واحده ومش بطريقة الاستجواب أرجوكي.
كنت أتمنى الانترنت ينقطع عن العالم كله قبل ما اكتب الجملة دي، اللي ضد قناعاتي بس هي حقيقيه ومؤثرة في العلاقات، (متقوليلوش إنك مادية أو شايفه إن الفلوس مهمه) مهما عملك فيها واقعي أو كنتي صريحه، الجمل اللي من النوع ده بتقلل من إعجابه بيكي، وبتقلقه منك، هو برده بني آدم ومحتاج يحس إنك معجبه بيه عشان نفسه ورغم أي ظروف " وبطمنك يا حبيبي من أولها والجو ده)
- بلاش تندمجي في حواديت وحكايات عن الناس في عيلتك أو شغلك، بلاش نميمة خالتي اللتاتة، مش في صالحك أبدا.
- متتكلميش عن بنت تانية بشكل وحش قدامة أبدا مهما كان السبب، هيشوفك غلاوية وغيرانه، وممكن يشوف مميزاتها أكتر بعد كلامك.
- مش لازم تشتكي من كل حاجة طول الوقت، الحياة صعبة علينا كلنا، والدراما مبقتش مسلية.
- خليكي مصدر طاقة بالنسباله، عين جديده لحياته يشوف بيها كل تفصيله بشكل مختلف، من هنا بيجي التعلق والإدمان والشغف، خليكي مرتبطه في دماغه بانطباع " مسكر" مع أي علامة تشكيل.
- لو قلتي أو عملتي حاجة ضايقته، أو انفعلتي زيادة، يفضل تعترفي إنك غلطانة، ده أحسن كتير من إنك تتجاهلي الغلطة وتكملي كأن مفيش حاجة حصلت.
- المرونة يابنات، المرونة، مش معني إنه كلمك ساعتين امبارح أو عمل تصرف لطيف بشكل معين إنه ملزم يعمل كده طول الوقت ولو معملش كده لأي ظروف عنده تقفشي وتنكدي عليه، خدي الحاجة الحلوة اللي بيعملها كإضافة مش واجب، ووصليله قد ايه انتي فرحانة بده، مش " آه أوك" وكأن ده العادي ووش خشب.
- اسمعيه كويس جدا، وخليه يكسب شوية في نقاشتكم، ويحس في أوقات إنه أذكي منك، بلاش نبرة التحدي تكون عالية بينكوا طول الوقت هو مش منافسك، اقسم بالله دي علاقة رومانسية، ومهما كنتي قوية وعملية ومستقلة ومتحدية في حياتك العملية، فده وقت إنك تظهري الجزء الناعم في شخصيتك.
- حسسيه أحيانا ومش دايما إنك معتمده عليه في بعض الحاجات، حسسيه إنه قوي إلى حد ما، معتمده مش " متسلبطة" ها. ومتسألنيش يني ايه متسلبطه (أنا أتحدث البورسعيدية بطلاقة).
- متكدبيش.متكدبيش.متكدبيش.ولا حتى في تفاصيل بسيطة، زي إنك رايحة تعملي شوبنج في مول العرب وانتي نازلة الوكالة، هتتقفشي وهيبقي شكلك وحش.
- لو سألك عن علاقاتك السابقة، قوليله الخطوط العريضة بس، بلاش تفاصيل، عشان هينكد عليكي بيها لو دماغه صغيره، وهتوجعه بينه وبين نفسه لو حبك بجد بعد كده، وأوعي تحكي أي موقف فيه أي نوع من أنواع المقارنة بين معاملة اللي قبل كده ومعاملة الحالي.
- اتكلمي عن أهلك وحياتك بصورة أقرب للواقعية، عشان لو اتدبس وقرر يتجوزك يعني، بلاش تمثيل مبالغ فيه، لو مش بتقوليلها مامي من وانتي صغيره، فقولي قدامه ماما عادي، والله عادي، لأن هو كمان عادي برده، واحنا كلنا مصريين يعني والموضوع مش مستاهل تناكه على بعض، كلنا عندنا كراتين فاضيه فوق الدولاب.
- متنبهريش بيه زيادة عن اللزوم، هو شخص عادي، ممكن يبقي مميز بس في الأول والآخر يعني هو بيدخل الحمام وبيرجع لما يجيله حموضة، وكان بيحب بنت من طرف واحد قبل كده ومش معبراه، ومكنش بيعرف يلبس في إعدادي، وكان بيتضرب في حصة الحساب في ابتدائي، فمتنبهريش.
- بعض البنات وخصوصا " الصغننين" بيضعفوا قدام شغلانات معينه، زي الطيار والظابط والقبطان والدكتور، مفيهاش حاجه إنك شايفه مجاله حلو وشيك، وهو كمان شايف كده دي نقطة اتفاق، بس بلاش تبقي موهومة بيه وبلاش تعامليه بطريقة اللي مش مصدقة نفسها وإنه حلم حياتك، في غيرة كتير بنفس المواصفات عموما، متدوريش عالبدلة، اتأكدي من اللي جواها أهم، وكمان بلاش الطريقة المضادة اللي بعض البنات بتعملها عشان تخفي انبهارها بحد، إنك مثلا تشتمي في مهنته أو تحاولي تحقري منها عشان يبان إنك تقيله ولا همك، الطريقتين غلط، خليكي طبيعية وبس.
- الراجل مبيحبش الست المنتشرة، يعني مش لطيف إنه كل ما يروح معاكي مكان بالصدفه يلاقيكي بتسلمي علي مدير المكان والويتر واللي بيقدم الشيشة وكفك يا إسماعيل، حتى لو قصدك إن ده تواضع هو مش هيفهم كده، وحتي لو فهم، الموضوع بيضايق فعلا، اعكسيها.
- بلاش تتدلقي، بلاش جملة " حلمت بيك امبارح أو أي حاجة شبهها، خصوصا في أول المعرفة، حتى لو كنتي شفتي خلقته في الحلم فعلا، بلاش.
- متبقيش زنانة، وبتطارديه، بشكل عام لو شاف 3 رنات منك ورا بعض على تليفونه بيبدأ يمل أو بيشوفك واقعه، أو عالأقل " أهي موجودة" بلاش تحطي نفسك في الخانة دي في حياته، يستثني من ذلك حالات الطوارئ زي الحوادث أو الموت أو ليلة دخلته على واحدة تانية.
- لطيفة وعصرية فكرة إنك تعبري عن رغباتك وإنك انتي اللي تبدأي، بس بلاش طول الوقت، في جمل هتفضل بتاعة الرجالة وبس، ومهما حصل يستحسن منحاولش نسرقها منهم، يعني يفضل هو اللي يقول" هنتقابل امتي" أو " وراكي ايه بكره".
- بلاش تتبعي طريقة " سعدية الهبلة" يعني خليكي متفاعلة مع كلامه، مش كل حاجه تردي عليها بآه أو لاء، أو اللي تشوفه، وهاخد زيك.
- بلاش طريقة " ازيكو ازيكو أني جاية أخدم عندكوا" اللي هو في تاني مرة تتقابلوا تقومي ناتشة النضارة منه ومسحاله ازازها أو مطوقة إزاز العربية!
- بلاش تحسسيه إنه قاعد مع عطية صاحبه أو مع مديرة في الشغل، شوية أنوثه ياخوانا الله يخليكوا، حبه كمان، كمان حبه، ايووووه كده، آه الأنوثة مش عيب، ومش معني إنك تبقي على طبيعتك إنك تبقي مسترجلة.
- الإغراء مهارة تكتسب مش صفة خاصة بشاكيرا وبيونسيه بس، والإغراء ملوش علاقة مباشرة بالجمال، ومهما كنتي مؤدبه، الإغراء مهم. مؤدبه اغرى جوزك. أيا كانت العلاقة ونوعها مش دي القضية، القضية إن في ستات شايفين الإغراء ده حاجه بتيجي في التلفزيون وبس، أوعي تبقي منهم.
ملحوظة: مهما عرفنا ايه اللي بينجح في العلاقات وايه اللي بيفشل، لما بنحب بجد بيجيلنا حالة هطل لا إرادية مجهولة المصدر، ودرجة ذكائنا بتنعدم تقريبا، وبنبقي نيله خالص، بس خلونا نحاول!
