كلام مسئول

محمد صلاح: يا مساء الخير ايه اللي حصل للمصرين او ربما ماذا دهاهم تغييرات لا اول لها ولا أخر نشعر بها ونراها ونعيشها احيانا بنجد انفسنا مجبرين ان احنا نكون جزء منها ايه اللي حصل للشخصيه المصرية لو وقفنا في الشارع هنلقى شلال هادر من الناس كاننا في الليلة الكبيرة في الليل بلد لا تنام في النهار ماليين الشوارع يابا م الريف والبنادر محدش بيروح الشغل طبعا مش كلهم بيعانوا من البطالة .. البطالة نسبتها السنادي 9.4 % وبيقول الجهاز المركزي للاحصاء ان عدد العاطلين 2 مليون و340 الف من اجمالي القوى العاملة في مصر اللي هي 25 مليون مواطن يبقى المفروض بقى الناس في شغلها في جامعاتها في مدارسها في مصانعها في غيطانها في الدواوين تروح مستشفى الدنيا زحمة عيادة ساعتين على ما يشوفك دكتور المدرسة متكدسة على الاخر نوادي مش عايزة اعضاء من كتر اللي فيها ومهما ترفع من اسعار الاشتراكات المتقدمين أمم مترو مواصلات زحمة ارصفة مليانة باعة جائلين اكتر من الناس اللي واقفة تشتري اشارات المرور بتفتح أحد واربعاء فيه اشارات كده انت وحظك ممكن تبقى 3 ايام في الاسبوع سبت واتنين واربع يعني انت وحظك بقى اليوم كله ساعة ذروة مرورية ضوضاء تلوث عدم احترام اشارات المرور والمشي بقى في الحارات غرز بقى وفتحة صدر والتوك توك طبعا الزحمة بتخلق ثقافة وسلوك وطرق تعامل اقل ما فيها الرحمة واكتر ما فيها القسوة والنظر شذرا وبعدين بعد فوضى الشارع العناوين كتيرة بقى مرض عالمي زي انفلونزا الخنازير حب البعض يحول مواجهته الى قضية طائفية ارتفاع معدلات الطلاق في السنين الاولى من الزواج البعض يذهب للماذون كذا مرة ، هل اصبح المجتمع مهدد بالتحلل والتفسخ بعد ما كانت الاسرة المصرية عند المصري هي الوطن الصغير ايه اللي حصل للشخصية المصرية ورجال الاعمال ما بقوش يزكوا ولا يدفعوا صدقات دي حاجة بينهم وبين ربنا لكن الاستفزاز في بلد فقير كارت لان الناس ممكن تفقد الثقة في رجال الاعمال وشفنا تعليق الرئيس مبارك وانتقاده لسلوكيات بعضهم في موضوع الثقة كمان موضوع الثقة بين المواطن والحكومة محدش عايز يسيب مكان سواء معطل بنى كوبري او المكان دا طلع عشوائي حتى لو وعدته الحكومة انها هتعوضه عشان كده سوق الخضار في روض الفرج اتنقل بعد 7 سنين في المحاكم .وكالة البلح محدش قادر ينقلها اماكن تربية الخنازير طلع قرار بنقلها من سنة 99 والحكومة مقدرتش تنفذ ده بيبرجل الراي العام قرار منع المقطورات السواقين بقى واصحاب المقطورات ما يرضوش احتجوا في يوم حصل فيه ان مقطورة قتلت اسرة بكاملها تزايد العنف التوتر الطائفي عند اول ناصية تزايد الاحتجاجات والاضرابات عَمال على بطال اعلانات الشوارع وتشويهها للعمارات والكباري بهدلة من يتصدر للعمل العام في مصر عشنا فترة طويلة في مشكلة شنطة الاسعاف والعاكس استنفدتنا مناقشات ناس اشترت وناس طلعت اشاعات ثم جاء قرار توزيعهم مجانا طب ما كان من الاول ، النضافة ..النضافة بقى اللي لو حسبناها كويس وقلنا بقى انها من الايمان هنطلع ماعندناش ايمان خالص التحرش الجنسي احتشاد الكل ورا اول قضية تحرش جنسي ثم نجد من يدافع عن المتحرش .. المواطن اتغير ،طموحاته ، سلم قيمه ، قدوته ، تطلعاته هل ما بقاش هو المواطن بتاع الاربعينات ولا الستينات حتى بتاع التسعينات هل أي تغيير لازم يبقى سلبي ويعيشنا في حنين لزمان ولا ممكن يبقى فيه ايجابيات احنا مش شايفينها ايه اسباب التغيير .. الهجرة والعمل في الخارج واكتساب عادات غير مصرية ، الحراك السياسي صاحبه حراك اجتماعي ، الازمة المالية العالمية ، التعليم ، زيادة السكان ، الفضائيات ، التغيرات والتحولات في الشارع المصري محتاجة مجلدات علشان نقدر نرصدها او كونسلتو عشان نقدر نعالجها ايه اللي جراى لنا دا اللي جرى لنا ما كان على بالنا احنا المصريين مكناش كده اللي حصل للشخصية المصرية هيكون لينا عنه النهاردة كلام ...... مسئول
فاصل
محمد صلاح: لكل مجتمع همومه ومشاكله اللي بتتلون او بتاخد صبغة خاصة بناسه ربما احنا في مصر لينا خصوصية اكتر شوية اعترف بيها التاريخ وكنوز الحضارة الباقية من كل العصور اللي مرينا بيها يمكن دا اللي خلى عالم كبير زي جمال حمدان يكتب "عبقرية المكان" ..لكن المصري الحديث اتغير في الكام سنة اللي فاتوا اتقلب سلم القيم كذا مرة حدث تطور اقتصادي وسياسي او حراك زي ما كتير بيفضلوا يقولوا الكلمة لكن المظاهر السلبية اللي في المسالة واللي نفسنا تختفي محدش عارف مصدرها ايه سببها ايه حصلت ازاي رايحة فين هو احنا كنا كده ومش واخدين بالنا ولا اتغيرنا ومش عارفين والسكينة سرقانا الشخصية المصرية الان نظرة منها وعليها هيكون لينا حواليها النهاردة مع المفكر استاذ علم النفس الدكتور قدري حفني كلام ....... مسئول
ومن كلام الدكتور قدري حفني "المصريون باتوا جاهزين للاقتتال لاي اسباب حتى لو كانت واهية" ، "الخطاب السياسي المتبادل على الساحة المصرية يمكن وصفه بانه ديماجوجي فهو منقسم الى تيار يقول ان النظام في مصر لم يخطئ ابدا وتيار اخر يصر على ان النظام لم يصب ابدا الواقع المصري يؤكد على ان النظام المصري اخطأ واصاب وان كان صوابه اكتر من خطئه" ، "لا اخاف من رجال الاعمال الان مصالحهم واضحة يمكن التعامل معها وضبطها اما ما يخيفني فعلا هو الفاسد الذي ليس له مصالح مرئية او هؤلاء المرتشون الذين يقومون بتهريب اموال البنوك بينما ليس لهم ممتلكات على ارض مصر هؤلاء يثيرون مخاوفي اكثر" ، "اسباب متعددة لظاهرة التحرش الجنسي ومن بينها اسباب تتعلق بالفقر وتدهور القيم الدينية وانتشار القنوات الاباحية والملابس الفاضحة وعدم كفاية العقوبة وربط الامر بالخطاب الديني وحده يحمل تضييقا للموضوع وتحميلا للخطاب الديني بما لا يحتمل" "انماط العقاب تختلف باختلاف الافراد لكنها بشكل عام لابد ان لا تكون مؤلمة ولنعلم اننا نعاقب الاعمال وليس الابناء فالهدف من العقاب هو النهي عن السلوك الخطأ وتعديل هذا السلوك عن طريق الثواب والعقاب" الشخصية المصرية في الشارع .. في البيت مع الجيران .. داخل الاسرة الواحدة الظواهر الجديدة اللي طرات عليها سلوكها ، تعبيرها عن نفسها ، تطلعاتها واحلامها ، صحتها واوجاعها ، الطابع اللي فيها والتطبع اللي بقت عليه ، البنا اللي بتشيده لنفسها او الهدم المنظم لكل اللي بنته ، رؤيتها الاوسع والاشمل او دفنها لراسها في الرملة وفهمها العميق لذاتها وتاريخها او التكالة بالوكالة فسيفساء الحالة المصرية هيكون لينا عنها مع المفكر الدكتور قدري حفني استاذ علم النفس كلام ...... مسئول
فاصل
محمد صلاح: أرحب بالدكتور قدري حفني المفكر واستاذ علم النفس الشخصية المصرية لو حبينا نرسم معاك ملامحها يعني على وزن كانت واصبحت اول خط هيكون فين ؟
د/ قدري حفني: اول خط في رايي النقطة الفارقة يعني فيه عناصر بتبقى ثابتة في الشخصية والشخصية بتتغير لو ركزنا على الحاضر بس مش هنفهم حاجة ولو ركزنا على الماضي بس مش هنفهم حاجة ..نرصد امتى حصل التغير انا بتصور ان الشخصية المصرية حدث تغير هام فيها مع نكسة 67 يعني من هنا نبدا وليه انا بختار النكسة بالذات ما نختار أي حاجة تانية كل حاجة لان النكسة تركت بصماتها على كل المصريين مش عايز ابالغ واقول على كل العرب وأنها كانت عميقة في الجذور وما ترتب عليها غير رؤية المصريين للعالم ورؤية المصريين نفسهم
محمد صلاح: طب خلينا نتكلم على بعض الظواهر يعني مثلا الزحمة المطرب احمد عدوية غنى في السبعينات زحمة يادنيا زحمة كنا في السبعينات نص تقريبا عددنا دلوقت يعني احنا كنا في زحمة على طول ولا زحمة عن زحمة تفرق
د/ قدري حفني: ما هو الزحمة دي نسبية والزحمة لوحدها ماتفسرش السلوك يعني ممكن الزحمة تخلي الناس اكتر حميمية مع بعض فيه فرق بين الزحمة اللي بتعمل ونسة والزحمة اللي بتعمل عنف واحنا بنشوف بلاد زحمة اكثر مننا طوكيو اكتر من القاهرة دا لكن منظمة هي المسالة مش ان الزحمة في حد ذاتها تترك اثر على الشخصية بشكل مباشر احنا موقفنا ايه من الزحمة
محمد صلاح: الزحمة بتتسبب في بعض الظواهر الاخرى يعني بنظرة بسيطة هنلاقي انه الزحمة في مصر خلت الناس اكثر كآبة اكثر حدة اكثر عنفا رايحين على فين في القصة دي ؟
د/ قدري حفني: لا انا بتصور هنا لما تتكلم عن العنف والاكتئاب والتوتر لو حطينا دا كله على شماعة الزحمة نبقى احنا مش عايزين نشوف السبب لان ممكن تبقى الدنيا زحمة والناس مستحملة بعضها والاتوبيسات بتبقى زحمة طول عمرها وفيه كتير كلمة لو سمحت انا اسف سامحني غصب عني من فضلك والدنيا زحمة انا مش هقول لحد سامحني من فضلك الا لو كانت الدنيا زحمة وفيه الزحمة اللي ممكن تخلي الواحد يبقى عنيف فانا في تصوري ان في كثير من الاحيان بندور على شماعة نقول السبب هي الزحمة
محمد صلاح: مفيش ثقافة للزحمة او خلقت ثقافة جديدة عند الناس ؟
د/ قدري حفني: الزحمة بتخلق ثقافتين ممكن الزحمة بتخلق ثقافة التحدي ان احنا عايزين نحل المشكلة وممكن تخلق ثقافة العنف لو فيه عوامل تانية وعشان كده انا رايي ان الموقف من الزحمة مش الزحمة في حد ذاتها
محمد صلاح: نتكلم في الموقف في الزحمة
د/ قدري حفني: الموقف من الزحمة هيخلينا نرجع لموضوع الانسان من الداخل يعني بنتكلم كتير عن ان الناس مش طايقة بعضها حتى من غير زحمة واللي قاعد لوحده زهقان والفقير زهقان والغني زهقان الناس زهقانة ..من ايه..؟ عادة الزهق والضيق وان الواحد مش مستحمل حاجة بيرتكز على اساس نفسي انه الانسان حاسس انه ماقداموش افق ماقداموش مستقبل هو شايفه لكن لو كان القدرة على التوقع موجودة مانيش عارف ايه اللي يحصل لانه متوتر
محمد صلاح: هذا التوتر الزحمة مش المفروض انها تنقل الامراض الطبيعية يعني عنده انفلونزا ما يقعدش في زحمة عشان ما يعديش الاخرين الفيروس بتنقل عبر الزحمة والميكروبات لو شخص زي ما حضرتك بتتكلم كده عايش حالة احباط ومش شايف ضوء في نهاية نفق مرتبك حزين هذا الزحام الرهيب اللي احنا عايشينه في كل مكان مش ممكن ايضا انه ينقل مرضه النفسي او مرضه العقلي او مرضه الذاتي للاخرين في ظل هذا الزحام
د/ قدري حفني: اه طبعا لو الزحمة فيها تواصل المصريين في الزحمة بيتواصلوا الأوربيين في الزحمة لا يواصلوا كل واحد بيقعد يقرا الجرنان التواصل دا معدي ما هو انا لما اقعد معى ناس وكلهم يقولوا ياااه دي الدنيا رايحة في داهية دا مفيش فايدة دي مصيبة تقيلة يعني هابقى انا لوحدي اللي اقول لا فيه.. دي طبيعة الزحمة المصرية ان زحمة وفيها تواصل التواصل ممكن يكون ايجابي وممكن يكون سلبي لكن فيه تواصل يعني لسه المصريين بيتكلموا مع بعض ودي حاجة كويسة
محمد صلاح: في زمان اتاخد عننا انطباع في المنطقة العربية والشرق الاوسط ويمكن حتى اقليما وعالميا ان احنا زي ما بيقولوا شعب ابن نكتة النكتة اختفت مابقتش موجودة زي زمان انت شايف كده ولا عندك تحليل اخر
د/ قدري حفني: لا والله انا شايف ان النكتة مازالت موجودة ومازال على النت في الايميلات بتيجي للواحد نكت و..و.. الى اخره
محمد صلاح: نكتة دلوقت زي نكتة زمان اسبابها نفس الاسباب
د/ قدري حفني: لا فيه نكت قلت ليه..؟ هي النكتة عبارة عن عدوان ولذلك اغلب النكت بتبقى متجهة للسلطة اكتر شخصيات بتحوز على اكبر قدر من النكت المدرسين رجال الدين الحكام طبعا كل الناس بتنكت على بعضها لكن دي هي النكت الكتير عادة لما يكون فيه مناخ مسموح فيه بالهجوم على الحكام بتقل النكت على الحكام هانكت ليه ما انا باهاجمهم كل ما المجتمع كان فيه حظر للنقد تنتشر النكتة
محمد صلاح: النكتة تنفيس عن حالة او زي ما بتسميها عدوان او رد فعل للمواطن في مجتمع ما انما النكتة اللي بتعبر مش عدوان لمجرد اللي فيها افيه عالي اللي فيها تناقض قاعد يفكر عشان يضحك حد وما بيصدق حد يسمعها ويروح ينقلها لمجرد انه يشوفه بيضحك
د/ قدري حفني: لا ما اشوفه بيضحك على ايه لما نشوف واحد ماشي واتزحلق موقف يثير الضحك ماساة حصلت له الموقف فدا موقف غير متوقع ولما بضحك انا بعبر عن aggression النكتة فيها تعبير عن العدوان ازاي عدوان مسموح به يعني لما انا حد يقول نكتة على حد فالتاني يزعل يقوله يا اخي انا بنكت خليك بحبوح لكن لو انا قلت له انا قاصدها تبقى خناقة وهنا الفرق بين النكتة و بين العدوان الصريح لكن انطباعي انه كل الشعوب بتنكت
محمد صلاح: يا دكتور قدري كان فيه اخوة عرب لما ييجوا مصر كانوا يشوفوا المصريين ربما في ضائقة اقتصادية مشاكل اجتماعية كانوا بيحسدونا يقولوا انتوا عندكوا مشاكل اقتصادية عندكوا مشاكل حياتية ومع ذلك بتنكتوا وبتضحكوا احنا عندنا فلوس واثرياء واغنيا ومكتئبين
د/ قدري حفني: ما انا اقول لحضرتك على حاجة مسالة الثراء وعلاقته بالاكتئاب مفيش علاقة مباشرة يعني لكن المرح مرتبط بالنظر الى المستقبل ودي يمكن التناقض مع الكلام اللي قلناه من شوية الناس الناس مش طايقة نفسها لكن مع ذلك الناس بتضحك هنا الموقف من الحياة بيختلف تجد المصري يبقى تعبان جدا صحته تعبانة جدا وداخل الانعاش وبين الحيا والموت وتقوله ازي الحال يقولك الحمد لله انا احسن من غيري كتير دي بتدي طاقة لكن ناس كتير بتقراها غلط يعني لما تسأل المصريين وتسأل مجموعة هل انت سعيد دايما يقولك الحمد لله ..الحمد لله يعني ان انا عايش ان انا قادر اتصرف مش ان انا رايي ان هذا هو الوضع الامثل فآه طبعا المصريين عندهم قدرة على التحمل وعندهم قدرة على اللي بيسموها التحايل على المعايش
محمد صلاح: ازاي يعني ؟
د/ قدري حفني: يعني بتبقى الامور تبدو معقدة جدا ومع ذلك بيقدروا يتصرفوا يعني فيه حاجة بتتعمل في مصر انا مالقيتلهاش نظير خالص فكرة "الجمعية " مش الجمعية الاهلية يعني مسجلة لا جمعية يعني عشر انفار يقولوا كل واحد يدفع 100 جنيه في الشهر
محمد صلاح: واللي هيقبض الاول واللي هيقبض التاني نوع من التكافل الاجتماعي
د/ قدري حفني: دا شئ غير موجود في العالم دا اختراع مصري يعني فيه حد اجنبي بيسالني بيقولي دلوقت اللي بينظم الجمعية دي بياخد فلوس قلت له لا يقبضها الاول يعني انا مزنوق اقولك يا محمد والله ماتعرفش جماعة من اصدقاءك نساعد بعض ماباخدش سلف وماباخدش هبة ولا تبرع انا بعمل فلوس بالدور دا اختراع مصري تحايل على المعايش
محمد صلاح: احنا ماهرين في التحايل على المعايش
د/ قدري حفني: انا اتصور اه
محمد صلاح: طب خليك معانا لسه الكلام مخلصش الموضوع دا فتح مجالات كتيرة للكلام .. لسه الكلام مخلصش
فاصل
محمد صلاح: دكتور قدري مش شايف ان الزحمة عاملة مشاكل كتيرة في سلوك الناس طب العشوائيات بتعمل ايه في سلوك الناس بتخلق حزن العشوائيات ولا ايه يا دكتور
د/ قدري حفني: ما هو احنا لما بنتكلم على العشوائيات الاعلام بيركز على عشوائيات الفقراء لكن ما بيجيبش كتير سيرة عشوائيات الاغنياء .. البناء العشوائي يعني بناء غير مخطط بيبنيه الواحد زي ما هو عايز دون مراعاة لمقتضيات المساحات والاحجام احنا عندنا عمارات عشوائية ضخمة مش مبني تحتها جراج عمارة كذا دور السكان اللي فيها عندهم 100 عربية مش مبني تحتها جراج نوع من الاستغلال عشوائي في كثير من الاماكن في الساحل الشمالي مبنية بشكل عشوائي دي انا اسميها العشوائيات الاختيارية يعني واحد قرر ان يقيم بناء عشوائي عشان يكسب او يقيم بناء عشوائي فيلا عشوائية عشان يستمتع هو ويقيم لها اسوار عالية دون مراعاة الناس ونركز على العشوائيات الاجبارية ان الناس اجبروا انهم يعيشوا في هذه الظروف فخصائص الناس دول الي هما احنا ، إحنا بالمعنى العام أجبرناهم إنهم يعيشوا في عشوائيات
محمد صلاح: دا تأثير إيه سواء عشوائيات الفقرأوعشوائيات الثراء ؟
د/ قدري حفني: تفرق في عشوائيات الثراء بيبقى فيه نوع من العزلة لو كان عدد قليل أو بيبقى فيه نوع من التعالي إن ياريت يخلصونا من العشوائيات
محمد صلاح: التانية الوحشة دي
د/ قدري حفني: ايوة علشان البلد تبقى نضيفة وشكلها حلو ، العشوائيات التانية اللي حضرتك بتقول عليها بتخلق كم كبير من الحقد والترقب يعني تصور إن لو واحد عايش في هذه العشوائيات – هو مضطر معهوش فلوس يشتري سكن – وبعدين يشوف التليفزيون ويقرا ويسمع عن ناس بتصرف ملايين في حاجات تافهة أو في فشخرة زي ما قال السيد الرئيس
محمد صلاح: حسب تعبير الرئيس مبارك
د/ قدري حفني: بيحس بأيه .. بيحس إن هو مش واخد حقه ويحس إنه مظلوم وطبيعي إنه في أول فرصة يحصل فيها فوضى سيحاول أن يأخذ حقه بيده وبشكل مباشر ودي هي النقطة .. هي المسألة يعني مش مطلوب ان الناس ما تتفشخرش اللي هي تغطي وتخبي لا خليهم يتفشخروا بس هما واعيين ان هما هيدفعوا التمن تمن الفشخرة ..مش تمن الفشخرة هياخدها ضرايب وزيرالمالية لا اخطر يعني انا اذكر قريت ان في نيويورك في يوم من الايام اتقطعت الكهربا عن نيويورك وسموه يوم الاربع الدامي او يوم الاحد الدامي فقطعت الكهربا مدة وساعة ما نور النور لقوا كل المتاجر اتنهبت مين اللي نهبها الفقراء اللي قاعدين في العشوائيات دخلوا وخدوا الحاجات دي وجريوا فدا سلوك سكان العشوائيات مش لانهم ساكنين في عشوائيات انما لانهم فقراء مطحونين مش واخدين حقهم
محمد صلاح: اتقلب الى سلوك في لحظة ما حاولوا وفقا لمنطقهم ان هما ياخدوا حقهم دا ما يسمى علميا الحقد الطبقي ولا ايه
د/ قدري حفني: اصل كلمة الحقد الطبقي يعني الفقراء يحقدون على الاغنياء دا مش بالضروري هو الفقير مش بالطبيعة بيحقد على الغني الا لو كانت فرص الحركة قدامه مقفولة بمعنى انه في الاعلام بنشوف فلان شخص عصامي حط القرش على القرش كان بيشتغل عامل في مصنع وبعدين حوش فلوس واشترى مصنع النمط ده حتى مبنشوفش في الاعلام دلوقت مش موجود لان انا طالما ان عندي امل اني هابقى احسن مش حكسر الدنيا لكن لو انا تيقنت ان مفيش سكة مش ممكن اوضاعي دي هتتحسن ممكن تبقى قنبلة موقوتة
محمد صلاح: بتحصل في بعض الاحيان وخليني اتكلم معاك على بعض السلوكيات في الشارع وعندنا مظاهر اسلامية موجودة في شكل نقاب وحجاب ولكنها ما انعكستش على سلوك الناس بدءا من الشتيمة والخناقات اللي في اصغر حادثة او في اصغر موقف بين الاتنين ومرورا بالغلظة والتعامل الحاد ونهاية حتى بسرقة الجزم في الجوامع
د/ قدري حفني: يمكن في السبعينات انا اقنعت طالبة من طالباتي يمكن بقت استاذة كبيرة انها تعمل دراسة عن ظاهرة الفتاة المحجبة لان انا بصيت لقيت الظاهرة دي بتزيد ولا بتقل ولا رايحة لفين وكانت النتيجة انه فيه انماط كثيرة من المحجبات ولدوافع كثيرة و..و..الى اخره لكن كان وقتها اللي بتتحجب بتختار هي اللي قررت سواء لاسباب اقتصادية او لاسباب دينية هي اللي بتختار وهذا الاختيار بينعكس على السلوك يعني ما يصحش ابقى محجبة واعمل كده ما يجوزش اني ابقى محجبة واتصرف التصرف دا ودا برضه من آثار ما حدث من تغيرات بعد النكسة الظاهرة بقت الزام اجتماعي مفيش قانون بيقول انه لازم الفتاة تحجب لكن بيتكلم عن المجاراة الاجتماعية فبقى دا الزي اللي المفروض تلبسه بصرف النظر هي بتتصرف ازاي
محمد صلاح: بصرف النظر عن مسالة التدين
د/ قدري حفني: اه.. وباتالي انفصل هذا السلوك عن اللبس وبالتالي بقى فيه محجبة لانها محجبة لان هو دا العادي تتصرف زي ما يعجبها وفيه محجبة ملتزمة اللي هي اختارت انها تتحجب لهذا السبب فالظاهرة بقت ظاهرة عامة
محمد صلاح: انت ربطت في تحليلك لظاهرة التحرش معدش بيفرق بين طفلة وشابة وسيدة عجوزة ولا صغيرة في السن بين المراة وبين السيارة
د/ قدري حفني: انا كتبت مرة حاجة زي كده مش قصدي السيارة بالظبط قصدي الملكية لان فيه ناس لاحظت وانا لاحظت ان فيه تناقض في الثقافة احنا عايزين نحمي المراة ونحافظ عليها ومحدش يبص بعينه لمراتي او بنتي يعني دا نوع من التقاليد لكن لو تاملنا في الحكاية دي شوية هنلقى ان العلاقة دي مش بالضرورة ان تكون علاقة انسانية انما ممكن تكون علاقة ملكية لان في العصور القديمة كان اسواق العبيد موجودة كان فيه عبيد ذكور وعبيد اناث بيشتري العبد اللي يكون جسمه قوي ويشتري العبدة الحلوة وكان يروح السوق يقلب في البضاعة دا تحرش لكن هاشتري على عمايا ما انا لازم هاشوف البضاعة اللي هاشتريها دي تركت نوع من النظرة للمراة باعتبارها ملكية وان ملكي انا اتصرف فيه زي ما انا عاوز
محمد صلاح: بس فيه ناس بتتحرش في اللي مش ملكه
د/ قدري حفني: بالظبط زي السرقة بقى يعني المسالة مابقتش مسالة جنسية اعتدي على املاك الاخرين وهنا الفرق زي ما انا معاييش فلوس فبسرق محفظة فانا شايف ان هذه المراة ملك حد تاني فاتحرش بيها وفي كثير من الاحيان الدراسات بتقول ان التحرش رغم ان اسمه التحرش الجنسي ما بيرتبطش قوي بالاشباع الجنسي او بالاثارة الجنسية انما بيبقى نوع من العنف نوع من العدوان سلوك عدواني وجذره ان دي ملكية دي شئ هو بيتحرش بشئ مش بيتحرش بانثى
محمد صلاح: لا دا الموضوع كده فتح مجالات تانية للكلام خليك معايا يادكتور قدري لسه الكلام مخلصش
فاصل
محمد صلاح: موضوع التحرش دكتور قدري حفني في وجهة نظرك احنا بقينا فين دلوقت في ظاهرة التحرش يا دكتور قدري ممكن يقف فعلا ولا احنا في أي مرحلة من مراحل التحرش
د/ قدري حفني: انا قراءتي للشارع المصري ان فيه مبالغة كبيرة جدا في الحديث عن التحرش لدرجة ان فيه احيانا الواحد بيجي يزوره حد اجنبي او حتى حد عربي فبيبقى متهياله ان التحرش دا سلوك يومي في الشوارع وبيفاجا مثلا لما يلقى بنت راجعة من الشغل الساعة 12 بالليل ازاي محدش اتحرش بيها في حين ان غالبية الفتيات والاناث المصريات بيمشوا بالليل ومحدش بيتحرش بيهم التحرش بيبقى حادثة عشان كده الاعلام بيركز عليها لكن لو قلنا ان احنا عندنا ملايين الفتيات وملايين النساء وملايين الرجال ما بيتعرضوش للتحرش يعني خلينا نحط برضه المسالة في حجمها الطبيعي انا من حين لاخر بركب المواصلات عمدا بركب الاتوبيس مازال فيه سلوك شهم عند المصريين الاتوبيس مليان ففيه بنت وقفت قالت لي اتفضل اقعد يا حاج فانا قاعد جنبها قالي ما يصحش وقف هو هنا فيه لغة هي وقفت احرجت اللي جنبها فوقف عشان انا اقعد دا من غير دراسة انا واحد واقف في الاتوبيس فما زال هناك شهامة المصريين مازال هناك تعطف بين المصريين وبعض .. التحرش احصائية مانقدرش نقول ظاهرة اوقات كمان بنمسك حاجة ونقول خلاص الدنيا خلصت
محمد صلاح: يا دكتور قدري في يوم من الايام ويتكرر الحدث مرة تانية 40 شابة او 50 او 100 في وسط البلد ولا في شارع جامعة الدول العربية يمشوا ورا فتاتين ويتم التحرش ويتم التحرش بشكل فج جدا دا مايخضش يعني
د/ قدري حفني: لا يخض انا بقول دا مش معناه ان دي ظاهرة يخض وتعالوا نشوف ايه اصل الحكاية يعني فيه جمعية اهلية مهتمة بهذا الموضوع وراحت درست مين اللي بيتحرشوا وبيتحرشوا بمين فاكتشفت ان في واقعة معينة في وسط البلد في يوم عيد واقعة مشهورة اللي بيتحرش هما اللي جايين من العشوائيات ونازل يوم عيد وشلة قررت انها تحتفل بهذه الطريقة المزرية فاتحرشوا ببنت بس بقية الصورة ايه ان اصحاب المحلات قبل ما تيجي الشرطة طلعوا ضربوهم وخلوا البنت تدخل المحل يحموها
محمد صلاح: سلوك مقابل يعني
د/ قدري حفني: كويس احنا ركزنا على الجزء الاولاني من الصورة ماركزناش على الجزء التاني .. الجزء التاني مهم إن فيه قوى ممانعة في الشارع المصري الظاهرة دي كيف يمكن ان احنا نحطها في حجمها وما نتجاهلهاش مانقولش خلاص العالم خلص وفي نفس الوقت مانقولش دي عادية انما دي ظاهرة زي السرقة زي القتل كيف يمكن ان تعالج اعلاميا المفروض تعالج ازاي بالتركيز على اعلاء دور المراة نقاومه نقول المراة دي فيه عندنا وزيرة متميزة في الوزارة عندنا اكتر من وزيرة عندنا وكيلة لمجلس الشعب نركز على ان المراة كائن محترم حين تنتشر هذه الثقافة يقوم يقل التحرش
محمد صلاح: ده بالنسبة للتحرش طب التوتر الطائفي هل انت راصد انه زاد في السنوات الاخيرة ولا بيعيد تكرار نفسه دا اللي حصل من ايام الرئيس السادات ايام الزاوية الحمرا
د/ قدري حفني: ابتدا بعد 67 كأي مجتمع هزم وفيه حاجة في علم النفس اسمها ثقافة الهزيمة موضوعيا الذي هزم ، هزم لانه لم يعد نفسه للحرب بالشكل او المستوى الذي اعد نفسة الطرف الاخر
محمد صلاح: ما احنا اعدينا وانتصرنا في 73 ليهه اللي مستمر معانا تاثير النكسة مش تاثير الانتصار
د/ قدري حفني: ما انا هقولك .. فيه حاجات تجسد ماتقوله حضرتك لما حصلت النكسة الناس عايزة تفسير ومش عايزة تقول ان احنا كنا الاضعف فتقول نحن ابتعدنا عن الله ولذلك بعد النكسة على طول ظهرت معجزة العذراء وظهرت حاجات كتيرة قوي عند المسلمين عندنا واستمر هذا الموضوع وبالتالي ابتدا يبقى فيه نوع من الشد والجذب ما يسمى باحداث الفتنة الطائفية الناس بتطلع غلها جوة ..حضرتك سالت سؤال مهم هو طب ليه لم حصل انتصار 73 ليه ما انتهتش ثقافة الهزيمة لان انتصار 73 وهو انتصار حقيقي كان فيه مشكلة كبيرة المشكلة الاولانية ان بالقوة العسكرية تم تحرير 15كيلو من سينا وتم تحرير باقي سيناء بالتفاوض وتم تحرير طابا بالتحكيم دي خدت سنوات وانت ما نتش عارف هو انت انتصرت الانتصار دا كمل هتاخد سينا بصحيح ولا مش هتاخدها
محمد صلاح: أهو خدناها وكمل
د/ قدري حفني: خدناها دا صحيح نيجي للمشكلة التانية احنا مين بقى اللي خدناها احنا المصريين ولا العرب ولا المسلمين لو كانت هويتنا مصر اولا خدنا سينا طب لو كانت هويتنا الإسلام اولا يبقى مخدناش حاجة لان مازالت فلسطين محتلة مازالت سوريا محتلة ومازالت افغانستان محتلة مازالت العراق محتلة ودي كلها اراضي مسلمة ..طب ولو كنا عرب اولا لسه عندنا فلسطين وسوريا ولبنان ولذلك فالاحساس بالانتصار محصور في الهوية المصرية
محمد صلاح: قصدك تفسيرات للانتصار وبالتالي ظلت النكسة مؤثرة على سلوكنا
د/ قدري حفني: طبعا ..
محمد صلاح: طب ايه علاقة النكسة مثلا بسلوكيات تتعلق بمقاومة أي قرار من اجل التغيير يعني مثلا في موضوع النظافة انه الحكومة تاخد قرار بنقل حظائر الخنازير خارج الكتل السكنية فالناس تقاوم وتقعد 10 سنين لحد ما تحصل كارثة انفلونزا الخنازير في العالم ونضطر ساعتها ننفذ ، قرار بمنع المقطورات فيعترض السائقين واصحاب المقطورات رغم ان المقطورات عمالة تطيح بالبشر والناس والسيارات الاخرى على الطرق ، انفلونزا الطيور اصلا مرض يتعلق بالنضافة وشفت قد ايه بقت في الاحياء الشعبية وغير الشعبية بيقاوموا السلطة وبيقاوموا بتوع المكافحة وبيخبوا الفراخ ..يطلع قرار بنقل سوق فالناس تقاوم لانها مش راضية تطلع السوق من قلب الكتلة السكنية رغم انها كما يبدو قرارات من اجل الناس ايضا في النهاية
د/ قدري حفني: لو أصرت الحكومة على ان تنفذ قرارا واحدا لما قاومها أحد الحكومة بتتحمل الضغوط وبتتحمل الاحتجاجات لكن فيه احتجاجات يسندها مال يعني لما تمشي حضرتك في الشارع وبتلقى ان البلدية بتطارد بائعين متجولين عشان اشغال طريق طب ومعارض سيارات كبرى المعرض دا مأجر دكانة متر في متر وعارض السيارات على الرصيف ما هو دا اشغال طريق ما بيتشالش ليه لانه قوي والقوي بيبقى فوق القانون ودي مشكلة
محمد صلاح: لا طالما ان فيه مشكلة يبقى خليك معانا لسه الكلام مخلصش
فاصل
محمد صلاح: يمكن في بعض الاحيان طالما الدكتور قدري حفني اتكلم عن من يستطيع إيقاف القانون وعدم تطبيقه ومن لا يستطيع وبالتالي تطبق عليه القوانين هذه الازدواجية.
يلفت النظر بشدة موضوع الأطباق المستقبلة للبث التليفزيوني اللي هي الدش اللي موجودة فوق العشش لفت نظرك الحكاية دي وتفسرها أزاي
د/ قدري حفني: الناس عايزة تعرف عايزة تتفرج
محمد صلاح: الاسرة المصرية اللي دخلها محدود يمكن الاب يتزنق ماديا جدا عشان يوفر لعياله اجهزة موبايل مش ضرورية يعني
د/ قدري حفني: ما هو مين اللي بيقول بلا داعي او بداعي..انا موافق معاك لكن
محمد صلاح: الواد بيشبط والبنت بتشبط اللي عندهم 12 ، 13 سنة والاب أصلا مش قادر
د/ قدري حفني: ماهو لو مش قادر مكانش جاب.. نتكلم عن الدش الناس كلها عندها دخل محدد نحط اسبقيات اذا قال الاسبقية الاولى حطها تحت عنوان الاتصال الدش الجرنان الكتب لو حط ميزانية الدش في الكتب هتعتبره احمق
محمد صلاح: يعني هو اختنزل موضوع الاتصال والمعرفة في الدش
د/ قدري حفني: دي تحسب ليه ولا تحسب عليه
محمد صلاح: هو عايز يعرف الدنيا فيها ايه ولا يتفرج على "الطقش والفقش" اللي هو الطبل والزمر
د/ قدري حفني: منقدرش نقول ان كل الناس بتتفرج على الطبل والزمر فيه ناس بتتفرج على قنوات كثيرة فيها كلام وفيها هجوم على الحكومة وفيها مزايدة وفيها دين لان الدش دا بيجيب حاجات كتيرة جدا فيه ناس تجيب الدش دا تفتحه من الصبح لحد بالليل على قنوات دينية
محمد صلاح: وعندنا مشكلة في تكوين الاسرة المصرية والمشاعر وصلة الرحم يعني شفنا امهات بتعمل حاجات في الأبناء وشفنا العكس هل مازال لسه فيه صلة رحم قصة التزاور بين الناس والتواصل
د/ قدري حفني: اولا فيه صلة رحم التواصل بياخد اشكال اخرى التليفون بيحل حاجات كتيرة انا اعرف ناس مش قادرين يخلوا امهم تروح تحج كبيرة في السن وهما مش قادرين يسافروا معاها الموبايل خلاهم يخلوها تروح تحج .. تفتح الموبايل تتصل بيهم فاتحلت المشكلة .. مسالة ان فيه تغيير في بناء الاسرة اه.. فيه تغييرين مهمين جدا حاصلين في بناء الاسرة المصرية ..الاسرة المصرية مازالت قاعدة مع بعضها نتيجة ازمة المساكن نتيجة الود اهم قاعدين مع بعضهم لكن نتيجة لان الصحة العامة تحسنت فالسن زاد معدل العمر زاد فبقى ممكن يكون فيه الام والاب والجد والجدة واحيانا بيبقى ابو الجد والجدة موجودين وعدد الاطفال في الاسر المتوسطة قل فبقى الهرم مقلوب كان الاول فيه اب وام و4 عيال دلوقت بقى فيه اب وام وجد وجدة وفيه 3 او 4 عيال فبقى الكبار اغلبية دي نمرة واد نمرة اتنين ان الجدود دلوقت بيعولوا الاحفاد فيه اسر كثيرة بدل ما كنا بنقول نجيب ولد نركن عليه لما نعجز دلوقت الجد بيشيل الابن وبيشيل ابن الابن دي ظاهرة مهمة .. في التكنولوجيا اتقدمت كان زمان الشغل معتمد على القوة البدنية فاللي بيعجز يقعد في البيت فدلوقت فيه شغل كتير بيتعمل على الكمبيوتر بيتعمل بالخبرة فالكبار بقى عندهم القدرة على الانتاج نيجي لحالة تانية كمان ان الكبار او جيل الوسط علاقته بالتكنولوجيا مش قوي وبقى الحفيد هو مصدر المعلومات للجد ودي مسالة ماشية بالمقلوب كانت المسالة زمان الاكبر سنا هو مصدر المعلومات للاصغر فيه حاجات كتير بتتغير في الاسرة المصرية
محمد صلاح: لو بنكمل فسيفساء الشخصية المصرية انت شايف في المستقبل عامل ايه بعد كام جيل ممكن يحصل تغيير ملفت للشخصية المصرية ولا هنعيد تكرار انفسنا
د/ قدري حفني: لا بتتغير انا شايف ان احنا بنتغير
محمد صلاح: للاسوا ولا للافضل؟
د/ قدري حفني: لا للافضل
محمد صلاح: انت متفائل قوي يا دكتور
د/ قدري حفني: ليه متفائل ليه ؟
محمد صلاح: قولي ملامح هذا التغيير وأسانيدك فيه
د/ قدري حفني: انه بترتفع درجة المعارضة وبتقل درجة لخوف من السلطة ودي هي بؤرة التغيير .. ممكن التغيير دا مايحصلش بكرة لكن ان احنا ماشيين في الطريق المظبوط .. الناس اكتسبت مهارة كيف تحتج سلميا
محمد صلاح: ايوة بس دلوقت احتجاجات عمال على بطال حتى احيان كتيرة يادكتور سخفت المسالة وبقى لما يكون حد بقى عنده قضية مهمة هيضيع في وسط الناس اللي بتحتج لمجرد انه تيجي وتصور ويطلعله على لفضائية وخلاص
د/ قدري حفني: شوف لا احد يخدع احد احنا حصل عندنا في مصر اضراب كفر الدوار واتحل الاضراب بالتفاوض دا مظهر حضاري جدا لان جيل زي اللي في سني يفتكروا اضراب كفر الدوار اتشنق فيها 2 عمال اللي هم خميس والباري
محمد صلاح: في العهد الناصري ؟
د/ قدري حفني: في العهد الناصري.. يعني شوف الاضرابات الناجحة اللي هي اتحلت بالتفاوض كان اضراب العمال والضرائب العقارية والصيادلة دي اضربات حضارية جنبها فيه اضربات استعراض اه وماله يعني ما تتخضش من دي دا يحصل ودا يحصل ان ساعة ما اقول الاضرابات بقت كل واحد يعمل اضراب كل واحد بمظاهرة يخاف لا المظاهرات بتحصل في العالم كله وانا متفائل لان الناس ابتدت علنا تطالب بحقوقها وابتدت الحكومة ايضا تضع الناس في اعتبارها وايه اللي خلى الحكومة تتفاوض مع العمال ليه مادخلتش بالدبابات داستهم ان الحكومة ايضا ما باقولش ان الحكومة مثالية انا بقول ان المصريين احنا كلنا مع بعض بنتحرك في الاتجاه الصحيح لان اللي يطمني ان فيه قدرة على الرفض والمعارضة واللي يقلقني انه ماكونش فيه معارضة
محمد صلاح: رسمنا بورتريه للشخصية المصرية صورة كان فيها السلبي والايجابي عرض المفكر الدكتور قدري حفني ملامحه ورؤيته لهذه الشخصية ورسم معانا صورة للمستقبل قال الدكتور قدري حفني كلام جميل كان كلام معقول وكان ايضا كلام ........ مسئول خلص الكلام نلتقي في الحلقة المقبلة