نعيد نشر " والحرب لسه في أول السكه" بمناسبة ذكرى العاشر من رمضان وانتصارات حرب اكتوبر

زين العابدين فؤاد ل "الوادى" : قمت بإملاء القصيدة عبر تليفون قائد الوحدة لكى تنشر فى جريدة الجمهورية
قال الشاعر زين العابدين ان ظروف ميلاد قصيدة " والحرب لسه فى اول السكه" فريدة لأنى قمت بكتابتها يوم 7 اكتوبر عام 1973 و انا عسكرى فى القوات المسلحة اثناء انتصارات حرب اكتوبر والعاشر من رمضان.
واضاف فى تصريحات ل "الوادى" اتذكر اننى قمت بإملائها عبر تليفون قائد الوحدة اينذاك كنا نقول له عميد خيرى وكان هذا العميد ينادينى أمام الجميع بالاستاذ زين لانه كان يحب الشعر والأدب وهوه اول من قام بإعطائى القصيدة وهى منشورة فى جريدة الجمهورية يوم 8 أكتوبر.
نشرت القصيدة ولحنها وغناها الشيخ امام وعدلي فخري واحمد الشابوري.
الفلاحين بيغيروا الكتان، بالكاكي
ويغيروا الكاكي بتوب الدم
وبيزرعوك يا قطن، ويا السناكي
وبيزرعوك يا قمح،سارية علم
وبيدخلوكي يا حرب ، فحم الحريقه
وبيزرعوكي يا مصر، شمس الحقيقه
وانتي ميدان الحرب
سينا البدايه
وانتي جنينة الصلب
والنصر ، رايه
وانتي البكا والغلب
انتي الرحايه
وانتي البارود والحب
والحرب جايه
غنوا التلامذه الصبح
للحريه
الفلاحين، ضموا غيطان القمح
رفعوا الرايات، في الفجر، متنديه
رفعوا السنابل، بنادق
عبوا البنادق ، بارود
الرمله قادت حرايق
والنار، في دم الجنود
والحرب : زي جناين الحرية
مهره، ومالهاش حدود
والحرب،
لسه ، في اول السكه
اتفجري يا مصر
اتفجري بالحرب، ينطلق النهار
اتفجري بالحرب
ضد الجوع، وضد القهر
ضد التتار
واتسلحي للحرب، بالحريه
واتفتحي، ورده : بدم ونار
واتجمعي من الف صرخه وضحكه
والحرب لسه ،
في اول السكه
8 اكتوبر 1973