بيعرّف الحكومة رأى المواطنين.. والرئيس بيراجع قراراته من خلاله.. ومنعرفش عنه حاجة قبل ياسر على

مركز المعلومات ودعم اتخاذ القرار هو منظمة حكومية اسسها دكتور عاطف عبيد سنة 1985 وهو مركز بيتبع لمجلس الوزراء، وحاليا بيضم 600 موظف برئاسة الدكتور ياسر على المتحدث السابق لرياسة الجمهورية، والمركز ده أحد مؤسسات الفكر فى مصر، اللى من مهامه الرئيسية دعم متخذ القرار فى قضايا الإصلاح الاقتصادى والاجتماعى والسياسى، من خلال رصد الواقع، وتحليل الوضع، وتحديد المشكلات الرئيسية، وصياغة مقترحات جاد لعلاجها، علشان تحقق التوافق على الساحتين المحلية والدولية، وكمان مراجعة برامج الحكومة وتوجهاتها.

ودارت حوين المركز ده ضجة كبيرة بعد تعيين د.ياسر على لرأسته، وقالوا ازاى دكتور أمراض جلدية ميعرفش يمسك المركز والمنصب مش من تخصصه، اتكلم» سألت الشباب يعرفوا ايه عن المركز اللى محل حديثهم وتنكيته عى فيس بوك؟.

أعرف واحد شغال هناك


طارق محمود 28 سنة قال: معنديش فكرة واضحة عن آليات إدارة المركز ده ايه رغم ان ليا واحد صحبى شغال هناك خريج كمبيوتر ساينس، لكن أعتقد ان وظيفته عمل مكالمات تليفونية عشوائية مع المواطنين عشان يعرفوا معلومات عنهم وانطباعتهم عن اداء الحكومة او وصول الخدمات الأساسية لهم، يعنى الوظيفة الاساسية معرفة رأى المواطنين وجمع معلومات تقريبية لإعداد خطط الحكومة، ومعنديش معلومات كتيرة عنه غير الكلام اللى اتقال لما اتعين فيه د.ياسر على، ومنها ان رئيسه الجديد دكتور أمراض جلدية وتعينه هناك يعتبر خطأ لأن ده مش تخصصه».

اما عمرو شعبان 25 سنة فبيأكد أن اللى يعرفه عن مركز المعلومات أنه مكان بيمد الجهة اللى بتحب تعرف او تجمع معلومات عن شىء ما بالمعلومات اللى محتجاها.. سواء كانت الجهة دى شركة أو اى دولة تحب تعمل مشروع فى مصر. بس الغريب ان معظم اللى اعترضوا على تعيين ياسر على رئيس للمركز ملهمش شغة ولا مشغلة غير الاعتراض ع الفاضى ولو مسكت واحد فيهم كده وتقوله يعنى ايه مركز معلومات هيقول ده مركز ثانوى وإعدادى فى عباس العقاد. صحيح انا معرفش عنه معلومات كتير الا انى لو مقصر فى معرفة مهامه فده عشان فى حاجات كتير أوى الواحد لسة بيعرفها، بحكم اننا بقالنا سنتين بس بنكتشف الحياة فى مصر».


محمود طعيمة 25 سنة قال انه سمع بس عن مركز المعلومات لما ياسر على المتحدث الرسمى لرئيس الجمهورية سابقا بقى رئيس المركز، وبالنسبة لعمل وآلية المركز قال: «المفروض إن الحكومة أو الرئيس يرجع للمركز عشان يعرف كل معلومة متعلقة بأى قرار هياخده، يعنى الموضوع اللى بيُثار حاليا عن ان كل مواطن ملوش غير 3 أرغفة من العيش فى اليوم، المفروض مركز المعلومات بالتعاون من الهيئة التعبئة والإحصاء ووزارة التموين يجمعوا كل المعلومات عن عدد المواطنين وهل فعلا 3 أرغفة هيكفوا ولا لأ ومحتاجين كام فرن وقد إيه قمح وكل ده».


شهاب أيمن 23 سنة قال: أنا مقريتش عنه ولا كنت اعرف حاجة عنه قبل كده وكنت متخيل ان دوره زى ما سمعنا فى بعض برامج التوك شو، عبارة عن جمع المعلومات وعمل الإحصايئات الخاصة بالدولة فى جميع المجالات، بس اللى عرفته بعد كده ومفهمتهوش برضه ان المركز ده معمول من ايام النظام السابق وكان هدفه اتخاذ القرارات فى الأمور الخاصة بالإصلاح الاقتصادى والسياسى والاجتماعى».