وجهة نظر

عبد اللطيف المناوي: السيدات والسادة مساء الخيراحتفلت مصرمؤخرا بعيد العلم وكرم الرئيس مبارك عددا من عقول مصر وعلمائها الاجلاء واكد في كلمته ان مجتمع المعرفة القائم على التعليم والبحث العلمي والابتكارهوالطريق لمجتمع حديث ومتطور ينطلق من نظام تعليمي يواكب روح العصر ويلاحق الطفرة في العلوم والتكنولوجيا في القرن الحادي والعشرين وفتح الاحتفال الحديث حول مستقبل مصر العلمي والبحثي .. السيدات والسادة البحث العلمي ليس قضية عادية بل هو قضية امن قومي منه يبدا وينتهي الحديث عن مستقبل مصر به يبدا الاهتمام بالتعليم الجامعي وقبل الجامعي ومنه ومن يبدا اهتمام الدولة بعقول مفكريها لكن على الرغم من المراكز البحثية الموجودة وجود عدد كبير من علماء مصر داخل مصر وخارجها الا ان المعوقات والمشاكل تؤكد ان هناك ازمة بحث علمي في مصر.. ما سبب ازمة البحث العلمي هل المشكلة في التمويل ام المشكلة في غياب اهتمام الدولة ام ان المشكلة في عدم وجود حافز مادي كافي للعلماء ام ان المشكلة في عدم الاستفادة من الافكار والاختراعات ما حقيقة ملايين براءات الاختراع التي لا تستخدم وما صحة ما يتردد عن السرقات العلمية وتحويل العلماء الى موظفين ينتظرون الترقيات ، الدول التي ابتدات معنا مثل ماليزيا كوريا اندونيسيا الهند.. اين دور الجامعات في البحث العلمي واين دور المراكز البحثية في التصدي لانفلونزا الخنازير والطيور وما اسباب هجرة عقول مصر الى الخارج وكيف يمكن لمصر ان تستفيد منهم مرة اخرى كما ترون اسئلة كثيرة ربما تكون قد طرحت كثيرا من قبل وربما يطرحها رجل الشارع كل يوم لكن هذه مناسبة جيدة وجديدة للبحث عن اجابات نستمع في حلقة اليوم الى وجهة نظر المسئول الاول الدكتور هاني هلال وزير التعليم العالي والبحث العلمي .. كيف تصف حالة البحث العلمي في مصر
د/هاني هلال- وزير التعليم العالي والبحث العلمي: حالة البحث العلمي في مصر او في أي دولة في العالم المسئول الاول عنها هتكون اجابته غير مرضية لان دايما العالم والباحث يبحث عن مزيد من التقدم يبحث عن مزيد من الاختراعات يبحث عن مزيد من الابتكار انما لو احب أجاوب سؤالك هل احنا النهاردة لدينا رؤية لدينا خطة مش مجرد رؤية هل لدينا اشياء نستطيع ان نقول ان هناك بعض بوادر الامل هناك بعض النقاط المضيئة في ظل النفق هقول لحضرتك آه واحنا اتكلمنا عنه هنتكلم عنه يمكن سيادة الرئيس في خطابه ذكر انه هناك خطوات تمت حتى نضع الصورة المضيئة للبحث العلمي ؟
عبد اللطيف المناوي: احنا عشان نرى الصورة المضيئة دعنا نرى الآن الصورة كما هي ثم نحاول ان نستشرف معا كيف يمكن ان نخرج من هذا الوضع الذي نحن فيه الآن والذي اشرت ضمنا انه لا يمكن ان تقبل كمسئول اول عن هذا الوضع كأي مسئول اول عن البحث العلمي في أي مكان ولكن خليني اسالك في البداية ماهي حجم ميزانية البحث العلمي
د/هاني هلال: لا تتجاوز POINT FOUR PERCENTE من الدخل القومي .
عبد اللطيف المناوي:يعني اقل من 1/2 % من الدخل القومي ؟
د/هاني هلال: ما يخصص من ميزانية الدولة كل عام بيزيد ولكن الدخل القومي نفسه مع الاصلاحات الاقتصادية والنمو الاقتصادي زاد بمعدل اعلى بكثير جدا من معدل زيادة الانفاق على البحث العلمي في الميزانية
عبد اللطيف المناوي:عندما يزداد الدخل القومي لا ينبغي الزيادة ايضا كما ذكرالرئيس وسمعنا جزء منها ان جزء من تقويمات الدول في مستواها هو البحث العلمي باعتباره اعلى من الاقتصاد والزراعة والصناعة
د/هاني هلال: تمام انا عاوز اوضح النقطة دي القيمة المضافة على الاقتصاد القومي من الاستثمار الصناعي ،العائد بتاعه على الاقتصاد القومي بيتراوح بين 3 و4% بمعنى ان النموالاقتصادي له اجزاء كبيرفي التنمية الصناعية في البترول والغاز في التنمية السياحية الجزء الخاص بالاستثمار الصناعي ولو عملت استثمارات جديدة ولو زودت القيمة المضافة على الاستثمار القومي قد تصل الى 4 او 7% في بعض الدول انما لو جيت قلت ان القيمة المضافة نتيجة الاستثمار الناتج عن الابتكار او البحث العلمي بيصل الى 13% لانها تكنولوجيا جت نتيجة ابتكار محلي نتيجة ابتكارمش موجود قبل كده فالقيمة المضافة على الاقتصاد القومي اعلى بكثير جدا من القيمة المضافة من الاستثمار المباشر
عبد اللطيف المناوي:طيب اذن هناك اتفاق على اهمية هذه المسالة وبالتالي ربط ارتفاع الدخل القومي ينبغي ان يرتبط بشكل او باخر بالموازنة ؟
د/هاني هلال:بالظبط التوجيه واضح لللحكومة منقدرش النهاردة نيجي فجاة ودي كانت نقطة واضحة في خطاب سيادة الريس انه احنا النهاردة نزيد الموارد بالتدريج ..ليه..؟ اولا احنا عندنا قطاعات اخرى في الدولة محتاجة انه يتم الاستثمار فيها ايضا نستوعب هذا التمويل في الاتجاه الصحيح .
عبد اللطيف المناوي: اذا ما قررنا انفسنا ونحن دولة محورية ومهمة في العالم بالدول الاخرى الموجودة سواء الدول التي بدات معانا اوالدول المجاورة لينا اين نحن من هؤلاء اين نحن من اندونيسيا اين نحن من الهند اين نحن من اسرائيل؟
د/هاني هلال:لما نقارن نفسنا احنا عندنا مجموعة من الارقام ومجموعة من الجداول لما نقارن نفسنا بتركيا من الدول البازغة حوالينا تركيا وايران، اسرائيل طبعا لا تقارن لاسباب كتيرة اولا لانه مش كل البحث العلمي بيتم في اسرائيل التمويل اللي جاي للبحث العلمي في اسرائيل مش كله موجه من اسرائيل، اسرائيل لها خصوصية لا داعي ان احنا نقارن نفسنا بيها انما نحطها قدام عينيا لان دي من الدول الموجودة حوالينا احنا النهاردة لما نقارن نفسنا من الكلام اللي انت قلته نشخص حالة البحث العلمي انا مش هشخص النهاردة احنا شخصناه سنة 2006/2007 وعرفنا اسباب الضعف فين واسباب القوة فين وايه المناطق اللي احنا محتاجين ان احنا نشتغل فيها وايه المناطق اللي مش هنشتغل فيها احنا بنتكلم عن خطة وضعناها وبدات تنتج معانا
عبد اللطيف المناوي:اين نقاط الضعف التي وجدتموها في البحث العلمي ؟
د/هاني هلال: بص اول نقطة كانت موجودة احنا مش هنسميها البحث العلمي احنا هنسميها العلوم والتكنولوجيا لان انت لما بتسميها البحث العلمي بتقف عند خط معين اللي هو كيف نستفيد من الابحاث العلمية لما بنقول علوم وتكنولوجيا انا بربط الحلقة كاملة انا بسميها دورة العلوم والتكنولوجيا اللي بتبتدي بالبحث العلمي تبتدي بنشرعلمي او براءة اختراع دول اسمهم العلوم او البحث العلمي بعد كده المنتج الصناعي والناحية التانية بنسميها التكنولوجيا او التنمية التكنولوجية عشان تقدرتحس بقيمة البحث العلمي الموجود عندك يبقى ليه عائد على الاقتصاد القومي يبقى تقفل دورة العلوم والتكنولوجيا .. دي احنا عندنا باحثين متميزين لا خلاف عليهم جوة مصر وبره مصر عندنا مؤسسات بحثية ماهياش وحشة ينقصها بعض الامكانيات عندنا نشر علمي مكانش وحش احنا دلوقت بقينا احسن اللي انا قلته في كلمتي لسيادة الريس احنا في 2006 في متوسط النشر العلمي العالمي خلي بالك احنا لو هنتكلم عن الجامعات وترتيب الجامعات ، الجامعات بتصنف بناء على عدد الابحاث العلمية المنشورة في مجلات علمية عالمية محكمة ذات عامل تاثيري احنا عدد ابحاث المصريين داخل مصر في 2006 كان حوالي 4 الاف بحث سنوي احنا النهاردة في 2009 ، 6 الاف بحث سنويا يعني احنا في بحر 4 سنوات زدنا حوالي 50% .
عبد اللطيف المناوي: يعني اقول في لجنة العلوم والتكنولوجيا بيضع مصرفي الرتبة ال38 عالميا والمرتبة الاولى في المنطقة العربية ودا بيعني ان مصربتمتلك من المقومات البشرية ؟
د/هاني هلال: عنصر بشري ممتاز ينقصك ايه ..احنا عملنا دراسة سنة 2006/2007 مع التنمية الادارية درسنا المنظومة درسنا كل مراكز البحث العلمي ادارة وقانون وتمويل وعدد ابحاث وامكانيات ونشر علمي دراسة متكاملة ، المنظومة دي ما قدمهاش خطة واضحة بتزق فيها ، معنديش خريطة النهاردة اقول للمراكز البحثية او الجامعات او الشركات ، البحث العلمي دا بيتم برغبة الباحث النهاردة ليا مزاج ان انا اعمل في مجال الكيميا بعمل في مجال الكيميا
عبد اللطيف المناوي: حالة عشوائية في الانتاج العلمي ؟
د/هاني هلال: لا لا لا لا .. بالمرة مش عشوائية البحث العلمي موجود في كل العالم ودا اللي بينتج الابتكارانما عايزين نقول ايه احنا في دولة زي مصر مواردنا محدودة متقدرش يبقى كل الخطة بتاعتك تبقى موجهة للبحث العلمي اوبرغبة الباحثين اوالمراكز البحثية بس لازم البحث العلمي يكون له مردود على الاقتصاد القومي يبقى لازم من وجود خطة للدولة في اطار البحث العلمي ودعم المجتمع المحلي.. احنا درسنا العالم كله بيعمل ايه اللي هو بنسميه ادارة المنظومة لان دا اللي بيحكمك في النهاية لقينا ان احنا عشان نتقدم اللي غيرنا سبقونا واللي زينا وبقوا احسن منا عملوا حاجات كتير منها لابدان يكون هماك خطة ويكون هناك رغبة سياسية في ذلك ، تواجد الرغبة السياسية مع الخطة التنفيذية لقينا ما يسمى الان المجلس الاعلى للعلوم والتكنولوجيا ، المجلس دا مجلس سياسات مجلس خطط وليس مجلس مباني وموظفين احنا بننشئ مجلس يضع خطة استراتيجية قومية للدولة هذا المجلس برياسة رئيس مجلس الوزراء وعضوية مجموعة من الوزراء 8 لحسن الحظ او للاسف كل وزراء الحكومة معنيين بالعلوم والتكنولوجياالسيد رئيس الوزراء واحنا بنناقش القرار الجمهوري في مجلس الوزرا قالهم خلاص لو احنا هناخد كل الناس يبقى مجلس الوزرا ومجلس العلوم والتكنولوجيا خدنا 8 من الوزرا وخدنا 9 من العلماء والباحثين ورجال المجتمع
عبد اللطيف المناوي: ماذا فعل هذا المجلس ؟
د/هاني هلال: هذا المجلس وضع خطة قومية اوالخطة الاستراتيجية في العلوم والتكنولوجيا
عبد اللطيف المناوي: ايه ملامحها ؟
د/هاني هلال:اولا بنبني القوى البشرية شغالين عليه في كل القطاعات نمرة اتنين تحديد الاولويات نمرة تلاتة اليات التمويل نمرة اربعة مناخ البحث العلمي .
عبد اللطيف المناوي: على الرغم من وجود العلماء المؤهلين وفقا لشهادات مختلفة داخلية وخارجية الا انه ما يقال عن مستوى دعني اسميه متدني لبعض من ينتمون الى هذا الجانب هناك حالة من حالات وضع هؤلاء العلماء في حالة وبالتالي اصبحت المسالة البحث عن الدرجة والجانب المادي في الموضوع ايه هي خطتكم لتطوير الموارد البشرية ؟
د/هاني هلال: احنا النهاردة عندي جيلين في الموارد البشرية عندي جيل اللي موجود عندي النهاردة بيمثل جيلنا واللي اصغر منا واللي اكبر منا وعندي الشباب احنا النهاردة بنحافظ على الجيل اللي موجود وبنشجعه بس بنهتم اكتربالشباب شغلنا على الشباب بنسفره بره بنخليه عنده انفتاح على العلم واحتكاك بنديله فرصة عمل بحث علمي في مصروبنديله اجراحسن ، احنا بندي للباحث اللي بيتقدم بمشروع بحثي في التمويل الجديد نص مليون جنيه هو بيعمل بحث، انا عايز اشجع البحث العلمي في مصرعايزاشجع المنظومة او خليني اقولها بالبلدي انا عايز اهزالمنظومة عشان تقوم وتنهض معاك النهاردة هتديله نص مليون منهم ربع مليون مكافاة ليه في خلال 25 شهر ياخدهم كل شهر 10 الاف جنيه بديله ربع الفلوس دي اكتر من 130 الف جنيه يقدر يسافر يحضر المؤتمرات الدولية والمنتديات العلمية في العالم وندي له فلوس يشتري مواد البحث العلمي هتسالني سؤال طب الولد دا عرف يشتغل ماهو لما راح يشتغل في المعمل بتاعه الجيل اللي قبليه ماخدش ال10 الاف جنيه هنا بقى بنبتدي ايه بنحلل المنظومة كلها ونعالج هذا الموضوع بعدها
عبد اللطيف المناوي:هل هناك خطة لهذه العملية وايه هو المردود هل لديكم دراسة للمردود وكيف يمكن التعامل مع المتسرب الذي يذهب ولا يعد ؟
د/هاني هلال: المقررلينا 50 الف جنيه سيادة الريس قال هناك فجوة ما ين طموحاتنا وامكانياتنا المادية احنا النهاردة بنطلع 500 في السنة فيه سنة بنطلع 300 فيه سنة بنطلع 700 بنبعتهم في احسن حتة في العالم ما بنسترخصش الخطة موجودة وواضحة وعلى فكرة احنا زمان كنا بنوزع البعثات دي على الاماكن عين شمس تاخد خمسة القاهرة تاخد تلاتة دلوقت بقى كله منافسة انا بعلن على اللي انا عايزه انا عايز واحد تخصص كذا عايز واحد تخصص كذا وكل الموجودين في الجامعات المصرية كلها تقدم واخد احسن واحد ولما يرجع احطه في الحتة اللي انا ببنيها النهاردة ، انا البعثة اللي انا بطلعها انا برصد لها مكان في مركز بحثي معين هل فيه مخاطرة ان دا مايرجعش ..اه.. وعندي هنا فيه حاجات انا بصرفها وفيه حاجات بتصرفها الدول الاجنبية احنا الباحثين بتوعنا ماهماش نص نص زي ما الناس بتقول العالم كله بياخدهم ونسبة المنح ليهم عالية جدا وعندي نسبة تسرب قد تصل في بعض التخصصات الى 30% بس تسالني سؤال هتعمل ايه عشان ترجعهم لازم اخلق له المناخ الجاذب عشان يرجع ،عشان كده عقدنا في شهر 7 اللي فات جلسة خاصة كنا بنتكلم عن مناخ البحث العلمي واتكلمنا عن المعوقات احنا النهاردة احنا بنعد دورة تانية على مناخ البحث العلمي ازاي النهاردة اخلق مناخ للعلوم والتكنولوجيا..البحث العلمي في الشركات مين اللي قال ان احنا ما نشجعش البحث العلمي في الشركات ايضا
عبد اللطيف المناوي: بس بتظل مراكز البحث العلمي التابعة للدولة احد اعمدة هذه المنظومة كيف يمكن لنا ان نقنع باحث في الخارج الى الرجوع واحنا عندنا معامل متهالكة عدم وجود امكانيات هل لدينا احنا لدينا طبيعة واضحة عن طبيعة هذه المدارس عن المعوقات اللي موجودة فيها وهل لدينا تصور لحل في المستقبل ؟
د/هاني هلال: هودا اللي احنا عملناه في 2006/ 2007 ..النهاردة الباحث دا لما يرجع مش هيخش يقعد في المعمل اللي كان قاعد فيه احنا بنعمل مراكز تميز في المركزالقومي للبحوث في جامعة القاهرة في جامعة اسيوط في اسكندرية فيه مركز البحوث الزراعية بتخدم مصر كلها والقطاع الخاص ايضاانا بشتري اجهزة ليهم بكمل لهم الاجهزة اللي موجودة بجمع التخصصات اللي زي بعضها واحطها في مكان يا اما مكانvesicle يا اما مكان virtualادي حضرتك مثال احنا عندنا 3 مراكز متميزين في مصر مدينة مبارك وجامعة عين شمس وجامعة القاهرة دول بيشتغلوا مع بعض في تناغم دلوقت بس كل واحد بيشتغل في حاجة وبنمولهم خلي بالك وما ينفعش تعمل دا النهاردة وتعزلهم عن العالم تعمل حاجة هنعلن عنها قريب اسمها " كراسي التميز ".. كرسي التميزدا كان عندنا حاجة اسمها استاذ كرسي ودا كان اكثر العلماء الموجودين في هذا التخصص يفضل قاعد عليه طول ما هو متميز لو التميز راح منه يجي واحد تاني يقوله متشكرين انا هاخد مكانك ، النظام دا اتلغى النهاردة ودا بقى احد العيوب وفيه تكدس في بعض التخصصات وقلة في تخصصات اخرى احنا عندنا اللي يخش مدرس لازم يبقى استاذ بعد 10 سنين تيجي بقى نقطة البحث العلمي من اجل الترقي دا كان بيعمل بحث علمي مش عشان يترقى .لا ..دا كان علشان يتنافس على الكرسي اللي انت قاعد عليه هو عينه على ايه ..؟ الكرسي دا انت مش هتاخده عشان انت عليك الدور لا دا عشان انت متميز وعشان تبقى متميز مش هتعمل بحث علمي كده ..كل دا موجود قدامنا ، الباحث اللي هيرجع دا هديله الف جنيه ولا الف وخمسمية جنيه .. مش هيقعد.. لازم بقى اديله المرتب اللي يخليه يقعد ، انا قابلت مبعوثين برة كل دول عندهم ماديات احسن برة من اللي عندنا عشر مرات بس لما تقعد معاهم وتفهمهم ان احنا عندنا اعادة توطين الباحثين ونقوله تعال انا معنديش مانع اديك 10 الاف جنيه دي حوالي 1900 دولار هو هيديله 3 الاف دولار شوف هيصرف منهم كام وتمن الغربة هيفضل في مستوى اقل لانه لا يحمل هذه الجنسية وحتى لو حملها الولد يقولك لا بالعكس دا انا اخلص بدري ونرجع ، العبرة مش انك انت تحط قوانين وتحط حدود وتكتف الناس انت افتح الناس
عبد اللطيف المناوي:هل عندك القدرة كدولة وكحكومة ان تاخد مثل هذه القرارات وعندك ىالقدرة على ردود الفعل الاخرى اللي هتكون محيطة بها المحيطة بها كام واحد موجودين في المنظومة العلمية ؟
د/هاني هلال: في البحث العلمي عندنا حوالي 60 او 70 الف
عبد اللطيف المناوي: النهاردة بتتكلم عن مجموعة متميزة لن يزيد عددها عددها عن 3 الاف او4 الاف او5 الاف ازاي هتقدر تخلق التوازن ؟
د/هاني هلال: لوحضرتك فاكر العام الماضي كنا بنتكلم عن دخل هيئة التدريس وراينا ان الدخل دا لا يتناسب مع مكانتهم ابتدينا نزود بالتدريج بس الزيادة اللي بالتدر يج دي لابد ان تكون مرتبطة بالاداء انا النهاردة لما اجيب واحد شاب وياخد مرتب قدي 5 مرات ما ازعلش لان دا القرار اللي خدته الدولة ما ينفعش تاخد قرار تنافسي وتيجي في المنظومة اللي هتقوم لك الاقتصاد دا وتقول لا انا هشتغل نظام اشتراكي كلنا زي بعض يعني انا استاذ يعني اخد زيي زيك ما ينفعش طيب هل تقدر تعمل دا في يوم وليلة هتعمل ايه الدولة بتتبنى الشباب بتركز عليهم بتحميهم بتديهم الفرصةولابد اديله الفرصة فدي المعادلة الصعبة ان ناخد وندي مع بعض
عبد اللطيف المناوي:هنا فى احد القضايا المطروحة اللي هي فكرة تعدد البحث العلمي 40 او 41 مركز للبحث العلمي انا بتكلم هنا عن المراكزالرئيسية ما يتبع البحث العلمي او وزارة البحث العلمي عدد قليل، كل مجموعة من هذه المراكز تتبع وزارة او هيئة او مؤسسة السؤال هو الا تعتقد ان هناك اهمية في هذه المرحلة ان يكون هناك ما يجمع هذه المراكز بما يضمن تحديد الاولويات وعدم التضارب في المراكز البحثية ؟
د/هاني هلال: لا طبعا انا لا اوافق على هذه النظرية والا كان العالم كله عملها خلي بالك اللي ماعملهاش غيرك لانه جربها وما نفعتش ،احنا في اولوياتنا حطينا الطاقة كاولوية اولى متجددة حطينا المية حطينا الزراعة والغذاء حطينا الصحة حطينا الطاقة النووية السلمية ، هديك مثال على الزراعة فيه في مصرمركزمن اكفأ وانشط المراكزاللي موجودة على مستوى العالم والشرق الاوسط وعندي في الجامعات مجموعة من الباحثين المتميزين وموجود عندي في بعض المراكز البحثية عشان تيجي تقولي نلغي كل دول ونخليهم تبعك .. انت يهمك ايه ..؟ يهمك الناحية البحثية ..؟
عبد اللطيف المناوي: يهمني شكل العلاقة .
د/هاني هلال: كويس قوي ..العلاقة ايه احنا قلنا عايزين زيادة انتاجية فدان القمح وانتاج انواع جديدة من القمح تتحمل درجة الحرارة وهكذا انا النهاردة بطرح الكلام دا من صندوق العلوم والتكنولوجيا دي الية عملناها حطينا خطة قومية وحطيت الية للتمويل الية شفافة احنا بنطرح الكلام على كل دول ودول باحثين مع بعض هما دول يكونوا فريق بحثي ويشتغلوا بغض النظر هو يتبع وزير الزراعة او يتبع وزير التعليم العالي او يتبع وزير الصحة او يتبع وزير البحث العلمي بس دوروزير الدولة للبحث العلمي تغير ما اصبحش هو الوزير المنوط به الرعاية انما اصبح وظيفتي ان انا انسق بين كل دول في خطة قومية ادي حضرتك مثال واضح ..الطاقة الجديدة احنا طرحنا مشروع كبيرجدا منا ومن الصحة ب180 مليون جنيه لما طرح طرحته مع وزارة الطاقة والكهربا عملنا مجموعة عمل المهم انه في النهاية انا ما اقولش دا بتاعي ولا حد يقول دا بتاعي لكن بنقول الموضوع دا بتاعنا لازم نعمله طب نعمله ازاي اتقدمت ناس بتشتغل في الطاقة اتقدمت ناس بتشتغل في القطاع الخاص اتقدمت ناس بتشتغل في البترول اتقدمت الجامعات ابتدينا ننشط الدنيا ونشتغل
عبد اللطيف المناوي:هنا نقطة فكرة المشروع طرحناه السؤال هو مين اللي طرحناه وايه هي الوسائط اللي تم من خلالها طرحه ومين هما اللي بيقدموا وايه حجم معرفتهم بما طرحناه ؟
د/هاني هلال: احنا قلنا في بداية الحلقة عن ادارة المنظومة النهاردة بعد ما المجلس الاعلى بيقرر اولوية بندخل له دراسة كويسة جدا بعد كده بجمع الشركاء مثلا في الصحة يبقى كليات الطب ووزراة الصحة ، درسنا المشروع بتاع الفيروس سي احنا في المرحلة دي بنركز على مشروعات الفيروسات ، وزارة الصحة راجعت معانا المستندات العلوم والتنمية التكنولوجية وما نشر في الصحف وهو على مرحلتين مرحلة اولية مرحلة بتكون نفسها مجموعة باحثين وشركات ولينا شروط لازم يبقى معاك زراعي لازم يكون فيه تطبيق لازم يكون معاك شركة عايزة تعمل الكلام دا شركة ادوية فيه شروط موجودة الناس بتتقدم وبنحكم
عبد اللطيف المناوي: مين اللي بيحكم ؟
د/هاني هلال: عندنا مجموعة من العلماء وهو اللي بيختار المحكمين وهم في منتهى النزاهة والشفافية واللي بيحيد عن الشفافية بيتشال ولم يثبت عندنا حالة واحدة ، نحكم دا ومن حق من يتقدم لاي مشروع ورفض ان نبعت ورقة انت بحثك رفض للاسباب الاتية 1 2 3 4 5 ومن حقه ان يتقدم مرة اخرى اذا كان هناك فرصة اخرى في هذا المجال
عبد اللطيف المناوي:طب انا لو باحث واعرف وزير البحث العلمي الا تعتقد انه يبقالي فرصة اعلى مفيش واسطة ؟
د/هاني هلال: اقولك انا حاجة وبدون ذكر اسماء احنا في بداية عهد الصندوق كان فيه خطة دولة واصبح هناك اولويات لحاجة عايزاها الدولة بس احنا عندنا تلت للبحوث حسب الرغبة لازم اسيبه خلي بالك انا مهما اشتغل في الحتة دي الناس لازم اشجعهم لازم المنظومة تدور ..احد اساتذتنا وانا بقول اساتذتنا لانه هو استاذنا تكن مصر له كل الاحترام والحب وله انجازات لا تتخيل دا طلب هو وبعض من تلامذته بمشروع بحثي بعد ما اتحدد هذا المشروع رفض مش هقول اسباب .. اللي حصل انه بما انه باحث كلمناه وقلنا له انت مشروعك رفض قالي نعمل قعدة مع سعادتك ونجيب المسئول الخاص بالتحكيم هييجي لحضرتك بالورق راح له حصل قعدة في الصندوق واتقال ان البحث رفض عشان 1 2 3 5 وعشان هو باحث قال انتوا عندكم حق طب اعمل ايه تقدم بيه تاني للصندوق وخد الموةافقة طبعا احنا لو كنا زمان ممكن تقول الله !! معقولة الاستاذ عبد اللطيف المناوي يتقدم لمشروع وما ياخدش المشروع ..لا ..دي بلد ..؟ هو الراجل نفسه اعترف انه لا ..الناس اعتبرت اسمه كفاية ..لا اسمه مش كفاية لان احنا لما بنبعت المشروع يتحكم انا بشيل اسم عبد اللطيف المناوي وادي حضرتك برضه مثال اخر على منح شباب الباحثين احنا عندنا مبادرة اسمها مبادرة الشراكة والانتماء يمكن حضرتك ادرت حوار معاهم في فترة من الفترات منح الشباب والانتماء دي بسيطة جدا بس هدفها المدرسين والمدرسين المساعدين والباحثين يسافروا بره يشوفوا الدنيا يقابلوا الاساتذة يشوفوا النظام يشوفوا العلم يشوفوا أي حاجة وخلاص
عبد اللطيف المناوي: زيارات قصيرة للبحث ؟
د/هاني هلال: من 3 ل 6 اشهر فاحد الشخصيات اتصل بيا وقالي انا تلميذتي بتشتغل معايا فاضل لها 6 اشهر عشان تخلص الدكتوراه وعايز اوديها الحتة الفلانية قلت له والله فكرة كويسة خليها تقدم في الحتة الفلانية قدمت وبعد كده لقيت بيكلمني وهو مستاء جدا ازاي يا دكتور هاني انا التلميذة بتاعتي تقدم وتترفض قلت له يا دكتور فلان انا ما بدخلش في الموضوع دا وعلى فكرة الذي يدير هذه المبادرة شباب مش ناس عواجيز زيي احنا عشان احنا في بداية منظومة جديدة انا هسمح لنفسي اني اطلب منهم ان يطلعوا حضرتك بصفة شخصية على الاستمارة التي تقدمت بيها تلميذة حضرتك وعلى استمارة اخرى تقدم بها احد الناجحين وارجو ان حضرتك بعد ما تتطلع على ذلك تتصل بيا تقولي رايك ايه بالفعل كلفت زميل قلت له معلش انا عارف ان دا ضد القواعد بتاعتكم بس احنا النهاردة بنبني ثقة مع المجتمع فلازم نستحمل واحنا مش هنخسر حاجة بالفعل والله بعد ما شاف دا راح طالبني وقال انا بعتذر وباحييك على هذا الشباب الملتزم وعلى الشفافية وعلى جودة هذا العمل والبنت بالفعل ما فهمتش انها عشان تقدر تسافرلازم تعمل دي وهي هتعدله وهتقدم تاني في الدورة الجاية وبعديها بدورة قدمت تاني كانت اتعلمت وسافرت وجت .. خليني اقولك بصراحة كان هناك عدم ثقة بين الباحثين وبين المنظومة بين ادارة المنظومة انا لما جينا طرحنا مشروعات الصندوق دي يقولولك ايه هتدوها لاصحابكم في وقت من الاوقات هذا حدث في وقت من الاوقات توفر تمويل لدى بعض الجهات ووزع وفقا لبعض الضغوط وانا بعترف بكده وفيه ناس كتير عارفة الكلام دا بس دا بيخلينا نبني ثقة اكبر مع المجتمع العلمي لان الباحث اذا فقد الثقة في اللي قدامه لا يمكن يجيله ثقة فيه تاني فاحنا النهاردة بنكسب ارض
عبد اللطيف المناوي: هل صحيح ان هناك جزء من ميوزانية البحث العلمي المخصصة بيتم رجوعها مرة تانية ؟
د/هاني هلال: لا لا لا بالعكس دا انا بصوت كل سنة .
عبد اللطيف المناوي:مراكز البحوث الزراعية الميزانيات المخصصة لهذه المراكزتم تخفيض ميزانياتها السنوية هذا العام عن العام السابق ليه انتوا المسئولين بتسكتوا على كده ؟
د/هاني هلال: لا احنا ما بنسكتش بس خليني اوضح الفرق في اسلوب الادارة احنا زمان كنا بنعمل ايه او الدولة كانت بتعمل ايه الدولة كانت عشان تعمل بحث علمي بتيجي في موازنة كل مركز من المراكز او كل جامعة من الجامعات وتروح حاطة مبلغ معين في حاجة اسمها بحوث ودراسات تيجي المؤسسة دي بما انه مفيش خطة تيجي مؤسسة تاخد الفلوس دي تقول انا عندي 28 قسم انا خدت 28 مليون جنيه وعندي 28 قسم هدي كل قسم مليون..القسم فيه 10 شعب كل شعبة تاخد 100 الف كل شعبة فيها 100 باحث يبقى كل باحث ياخد الف جنيه ولا 10 تلاف جنيه الكلام دا ما ينفعش الكلام دا مالوش فايدة ، الباحث اللي اديته 10 تلاف جنيه ولا الف جنيه هيعمل بيهم ايه .. دا نرجع بقى للي قلته في البداية اخد الفلوش دي عشان اترقى بيهم اشوف بحث على قدي كده على قد امكانياتي ما ينفعش دا ما يقومش اقتصاد دولة دا ينفع تسلي الطلبة بتوعك في الكلية بالفلوس دي علشان كده لما عرضنا اعادة هيكلة المنظومة ورئيس الوزرا ورئيس الجمهورية وافقوا على ايه انه يكون فيه الية واضحة للتمويل مالا يوضع في ميزانيات المركز القومي للبحوث ميزانيات البحوث الزراعية في الجامعات ، النهاردة كان عندي اجتماتع مع الدكتور عثمان عشان الموازنة ما بنقلش لكن احنا طلباتنا كتير
عبد اللطيف المناوي:ايوه بس فيه مراكز قلت السنة اللي فاتت مركز البحوث الرزاعية في الموازنة الخاصة ب2009 / 2010 اقل من الموازنة الي كانت موجودة في 2008/ 2009 .
د/هاني هلال: قلّ مش في موازنة البحوث هقول لحضرتك حاجة اكبرمركز واخد فلوس واخد حوالي 40 او 50 مليون من الصندوق مركز البحوث الزراعية
عبد اللطيف المناوي: انا بتكلم عن الموازنة الخاصة للدولة .
د/هاني هلال: الموازنة دي النهاردة 80% منها اجور
عبد اللطيف المناوي: هل معنى هذا ان تمويل البحث العلمي في هذه المرحلة لن يعتمد بالضرورة على الجزء المخصص له في الموازنة وسيتم البحث عن وسائل او وسائط اخرى لتمويل البحث العلمي ؟
د/هاني هلال: بيخصص في الموازنة ولكن بيوضع في الية اسمها صندوق العلوم والتنمية التكنولوجية وهي الية تنافسية تسمح لكم بالحصول على تمويل يا اما تعمل اجهزة يا اما انك انت تعمل ابحاث يا اما انك انت تسفر ناس يعني احنا حطينا تمويل لسه بيزيد احنا .. السنة اللي فاتت كنا 200 السنادي 300 مليون بس دا خاص بتمويل ابحاث فقط لا اجور ..سيادة الريس دعا في خطابه قبل كده ان يقوم القطاع الخاص والقطاع المدني بدعم وتمويل هذا دي الالية اللي هتبقى في المستقبل زي الDFDفي المانيا
عبد اللطيف المناوي: ومصادرالصندوق ؟
د/هاني هلال: حاليا الدولة
عبد اللطيف المناوي: هل هي مفتوحة لاخرين للمشاركة فيها ؟
د/هاني هلال: اه..أي حد .. جزء مهم جدا من العلوم والتكنولوجيا هو التعاون الدولي ، الريس اعلن في سنة 2006 العقد المصري للعلوم والتكنولوجيا ، العقد دا احنا بننفذ فيه اللي بقولك عليه واحنا ملتزمين بخطة قدام الريس وقدام الشعب ان احنا ننفذ هذه الخطة وابتدينا نعمل الاعوام التكنولوجية مع الدول المختلفة النهاردة مع سنة 2007 عملنا مع المانيا سنة 2008 عملنا مع اليابان ، سنة 2009 مع ايطاليا النهاردة عندنا افتتاح العام المصري الفرنساوي هدفنا ايه من الكلام دا..؟ هدفنا حاجتين هدفنا انى انا بفتح المجال للعملاء للاحتكاك لعلمائي وعلماء الخارج وخاصة الشباب انا بر كز على الشباب وهديك ارقام محددة في هذا الموضوع النقطة التانية ان انا بعمل مشروعات مشتركة يعني ايه مشروعات مشتركة ..؟ النهاردة انا لو هعمل بحث عن الفيروس سي في مصر هصرف عليه 80 مليون جنيه لو انا عملت البحث دا ودخلت معايا شراكة المانية او فرنسية او أوربية الجانب اللي قدامي بيحط فلوس زيي انا بعمل حاجة اسمه صندوق مشترك يبقى انا البحث اللي انا بعمله دا قدرت اعظم التمويل بتاعه للضعف يعني انا لما يبقى عندي في الصندوق 100 مليون جنيه مخصص للابحاث المشتركة كان انا بعمل بحث علمي ب200 مليون جنيه وبستفيد ميزه احسن من دا ومن دا الانفتاح على العالم الخارجي ، لما عملنا مع المانيا كان الحقيقة عام ناجح جدا النهاردة عدد المبعوثين في المانيا زاد من 2007 من 400 الى 750 واحد ..انا عنديفي اليابان النهاردة اكتر من 550 مبعوث نتيجة اتن انا بنفتح انا النهاردة اليابان وافقت انها تنشئ اول جامعة في تاريخ اليابان خارج حدودها جامعة للعلوم والتكنولوجيا انا النهاردة هيبقى عندي موجود في برج العرب في اسكندرية كل سنة لا يقل عن 20 ، 30 عالم ياباني من المتميزين علميا بيشتغل مع الطلبة المصريين
عبد اللطيف المناوي: ودا مبني على اساس العلاقة والشراكة في العام المصري الياباني ؟
د/هاني هلال: احنا النهاردة عندنا اكبر مشروع موجود.
في الطاقة احنا لسه عندنا ايطاليا وانا حضرت الختام في ايطاليا يوم 15 ديسمبر عندنا اكبر مشروع للطاقة الشمسية القائمة على تركيز الطاقة وليس على الخلايا الشمسية المشروع كبير جدا النهاردة بيموله الجانب الايطالي وانا النهاردة بنهاية ال10 سنين دول هيبقى عندي شراكات مع العالم كله احنا كان عندنا رئيسة مكتب العلوم والتكنولوجيا في الخارجية الامريكية مبادرة اوباما للعلوم والتكنولوجيا الدكتور زويل كان عندنا الاسبوع قبل الماضي باعتباره مبعوث للرئيس اوباما للمبادرة بيتكلم معانا ازاي نفتح ايه المبادرة اللي احنا نعملها عشان نستفيد من التعاون مع امريكا ، تفعيل الشراكة مع امريكا بقالنا 15 سنة بنشتغل معاهم في بحوث مشتركة
عبد اللطيف المناوي: طيب اذا الصورة بهذا الشكل حضرتك بتقدمها بشكل يدعوالى التفاؤل وبشكل مضئ السؤال هوفين الواقع هل الواقع بيتفق مع هذه الصورة ؟
د/هاني هلال: لا احنا لسه بدري.. انت سالتني سؤال عندك كام واحد عندي 50 الف كام واحد من ال50 الف اشتغلوا معايا في دول هيطلعوا الف بس اذن انا لسه ماكونتش الكتلة الحرجة أي نجاح بيحتاج له كتلة حرجة انا لسه ما وصلتش للكتلة الحرجة
عبد اللطيف المناوي: امتى هتوصلوا لهذه الكتلة الحرجة ؟
د/هاني هلال: انا في كلمتي قدام سيادة الريس حددت 4 او 5 تحديات رغم اللي احنا بنعمله النهاردة دا التنافسية العالمية ، مواكبة سوق العمل والتعليم ، الزيادة السكانية ، محدودية الموارد والتحدي الاخير مقاومة التغييراو المناخ الداعم للتغيرداخل المؤسسة احنا النهاردة بنتكلم على حاجات لا انا ليا ذنب فيها ولا حضرتك ليك ذنب فيها ولا زميلي في الجامعة ليه ذنب فيها بعض الناس بتزعل مني تقول انت ضدنا انا مش ضدك انا عاذرك انت معذور زي ماانا معذوراحنا جينا لقينا الوضع كده بس لا نستطيع ان نترك الوضع كده ما تقدرش
عبد اللطيف المناوي: الجزء الخاص بالقطاع الخاص ما هو تصوركم لحدود دورالقطاع الخاص وما هي رؤيتكم ليها وهل لديكم خطة واضحة لدخول هذا القطاع امن ان المسالة سوف تترك للمبادرات الفردية او للاحتياجات الخاصة داخلين في الخطة ولا هما بره ؟
د/هاني هلال: هما داخلين في الخطة اتفقنا بقى التنافسية العالمية أي حد بيقارن بيقارن ببرة احنا في مصر 70% من البحث العلمي بيتم في الجامعات في الدول المتقدمة الصناعية 70 % ان مكانش 80 في اليابان ، في امريكا 70% من البحث العلمي يتم في الشركات
عبد اللطيف المناوي: المسالة معكوسة تماما .
د/هاني هلال: طيب انا النهاردة مقدرش اعمل دا في يوم وليلة احنا النهاردة بنعمل ايه بنخش شراكة مع القطاع الخاص احنا لينا النهاردة صندوق اسمه صندوق التعاون مع الصناعة ما بين المهندس رشيد وما بين البحث العلمي نص نص برضه ، مركزتحديث الصناعة بيدور على المشكل اللي موجودة في الصناعة واللي بيمول النهاردة الصناعة هو مركزتحديث الصناعة عشان يبني الثقة ما بين القطاع الخاص وما بين مركز تحديث الصناعة هو بيمول 50% وانا بمول 50% احنا النهاردة مضينا اتفاقية ما بين المهندس رشيد مركز تحديث الصناعة وبين صندوق العلوم والتنمية التكنولوجية لتشجيع الابتكار في القطاع الخاص يعني انا بقول للقطاع الخاص انا هساعدك في الابتكار..خلي بالك القطاع الخاص لن يعمل معاكم الا اذا شاف له عائد يعود عليه النهاردة عندنا مبادرات 10 من الف مصنع بنتكلم على 5 الاف وحدة انتاجية برضه احنا هنمشي معاهم بالتدريج الدولة تقود ثم تجذب القطاع الخاص زي ما عملنا في الاصلاحات الاقتصادية .
عبد اللطيف المناوي: تحدثت ان70 % من الدراسات تجرى داخل الجامعات المصرية السؤال هو ان بنية الجامعات المصرية بهذا الشكل التي هي موجودة عليه الان هي بنية صحية مناسبة لكي يكون هناك 70% من هذه البحوث القائمة المفيدة هل البنية الخاصة بالجامعات المصرية والسياسة التعليمية بالجامعة المصرية هي بنية صحية ومناسبة ؟
د/هاني هلال: احنا النهاردة بنحولها الى بنية صحية ومناسبة لانها نا كانت صحية قبل كده مرت بفترة صعبة والنهاردة بنحطها على الطريق الصحيح هتسالني قد ايه الطريق الصحيح هقولك انا عديت ال50% زمايلي في الجامعات ومراكز البحوث عندهم القدوة انهم ينهضوا بهذه المنظومة بس اديهم الفرصة والفرصة مش فلوس بس ، فلوس ومناخ ورعاية ومكان يشتغل فيه احنا اول ناس جينا اعترفنا بعيوبنا وقلنا ان الموضوع دا ما ينفعش يستمر كده بس برضعه عشان تقدر تخلي ال50 % دوبل يبقوا 90% حط لي موارد.. هل يعقل انك انت تصر ف وسيادة الريس قال الكلام دا في خطبته على التعليم العالي والبحث العلمي والصحة اقل مما تصرفه على دعم الطاقة بس ، دعم الطاقة حاجة وستين مليون ..انت الصحة والتعليم مع بعض ماحصلوش تلتين دا هل هذا يعقل
عبد اللطيف المناوي: وانا هاخد من حضرتك الكلمة دي وهي عليها ختامي ان هذا امر لا يعقل في ظل مجتمع بيحاول ان ينهض وبيحاول ان يصل الى المستوى الذي ينبغي ان يصل اليه هنا اذكر بما ذكره الدكتورحاتم الجبلي لما كان موجود في هذا المقعد ان مصر في مرحلة من المراحل كانت هي التي تصنع الامصال وتبتكرها ومصر وصلت في مراحل متطورة تكنولوجيا واظن ويظن معي كل المشاهدين ان مصر تستحق ان تكون في مكانتها التي ينبغي ان تكون فيها ما تحدثنا في اليوم دكتور هاني هلال هو موضوع مهم قد يبدو وفقا للتعبير الدارج موضوع دمه تقيل لكن هو في الحقيقة هو مستقبل مصر ومستقبل مصر لن يتاتى الا بمستوى علمي راقي ومستوى بحث علمي ينبغي ان تشارك فيه كافة اطراف المجتمع ليست الدولة فقط ولكن الدولة والقطاع الخاص والمجتمع المدني كل هذه الاطراف لصناعة مستقبل هذا الوطن دكتور هاني هلال وزير التعليم العالي والبحث العلمي شكرا جزيلا لك السيدات والسادة شكرا لكم والى اللقاء في مرات قادمة باذن الله