«القناة هيا النواة».. إهداء "أمين الديب" لقناة السويس الجديدة

كتب الشاعر أمين الديب، قصيدة جديدة أهداها للشعب المصري، بمناسبة قرب موعد افتتاح قناة السويس الجديدة.
وقال "الديب" في قصيدته التي اختص بها "فيتو":
القناة مش مجرى مائى
القناة شريان حياه
توصل البحرين ومطمع
للأجانب والغزاة
الدول حاسدينا بيها
والعيون حطت عليها
اللى قال يحرمنا منها
واللى بيحارب عليها
واللى طمعان يشتريها
لاجل ما يسيطر عليها
أما كل الشعب مؤمن
إن رب الكون حاميها
وبعظمته وفضل منه
حبها واختص بيها
مصر تحفرها بإيديها
اللى مات في الحفر فيها
واللى عايش مش ناسيها
ياما ناس ضحت بروحها
من نصارى ومسلميها
مش جدودنا بس حفروا
كل جيل له بصمة فيها
اللى حفروا واللى خفروا
واللى صبروا واللى عبروا
واللى طرد اللى اغتصبها
واللى عمق واللى وسع
واللى كان من مرشديها
بعد سحب المرشدين
من فرنسا واليونان
في سنة ستة وخمسين
يوم ما أممها جمال
جالها م البحرية أجدع
مرشدين داروا القنال
هي رزق عيال عيالنا
مصدر الرزق الحلال
وبكده صبحت قنالنا
كلها في إيدين رجالنا
شغلوها وللأمانة
طهروها م الخيانة
وبكده بقت القناة
أصبحت شريان حياه
للتجارة العالمية
والشعوب الآسيوية
ولأوربا وشرق آسيا
والتجارة الأمريكية
قربت مسافات وهيا
بالإضافة لأهراماتنا
أكدت للدنيا دورنا
في الحضارة الإنسانية
-----------------
واللى سرقوا الثورة منا
هما واللى حيشتروها
وطنوا الإرهاب يقلل
من قيمتها وحقروها
واللى قال نستأجروها
واحنا ممكن نحرسوها
والكلام ما بينتهيش
شعبنا فهم المؤامرة
قال لهم تخطيطكوا فاشل
أرض سينا أمن قومى
أمن شعب وأمن جيش
القناة في إيدين أمينة
والرئيس السيسي بدد حلمهم
أصبح مافيش
قال بمالنا وإيد عيالنا
ياللا بينا نوسعوها
وبجنودنا نحرسوها
أسبوعين الشعب قدم
مليارات والكل صمم
قال نضحى عشان نعيش
والأمل في الله وثم
في الفريق مهاب مميش
دوره في التنمية يبنى
ٍيبنى عالشطين مخازن
كونتنر والترسانات
والمصانع والتجارة
والمزيد م المشروعات
تبقى مركز خدمة دولى
للسفن والتموينات
تبقى للدعم اللوجيستى
جاذبة للاستثمارات
والرئيس السيسي صمم
القناة تصبح لسينا وأهلها..
مصدر نماء
والشباب تكمل مسيرته
للحضارة والانتماء
يبتكر أساليب جديدة
غير جدودنا والآباء
يبنى مصر بشكل تانى
بالعزيمة والتفانى
بالعمل مش بالأمانى
يصحى تانى الانتماء
والرئيس السيسي قالها
قال نشيلها فوق كتافنا
واحنا شوفنا
لما زارهم في المواقع
قبل خمسة الصبح زارهم
كل معاهم داق فطارهم
راح يقوى في الإرادة
قال لعمّالنا يا سادة
العمل ضمن العبادة
إحنا عاوزين مصر تنهض
تستعيد عهد الريادة
والريادة
يعنى كل الناس تعيش
واللى شفته وزاد سرورى
الفريق مهاب مميش
خد إشارة البدء فورًا
ابتدى في التجهيزات
وابتدى تجهيز موانى
في القناة حتى العريش
وابتدت شركات توسع
في القناه بقناه جديدة
هي دى النهضة الجديدة
نهضة عظمى يقودها جيش
-------------------
والرجال المخلصين
تبنى في كل اتجاه
في الزراعة والصناعة
والشباب يثبت وجوده
كل وقت وكل ساعة
واللى يعوى نسيبه يعوى
هو دا طوق النجاة
والرئيس السيسي لما
روحنا فوضناه شكرنا
واستعان بالله وقالها
إحنا مش ممكن نعيش
قبل ما الإرهاب نزيله
م البلد نقطع جدوره
كل فاسد جايله دوره
قال لنا كله انتباه
مصر قوة وقوة عظمى
مصر أقوى من الطغاة
أقوى م الإرهاب وأقوى
أقوى من كل الغزاة
مصر دى أم الحضارة
مصر للعالم منارة
من يوميها واحنا قوة
يد واحدة وكلمه واحدة
يعنى شعب وجيش وراه
نستفيد بمقدراتنا
والقناة.... هيا النواة