طريقك إلى هارد أنضف من الصيني بعد غسيله

إتكلمنا عن الفيروسات اللي بتهاجم الكمبيوترات بشكل مريع , وقولنا إن الحل مش دايما إنك تعمل فورمات .. ومش لازم تطير كل الداتا اللى على جهازك.. كل حاجه وليها تعامل خاص هنشرحه فى السطرين اللى جايين بس ركز إنت معايا شوية.
أولاً: الوقاية خير من العلاج:
قاعدة لازم تعرفها كويس.. مش كل الفيروسات مسالمة.. وفيه أنواع منها ممكن تضرب الهارد ديسك نفسه، عن طريق اللعب في الكهربا اللي داخله له، أو في حركة الإبرة داخل الهارد... أو أي حاجة هارد وير... بالعربي.. ممكن الفيروس ده يخلي الكمبيوتر بتاع سعادتك ما يسواش تلاتة مليم!
بس الحمد لله حاليًا ونظرًا لانتشار موضة الهاكر، وكل واحد اتعلم له لغة برمجة افتكر نفسه بيل جيتس... فالفيروسات اللي ملهاش لازمة كترت أوي، وبقى تأثيرها ضعيف، وغالبًا أي برنامج مكافح فيروسات بيطيرها بسهولة!
يبقى وقائيًا ممنوع تحمل أي ملف من أي موقع متعرفهوش، وخصوصًا الملفات اللي نهايتهاcom وexe وbat.
ثانيًا: حذّر ولا تخوّن:
إذا كنت من هواة الماسنجر، فيبقى لازم أي ملف تستقبله، تعمل عليه Scan بمكافح فيروسات محترم... مع الأخذ في الاعتبار طبعًا، الامتناع عن استقبال أي ملف من أي حد متعرفهوش.
ثالثًا: برنامج حماية محترم دائم في الجهاز عندك:
و دائمًا لازم يكون نسخة أصلية... معلش أنا عارف إنه أحيانًا بيبقى غالي... بس الغالي تمنه فيه، 150 جنيه أحسن من إنك تخسر الكمبيوتر كله، أو جزء منه، أو الملفات المهمة اللي عليه، وبالنسبة لأنواع برامج المكافحة، فهي مختلفة، وعندك مثلاً:
(Antivirus) وده مضاد للفيروسات والديدان.
(Anti-spyware) وده مكافح برامج التجسس.
(Anti-malware)وده مضاد للبرامج الرخمة.
وفيه (Total Security) وده غالبًا يبقى فيه كل الخدمات السابقة... وبيوفر حماية من كل حاجة،
بالنسبة لشركات الحماية، فمختلفة برده في الخدمات اللي بتقدمها، أو قوة المكافحة وأسلوبها وسرعة البرنامج على الجهاز أو حتى سعر البرنامج،
عندك شركات زي Norton MacAfee NOD32 AntiVir Sophos AVG Kaspersky
طيب إذا لقيت فيروس أو خلافه على الجهاز عندك إزاي ممكن تشيله؟؟
بعد ما تنزل برنامج (واحد بس) من برامج الحماية على الجهاز عندك، وتعمل له Update، ثم تعمل Full Scan، هيطلع لك الفيروسات اللي في الجهاز (لو فيه)، تاخد أسماء الفيروسات دي (أو البرامج المزعجة) وتعمل عليها بحث في قاعدة بيانات الموقع بتاع البرنامج المكافح اللي عندك، أو حتى على الجوجل، هتعرف الفيروس ده إيه، وبيعمل إيه وإزاي، وأحيانًا ممكن تلاقي طريقه إزالة الفيروس بشكل يدوي (لا أنصح بإزالته بشكل يدوي للمبتدئين)، بعد كده، زي الشاطر تعمل Restart أو إعادة تشغيل للكمبيوتر عندك، وتضغط على F8 بسرعة جدًا عشان تدخل في Safe Mode، طبعا الموضوع ده بيختلف من كمبيوتر لتاني، لكن في الغالب هنجرب F8 أو F12 أو جربهم كلهم، لحد ما يشتغل واحد منهم... وتدخل في الوضع الآمن.
تشغل الانتي فيروس تاني وتعمل Full Computer Scan وأي فيروس موجود إن شاء الله هيتشال بسهولة جدًا في الوضع ده، من غير ما يدخله في الحجر الصحي Quarantine ،
وكده إن شاء الله يكون الكمبيوتر بقى أنضف من الصيني بعد غسيله!
فيه نقطه مهمة لازم تعرفها!!!
أحيانًا تكون محظوظ جدًا (زي حالاتي) ويضرب الكمبيوتر عندك فيروس قديم أوي... أو جديد أوي... وغالبًا الحمايات بتاعته مش بتكون موجودة... غالبًا ملكش حل غير إنك تنتظر وتقتل الإنترنت بحثًا عن كل ما يتعلق بهذا الفيروس وتشيله بشكل يدوي.....أو.... فرمت الجهاز وأمرك لله!
بالنسبة للبيانات المهمة دي لازم تشيلها بملقاط... يعني هتنسخها على أسطوانات (إياك تنسخها على فلاش ميموري)... وبعد كده تاخد الأسطوانات دي على كمبيوتر يكون محمي كويس، وتعمل عليها Scan... وتشوف لو فيها فيروسات ولا لأ... وغالبا هيبقى لأ (95%).
أخيرًا عايز أقول حاجة... إن معرفة أساليب الخصم مهمة جدًا... عمر ما الرعب خلق قوة أو أدى إلى الأمان... وبالعلم ممكن تعمل أي حاجة ومتخافش من أي حاجة.
المعلومات السابقة مبسطة جدًا... وقد لا تؤدي لحل كل المشكلات الطارئة... لذا فيجب عيك الاستعانة بخبير كلما دعت الحاجة.