فيروس.... دوده.... حصان.... إزعاج.. فاهم حاجة؟!

نظرًا للأعداد المهولة للكمبيوترات اللي بتصاب بشلل، لسبب أو لآخر، كل يوم، لدرجة إن إحنا بقينا زباين مقيمين عند مهندسي الكمبيوترات، كان لازم أشرح معلومات عامة وبسيطة عن اللي بيحصل، عشان مش كل ما تروح لواحد بتاع كمبيوتر، يعمل "الشاطر حسن" عليك!
بص يا باشا...
زماااااااااااااان كان فيه برامج بتصيب الكمبيوتر بشلل،عن طريق فيروسات أساس عملها التكاثر بشكل رهيب جدًا، وعمل شلل لجهاز الكمبيوتر -نفس مبدأ الفيروسات الحقيقية- اسمها فيروسات وبتتخذ أشكال وأنواع مختلفة.
ومع التطورات الأمنية المختلفة على الانترنت، بدأت تطورات جديدة برضه في تصنيع الفيروسات، بدأ تصميمها على أشكال وآليات تانية، وبأهداف غريبة (وأحيانًا من غير هدف خالص!) ومش هنتكلم عن وسائل انتقال البرامج دي، لأن معظم الناس عارفاها، لكن هنتكلم عن التصنيف الحالي للبرامج دي، عشان تبقى فاهم، مش حافظ:
أولا: الفيروسات Viruses:
وهي برامج ملهاش أي هدف، غير تدمير الكمبيوتر... مش عايزة منك حاجة تانية!
بعض الفيروسات الجديدة، هدفها إحداث ثغرات في دفاعاتك الأمنية، عشان حرامية البيانات يعرفوا يدخلوا الكمبيوترات المحمية، Hacking يعني، أو حتى يكسروا البرامج المحمية بما يسمى بعمليه الشرخ Cracking
ثانيًا: الديدان Worms:
ودي برامج برضه ملهاش أي لازمة، غير إنها تدمر جهازك، لكن بشكل تاني... دي بتشتغل في الخباثة.. وبتدخل الكمبيوتر عندك غالبًا من ثغرة أمنية (زي سلوك الدودة الطبيعي) وتبتدي تتكاثر وتضرب ملفات كتير أوي، وفي النهاية، الكمبيوتر بجي له شلل (طبعا خلال الوقت ده ممكن تتنقل الدودة من الكمبيوتر بتاعك لكمبيوتر تاني برضه عن طريق ثغرات أمنية أخرى)
الفرق بين الديدان والفيروسات في أسلوب الدخول فقط.
ثالثًا: حصان الطروادة (AKA: Spy ware) Trojan Horse:
ودا بقى الله يسلمك... ملف جوا ملف... يعني صورة أو لعبة أو أي حاجة.... جواها ملف تاني اسمه Server وده يا باشا وظيفته حاجة من اتنين... يا يعمل ثغرات أمنيه في الجهاز، فيجي واحد حرامي يسرق صورك وصور العيلة ويبتزك بيهم، (أو بيانات شخصية زي كرت بنك أو رقم حساب أو إيميل أو أي حاجة شخصية)... أو إنه يسجل محادثاتك كلها صوت وصورة، ويبعتها لنفس الحرامي... يعني كأنه بيسرق الكمبيوتر بتاع سعادتك، وهو على مكتبك، وبيشوف كل حاجة إنت بتعملها، وأحيانا بتوصل لدرجة إنه بيقدر يشغل الكاميرا والمايك ويسمعك !
((في حالة تعرضك للنوع ده.. اتصل بوزارة الداخلية التي خصصت رقم الهاتف 0227921487 للإبلاغ عن الجرائم الإلكترونية المماثلة)
رابعًا: برامج المضايقة Malware:
دي برامج واضح من اسمها... مبتعملش حاجة غير إنها تضايق سعادتك... تقفل الكمبيوتر.. تقفل الشاشة... تقفل الكيبورد... تشيل الماوس.. تفتح السي دي روم... البعيد رخم أوي يعني!
خامسًا: برامج الإعلانات Adware:
دي برامج المفروض تُصنف تحت بند البرامج السابقة (المضايقة) إلا أنها – إلى حد ما- يمكن السيطرة عليها، وكل هدفها أن تعرض عليك إعلانات بشكل رخم، كل شوية، متوافقة مع المواقع اللي سعادتك بتزورها... يعني لو مواقع موبايلات هيطلعلك مواقع إرسال رسائل أو مسجات أو نغمات.. وكده.
سادسا: Cookies:
دي ملفات صغيرة جدًا... مش مضرة في الغالب (وأنا بقول في الغالب يعني 98%) بتحتوي على ملفات المواقع اللي سعادتك زرتها مسبقًا (إيميل أو باسوورد أو يوزر نيم... بس طبعًا مشفرين بخوارزمية البصمة الإلكترونية MD5.... حوار كبير متاخدش بالك منه).
سابعًا وثامنًا وتاسعًا: طبعًا ولإننا في عصر الانفتاح... فالتقسيمة السابقة مبقاش لها أي لازمة... يعني الفيروس تلاقيه بيشتغل زي الدودة عشان يسرق بياناتك، ويرخم عليك، ويطلع لك إعلان قبل ما يدمر الجهاز... وبوم!!
مش دايمًا الحل إنك تعمل فورمات..ومش دايمًا لما الكمبيوتر يضربه فيروس أو أي برنامج سيء يبقى لاااااازم تطير كل الداتا اللي عليه...
كل حالة وليها تعامل خاص هشرحه في المقال القادم إن شاء الله..