مي كساب تكشف لجمهورها تفاصيل أسود يوم في حياتها

شاركت الفنانة مي كساب جمهور صحفتها الرسمية على موقع "انستجرام"، تفاصيل ما وصفته بأسود يوم في حياتها.
وكتبت مي "ما كنتش عاوزة أكتب أي حاجة، ولا أتكلم بس اتعودت إنكم جزء مني بفرغ اللي جوايا معاكم، وبفرح بكلامكم الحلو اللي بيديني كل الطاقه الإيجابية، اللي بتخليني قادرة أكمل في الحياة إمبارح كان يوم وحش قوووي، أصعب من يوم وفاة أمي".
وأضافت مي "أول مرة هقول الكلام ده في حياتي، لما أمي ماتت فضلت تعبانة نفسيا جدا، وحاسة إن أنا السبب، أنا اللي أخدتها واديتها الإشعاع وفضلت عايشة كتير بالإحساس ده بس الحمد لله، ربنا كان حاضني جدا واداني إشارات كتير قوي تبرد قلبي، وأنا الحمد لله جريت ع الكعبة عشان أبرد قلبي وعملت عمرة لأمي، وهديت خالص وقلت إنا لله وإنا إليه راجعون، ده عمرها وانتهى لحد هنا".
وأشارت مي إلى تعرضها أمس لموقف، جعلها تعيش أسود أيام حياتها، موضحة "إمبارح كنت شايلة فريدة مشيت بيها بالظبط متر من الريسيبشن للجنينة، كنت عاوزه اقعدها في الشمس راحت ايد الكرسي مفكوكة، ووقعت ع الأرض عشت أسود يوم في حياتي، كنت حاسة كأني مجرمة مذنبة، قلبي مش قادرة أوصف عامل إزاي، عينيا ما بتنشفش من الدموع عندها كسر في عضمة الترقوة، يا قلب أمك".
وتابعت مي "طب دي هتستحمل غزاي هانام إزاي الليل هيعدي علينا إزاي بس الف حمد وشكر لله، عدى الليل وربنا رحمته واسعة الحمد لله قل لن يصيبنا إلا ما كتب الله لنا، ربنا يحفظ أولادنا، الضنا غالي قوي، الله يرحمك يا أمي ربنا يقوي كل الأمهات والابهات على تربيه ولادهم والحفاظ عليهم ربنا يقدرني ويحفظلي بنتي ويخفف عنها الألم بصتلي بصة إمبارح بالدنيا كلها، كأنها بتتكلم وبتقول لا يا ماما ما تعيطيش أنا هبقي كويسة، ربنا يحفظك يا نور عين ماما ربنا يرزق كل مشتاق".
يُذكر أن مي كساب أنجبت طفلتها فريدة منذ ثلاثة شهور تقريبا.