صناديق الحكومة التايهة!

بتقرى إيه ومبسوطة قوى كده؟
- مش مبسوطة ولا حاجة، طلعت غير ما كنت فاكرة.
هى إيه دى؟
- أصلهم هيعملوا قانون جديد ضد البطالة، كنت فاكرة أنهم هيدوا إعانة بطالة للشباب اللى مش لاقيين شغل، طلع إنه للعاملين اللى سرحوهم من شغلهم.
مش فاهم.
- يعنى كنت فاكراهم حيدوا الواد ابننا إعانة بطالة لغاية مايلاقى شغل.
وهو ابنك عاطل، ده طيار قد الدنيا.
- والنبى ما تحرق دمى أكثر ما هو محروق، ابننا زى الفل واتخرج الأول فى كليته ودلوقتى بيوصل طلبات للبيوت على موتوسيكل.
ربنا يسترها معاه ومع اللى زيه.
- على العموم أهى حاجة كويسة للناس اللى بقوا عاطلين دول، مش قالوا برضه أنهم حوالى ميت ألف، يا عينى عليهم.
طب قولى لى مكتوب إيه بالضبط عن القانون الجديد ده.
- بيقولك حيعملوا نظام تأمين جديد عشان يعوضوا الناس اللى خرجوا من شغلهم، يبتدى من تامن يوم على إنهاء خدمته لغاية ما يلاقى شغل، بس بحد أقصى ست شهور.
وإيه كمان؟
- حياخد ستين فى المية من مبلغ اشتراكه التأمينى يعنى الأساسى، مش كده؟
آه.
- بس بقى عشان يضمنوا إن الواحد من دول ما يفضلش مكسل ومعتمد على الإعانة دى ويدور على شغل، هيخفضوها كل شهر أربعة فى المية.
والاشتراك فى النظام ده إزاى بقى؟!
- يعنى إيه؟ الكل حيشترك.
من غير ما ندفع ولا مليم؟!
- لأ طبعاً.. حندفع اتنين فى المية من الراتب.
هو أنت عبيطة ولاّ بتستعبطى؟!
- ليه، فيه إيه!
طب ما هو الكلام ده كله موجود من زمان.
- نعم، من إمتى؟
من سنة ألفين واتنين لما عملوا صندوق الطوارئ للعمال بقانون مية ستة وخمسين، الصندوق ده الغرض منه تقديم إعانات للعمال اللى يتوقف صرف أجورهم. - بتتكلم جد؟!
أيوه، بأقولك من سبع سنين والصندوق ده موجود وبرضه بيصرف بحد أقصى ست شهور، بس إيه بقى مية فى المية من الأجر الأساسى مش ستين فى المية؟
- بالذمة!! هم كمان عاملين حد أدنى ميتين جنيه وأقصى ألف جنيه.. عاملينهم قام بقى فى النظام الجديد.
- مش مكتوب.
ورينى الجرنال.. آه هيخصموا اتنين فى المية، تعرفى إن فى النظام القديم كانوا بيخصموا واحد فى المية بس.
- طب ليه ماقالوش كده.
ماهم كاتبين أهو إن النظام ده حيعالج المشكلات اللى كانت موجودة بالنظام الموجود دلوقتى، يعنى معترفين إن فيه نظام بس فيه مشاكل.
- إيه بقى المشاكل اللى حيعالجوها دى إن شاء الله؟!
إن اللى كان بيستفيد من الصندوق هم العمال اللى تم التأمين عليهم لمدة سنة على الأقل. - مش مشكلة كبيرة.. يعنى الناس دى كلها اللى سابت شغلها السنة دى بسبب الأزمة العالمية بياخدوا إعانة بطالة.
لأ طبعاً.
- ليه طيب مادام الصندوق موجود.
أنا مرة قريت تصريح لمساعد وزير المالية بيقول إن الناس مابتقدمش طلبات الإعانة عشان ما يعرفوش إن الصندوق ده موجود.
- ما يعرفوش!! وفين نقابات العمال والمسئولين، ليه محدش بيعرفهم.. هو الصندوق ده مفتاحه مع مين؟
مع وزيرة القوى العاملة، ما هى أصلها رئيسة مجلس الإدارة بتاعة الصندوق.
- يا سلام، كمان الصندوق له مجلس إدارة ومحدش عارفه.
الصندوق له إدارة تنفيذية مكونة من تلات أشخاص، ومجلس إدارة فيه أربعتاشر واحد.. وبيجتمعوا ويرسموا سياسات وينسقوا مع جهات.
- ليه ده كله؟
لمواجهة إغلاق المنشآت، هو ده الغرض من الصندوق.
- طب وفى الآخر مين استفاد من الصندوق؟ والفلوس راحت فين؟
شوفى لسه قريب الوزيرة قالت أنهم صرفوا إعانات للعاملين فى مية تمانية وعشرين منشأة، وصلت الإعانات لخمسة وعشرين مليون جنيه أخدهم أربعة وعشرين ألف ونص عامل.
- طب ما هو مبلغ كبير أهو، يعنى كل عامل من دول أخد متوسط كده.. فوق الألف جنيه، يعنى لو حسبناهم على ست شهور يبقى كل واحد فى الشهر ييجى...
استنى بس، مش كل الفلوس راحت للعمال اللى اتعطلوا.
- إزاى يعنى؟
أصلهم كمان قدموا تعويضات للعمال اللى خصخصوا شركاتهم.
- آآه!! بس إزاى وأنا موظفة كبيرة كده وبقالى سنين وزى ما أنت شايف بافهم فى كل حاجة وباعرف كل حاجة وأول مرة أسمع عن الصندوق ده، حتى الناس اللى بتطالب ببدل بطالة ولا حد عمره كتب عن إن فيه صندوق زى ده موجود.
أصل القوانين بتاعتنا كتيرة قوى ودهاليزها أكثر.. وكمان صناديقها. - هو فيه صناديق تانية.
كتيير!!
- أنت تعرفهم!
مش كلهم.. بس ممكن أقولك على كام صندوق كده عشان كلهم المفروض أنهم معمولين لمصلحة العمال.
- إيه.. قول بسرعة.
عندك مثلاً صندوق الخدمات الاجتماعية والصحية والثقافية.
- بتاع إيه ده؟
بتاع تقديم خدمات اجتماعية وصحية وثقافية.
- يا سلام، إيه العبقرية دى.. بس طبعاً الصندوق ده له مجلس إدارة وبيجتمعوا وياخدوا بدلات.
طبعاً، كل الصناديق كده.. المهم إن الصندوق ده برضه لازم المنشآت اللى بيشتغل فيها عشرين عامل أو أكتر تدفع اشتراكات فيه وكمان بياخدوا تبرعات وإعانات وهبات.
- بس لو تقول لى إيه الخدمات الثقافية والصحية والاجتماعية اللى بيعملها الصندوق عشان أرتاح.
بيعملوا مكتبات فى المنشآت، لأ، مش بيعملوا، هم لو فيه منشأة فيها مكتبة ممكن يدعموها بكتب، ويعملوا ندوات ثقافية وأنشطة رياضية، ورحلات ترفيهية ومصايف، وبيقولوا كمان بيساعدوا فى نفقات العلاج.
- ما كل الحاجات دى بيعملها بتوع اللجنة النقابية فى المؤسسات.
زيادة الخير خيرين.. إيه اللى مزعلك. - مش زعلانة بس المهم يكونوا بيعملوا كده بجد.
عندك كمان صندوق تمويل التدريب والتأهيل وده برضه رئيس مجلس الإدارة بتاعه وزيرة القوى العاملة.
- تمويل التدريب والتأهيل.. يعنى بيدربوا العمال ويأهلوهم.. صح؟!
شاطرة، أديكى فهمتى الفولة.
- مش فاهمة حاجة.. بيدربوهم على إيه؟!
الحقيقة أنهم مش بيدربوهم بالظبط، لكن بيرسموا السياسات بتاعة تمويل التدريب، يعنى بيعملوا دراسات وندوات ومؤتمرات، ويصدروا مطبوعات ويقدموا مشورات.
- عموماً التدريب والتأهيل دول حاجات مهمة قوى للعمال المهم يكونوا مستفيدين من الصندوق، إلا ده له اشتراك برضه؟
مافيش صندوق مالوش اشتراك، يعنى حيجيبوا ميزانية منين، أى منشأة يزيد عدد العمال فيها عن عشرة تدفع واحد فى المية من صافى أرباحها.
- واحد فى المية، بيتهيألى يبقى ميزانيتها كبيرة قوى.. طب ليه كل المسئولين بتوعنا لسه بيقولوا إن العمال عندنا محتاجين تدريب وتأهيل، بيقى الصندوق ده مش شايف شغله كويس.
المفروض إن شغل الصندوق كله قايم على أنهم يدرسوا احتياجات سوق العمل فى مصر وفى الخارج وبعدين يرسموا سياسات للتدريب على الاحتياجات دى.
- ياه، دول غلابة بقى، الحكاية صعبة عليهم، طول عمر المسئولين بتوعنا بيقولوا حندرس احتياجات سوق العمل، ولسه مش عارفين.
بالظبط كده.
- اللى نفسى أعرفه إحنا ليه مش بنستفيد من الصناديق دى؟
وأنت عاوزة منهم إيه؟
- أى حاجة، مش بأدفع اشتراكات.
المهم إن أى صندوق يتعمل لحاجة يكون بيقوم بيها.
- وحنعرف إذا كان بيقوم بيها ولاّ لأ إزاى؟
ما هم بيعملوا ميزانيات وعليهم رقابة من الجهاز المركزى للمحاسبات.
- يعنى اطمئن؟!؟