كلام بعبلهُ (1) تحرير بورسعيد عباسية ! تخريب دمار بلطجية !

خلينى أكتب بدماغ مشوشة وأيه فى مصر مش مشوش الواحد فينا لما يحب يكتب بيعمل دماغ ويهيىء نفسه للكتابة ويتسلطن علشان يبدع ويعمل اللى متعملش فى مقاله أو خاطرته الشعرية علشان تهز الموقع والدنيا كلها والمعلقين يكتروا وتبقى هيصة ويا ويله اللى مايخش يجامل ولو بكلمة على المكتوب (وآه م المكتوب ياحبيبى آه م المكتوب ) . لكن أنا النهاردة وبصراحة قلت لنفسى خلينى أكتب ومش مهم فصحى عامية بامية أو ملوخية مش هتفرق يمكن يكون كلامى مفهوم أو مش مفهوم مش مشكلة هوه أيه فى مصر مفهوم الاخوان وطلعوا كدابين والسلفيين وطلعوا مزورين و المرشحين للرئاسة بيحاربوا فى بعض وكل واحد بيدور على نفسه وعلى حزبه وعلى جماعته وتولع مصر وأهى بتولع وحتى العسكرى اللى حمى الثورة مش قادر يحمى المصريين ولمصلحة مين مش عارفين هل سيادة المشير عاوز يعنى الناس تقول ولا يوم من أيام مبارك طب مش قايلين وازاى نقول والمرض مسكنا 30 سنة والهم ركبنا والذل والعار والهوان برضه مش هنقول بالعكس ملعون أبوالمرض والفقر والقمع والبهدلة . أيه يا جماعة عاوزين أيه حتى بتوع مجلس الشعب كل يوم والتانى ماسكين فى خناق بعض ولا حد على بالهم لا عباسية ولا بورسعيد ولا تخريب ودمار وبلطجية والبقية تأتى و ممكن نلاقى مصر كلها كده فى يوم وليلة وكبار البلد نايمين والكل مستكين و وديع وكله مستنى ريس يحكم البلد جتكم ستين خيبة ما حد فيكم عامل حساب لربنا هتعملوا حساب لريس ويمكن يبقى الريس اللى جاى يطلع زيكم وحتى الشعب ملاييين منه هيطلعوا فى الانتخابات ويعطوا صوتهم مجاملة للأخوان أو الفلول والعند شغال والسلفيين مش هيصوتوا للأخوان طبعا ولا الفلول وكله بيحارب فى كله ومحدش بيدور على مصلحة البلد . ولسه الفكر القديم المريض شغال بيدين ويشجب ويستنكر الأحداث نسيب الناس تموت وتندبح وبعدين نستنكر ونعلن أنه لن يفلت أحد من العدالة مع إن مفيش عدالة من أصله وكله عياره فالت وسلم لى على الشرطة والعسكرى والحكومة والشعب والشورى وحتى الرئاسة جتكم ستين خيبة على الستين اللى فاتوا وستين شوية .ميدان تحرير وثورة قامت و كانت مفخرة وخلتوها بالبلطجية مسخرة ونيموها وطلعت البلطجية مكانها وأمن قومى
وأجهزة مخابرات عارفين كل حاجة وساكتين أصلهم فى شهر العسل و ممنوع حد يصحيهم أصل الأمن مستتب والبلطجية معروفين طابعا عارفين البلطجية ما هم كانوا عارفين بناكل أيه وبنشرب أيه وبنقرأ ونكتب أيه وبنصلى فى البيت ولا فى المسجد علشان أمن مصر لكن النهارده مصر آمنة ومطمئنة الله يخرب بيوتهم وكله تمام ويبقى الحال على ما هو عليه . وحسبنا الله ونعم الوكيل .