عايزة جوزي يحس بيّ من غير كلام

أنا عندي مشكلة ممكن تظهر في البداية إنها بسيطة بس أنا تعبانة منها أوي.. أنا متزوجة، ومنذ فترة كتب الكتاب وأنا متعلقة بزوجي جدا، مش حب امتلاك بس حب كده زي ما الأم بتخاف على ابنها، أنا مش باعامله زي أمه، هو حاجة زي ما ربنا وصفها "مودة ورحمة".
لو في يوم المودة قلِّت بينا نتيجة لعصبيته باحس بالرحمة في قلبي تجاهه، بس المشكلة هنا إنه لما بيتعصب أوي أو يعمل حاجة تغضبني أنا بازعل جدا وباتأثر، وتكون مصيبتي أعظم عندما يترك البيت ويبات بره.. باحس بوحدة وجرح عميق.
أنا عارفة إنه من حقه إنه يختلي بنفسه، بس أنا شايفة إنه ما دام اللي حصل بينا مافيهوش تجريح أو غلط ومجرد مشادة كلامية فليه البعد ده، حتى ربنا أمر بالهجر للمرأة الناشز وليس لأي امرأة على حد فهمي.
في بعض الأحيان باقول يا ريت اللي في قلبي تجاهه يقل شوية؛ علشان مازعلش كده وأقدر أعيش، وأعاهد نفسي إني هاحاول أقلل رصيده في قلبي بس مش باقدر، أنا حتى لما كنت باشتغل كنت على نفس الحال يعني الموضوع مش فراغ.
أعمل إيه علشان أقدر أوازن بين حياتي وما في قلبي؟ أنا عارفة إنه مش حاسس بحاجات كتير، ومع الأسف المشاعر من النوع ده ماينفعش تتقال لازم تتحس.

shymaa


أولا مشكلتك مش بسيطة؛ دي المشكلة الأبدية اللي ما بين حواء وآدم، وهي اختلاف الطبيعة بينهم في الميول والاهتمامات، وسبحان الله اللي خلق الاختلاف بالشكل ده علشان نكمل بعض ونعمر الكون.
في الأول لازم نرسخ فكرة إن الاختلاف ما بينك وبين جوزك طبيعي.. ومعناه الوحيد إن الرجل بيفكر بطريقة مختلفة عن الست، ومالهوش أي معنى تاني أو أسباب شخصية تتعلق بيكي، يعني هو بيحبك وقريب منك لكن ربنا خلقه كده بيعبر عن حبه وغضبه وكل انفعالاته بطريقة مختلفة عنك، وكل اللي عليكي إنك تستوعبيها وتتعودي عليها وتفهميها صح.
تاني حاجة مشكلة إنه بيبات بره.. ساعات في حالة حدوث مشكلات وقد إيه بتضايقك، ممكن تكلميه فيه وتشرحي له مشاعرك في وقت ماتكونيش مضايقة فيه، وتطلبي منه مثلا أنكم تتعاهدوا إنه مهما زعلتوا من بعض ماينفعش تباتوا متخاصمين، ولازم حد يروح يصالح التاني، أو تخصصوا أوضة في البيت واللي يزعل يقعد فيها شوية لحد ما يهدأ؛ لكن ما يسبش البيت ويخرج وكمان يبات بره.
تالت حاجة إنتي مش محتاجة اللي في قلبك يقل تجاهه.. إنتي محتاجة تشغلي عقلك مع قلبك؛ علشان تعرفي توازني بين قلبك وحياتك زي ما إنتي عايزة، وتفكري لو هو مش حاسس بحاجات كتير زي ما بتقولي إزاي تخليه يحس بيها.
وما تحطيش قواعد لنفسك تدمر حياتك، زي فكرة "المشاعر من النوع ده ماينفعش تتقال لازم تتحس"، ممكن أسألك ليه ما ينفعش تتقال؟؟؟ وليه لازم تتحس؟!
واحدة من النصايح الذهبية اللي قالتها لي صديقة في أول جوازي إن "الرجل مش زينا، مش هيفهمها وهي طايرة ويعرف إنتي محتاجة إيه".. ماتقعديش تبصي له وتبصي لكوباية الميه وتتخيلي إنه هيديها لك ويقول لك "إنتي عطشانة يا حبيبتي".
إحنا ربنا حط فينا الموهبة دي؛ لأننا هنبقى أمهات وهنتعامل مع أطفال مش بيقدروا يعبروا عن احتياجاتهم؛ لكن لو عايزة من جوزك كوباية ميه قولي له.
الخلاصة اطلبي من جوزك بشكل مباشر اللي إنتي نفسك فيه، مش عيب صدقيني بالعكس هو هيرتاح وإنتي هترتاحي وهتقدروا تتفاهموا أكتر، وحاولي بعدها تفوتي الحاجات اللي هتقع في السكة.
آخر نصيحة اقري كتاب "الرجال من المريخ والنساء من الزهرة "؛ هتلاقي منه نسخ إلكترونية كتيرة على الإنترنت، هيغير حياتك وهيخليكي تفهمي طبيعتك وطبيعة جوزك أكتر وتوازني ما بينهم.

لو عايز تفضفض لنا دوس هنا