باسم يوسف: "الكلام ده غلط وبيجرنا لطريق مسدودة"

نشر باسم يوسف الإعلامي الساخر، منشورًا مطولًا عبر مواقع التواصل الاجتماعي "فيس بوك" أعرب خلاله عن انزعاجه من التراشق الذي يحدث عبر منصات "السوشيال ميديا"، موضحًا أنها في بعض الأحيان لا تمنح الفرصة الكافية ل"وزن الكلام".
وجاء نص المنشور كما يلي: "للاسف السوشيال ميديا ساعات مش بتدي اَي فرصة لناس انهم يوزنوا الكلام بطريقة علمية صح. الموضوع بيقلب تراشق و مين علم على مين و انا شايف ان ده غلط جدا و بيجرنا لطرق مسدودة. انا حاولت على قد ما اقدر اني أدي فرص نقاش لكن الموضوع بيقلب بتهكم و استهزاء و محاولة من "الحط عليك". و في الاخر الناس بتسيب الكلام الأصلي و بتبقى حرب تعليقات بصوا يا جماعة . النظام ده ساعد آلاف بل و الملايين اللي تخلصوا من أمراض مزمنة و كان الكلام اللي بيتقالهم انه مافيش غير الأدوية . الحلقات و الموقع مليان كلام من ناس دكاترة مش مجرد خبراء تغذية. البوست اللي فات انا حطيت لينك بصفحة فيها مئات من الأبحاث العلمية الموثقة مش مجرد مقالة على الانترنت".
وتابع: "الشغل اللي احنا بنعمله في الحلقات اخد و لسه بياخد جزء كبير جدا من شغلنا . فعلا فعلا فعلا احنا ما عندناش وقت نتخانق في التعليقات . و اذا شايف ان ده انسحاب ، يبقى انك تتبع نفس فكر السوشيال ميديا بتاع مين حط على مين. نصيحتي للناس ؛ اقروا و فكروا و شوفوا المصادر اللي احنا حطينها. اقروها كويس و شوفوا الأوراق العلمية اللي احنا حطينها".
وأكمل: "الفيديو الجاي مش حلقة . حيكون عن ازاي تستخدم الموقع عشان تقدر تهضم المعلومات بشكل أفضل . الناس بتتوه ما بين الفيديوهات و التعليقات . و عشان كده حندي فرصة للناس انها تشوف و تدرس في وقت اكتر . اللي عايز يعمل مجد عشان حط على فلان او اتعمله بلوك من صفحة ، جود لاك، اذا كانت دي حياتك و اللي انت عايش عشانها ربنا يوفقك. احنا ما عندناش وقت للكلام ده. و بصراحة انا مبسوط جدا من رد فعل الناس . ناس انضمت للتحدي في آيام قليلة . اكتر من 30 الف واحد . و ناس بتبعت و تقول قد ايه فرق معاهم. و برضة لو عايز تقول اللحوم احسن حاجة ؟ بالهنا و الشفا".