يحدث في مصر

ريهام إبراهيم : أهلا بكم مشاهدينا الكرام وحلقه جديده من برنامج يحدث فى مصر .. فى الحقيقة إن إحنا هنناقش النهارده موضوع هام جدا بتولية وزارة الإسكان إهتمام بالغ وهو تخطيط عمرانى .
محمد المغربى : وزارة الإسكان وضعت برنامج قومى للقضاء على العشوائيات العمرانية بحلول عام 2025 يعنى كمان 15 سنة .
ريهام إبراهيم : بتلعب هيئة التخطيط العمرانى دورا مهما فى الإنتماء من أحد المشروعات الضخمة التى يهتم بها جميع المصريين تقريبا وهو إعداالمخططات الإستيراتيجية لمدن وقرى الجمهوريه كافة .
محمد المغربى : لكن الدور الأهم للهيئة فى الحقيقة هو ما تقوم به حاليا من رسم مستقبل القاهرة عن طريق مشروع ما يسمى مشروع القاهرة 2050.
ريهام إبراهيم : معهد التخطيط القومى قال فى دراسة حديثة بوجود 1109 مناطق عشوائية فى 20 محافظة ليسكن بها نحو 17'7 مليون نسمة .
محمد المغربى : مشاهدينا الكرام إذن الليلة هنناقش الأحوزة العمرانية وتطوير مطار إمبابه مشروع القاهرة 2050 كل هذا سوف نتعرف عليه مع ضيفنا الدكتور مصطفى مدبولى رئيس الهيئة العامه للتخطيط العمرانى وعلى معلومات كثيره من مناطق عشوائية وطبيعة عمل الهيئة وأيضا الكثير عن مستقبل القاهرة ..أهلا بك .
محمد المغربى : أهلا بك
ريهام إبراهيم : أهلا بحضرتك يا دكتور قبل ما نبدأ الحلقه نشوف مع حضرتك والساده المشاهدين تقرير ونبتدى الأسئلة على طول .
فاصل : تقرير
تسعى الهيئة العامة للتخطيط العمرانى خلق مناطق سكنية جديدة تستوعب الزيادة السكانية ووضع تصور لتنمية الدولةوالمساحة السكانية التى تقطنها والتى لا تتعدى 5,5 % فقط من مساحة مصر .
د/أيمن الحفناوى نائب رئيس الهيئة العامة للتخطيط العمرانى :الهيئة العامة للتخطيط العمرانى هو أحد الأجهزة التابعة لوزارة الإسكان والمرافق والتنمية العمرانية وهى جهة مسؤلة عن توجيه التنمية العمرانية فى مصر ووضع خطط لتوجيه التنمية العمرانية بالتنسيق مع الوزارات المعنية بالتنمية العمرانية فى مصر,وتسعى الهيئة دوما للحفاظ على الأراضى الزراعية جنبا الى جنب مع التوسع العمرانى وهو ما جعل الهيئة تقارب على الإنتهاء من تجمع الرؤىالخاصة ب 14 وزارة خدمية وقطاعيه لوضع المخطط العمرانى المستقبليه القومية لمحافظات الجمهورية خلال المرحلة المقبلة بشكل عام لتكون متوازية مع تخطيط القاهرة عام 2050
فاصل
محمد المغربى : دكتور مصطفى يعنى بعد ما شوفنا التقرير عن دور الهيئة بيبقى المسؤلية الأهم هو ما يسمى بمشروع القاهرة عام 2050 نبدأ من البداية خالص من الفكرة الفكرة ليست وليدة اليوم قديمه جدا ربما هى حتى عرضت الرئاسه فى مصر ورفضها الرئيس مبارك فى 2007 وقال إن ممكن إحنا فى غنا عنا دلوقت وبعد كده تم الموافقة عليها فى 2008 قول لى الفكره جاءت منين أصلا ؟
د/مصطفى مدبولى : لأ هو يمكن قبل ما أبدأ توضيح الموضوع دا أحب اصحح لحضرتك يمكن السيد الرئيس مبارك لما عُرض عليه الموضوع كان إنشاء عاصمة جديدة لمصر وديه اللى يمكن قال هو ساعتها رفضها وقال إحنا بنترك المجال لدراسات مستقبلية لإن ديه دراسات لمستقبل 30 – 40 سنة قدام لكن مش هو دا الأولوية الأولى النهارده .
محمد المغربى : ما كنش نفس المشروع القاهرة 2050 ؟
د/مصطفى مدبولى : لا .. لأ مختلف تماما هو كان أثيرت موضوع عاصمه جديده لمصر دا مختلف تماما عن موضوع القاهرة 2050 .. القاهرة 2050 زى ما حضرتك تفضلت قلت ناس كتيره جدا إتكلمت على موضوع تطوير القاهرة والمشاكل اللى مواطن النهارده عايش فيها مشاكل كتيره جدا أهمها مشاكل المرور الزحمة والضوضاء والتلوث وكل الكلام ده كله مشكلة القاهرة يمكن ديه نقطه مهمه وبدأت وبدأت الهيئه كانت تتصدى لها من فترات طويله ويمكن كان فيه مخطط مهم إتعمل للقاهره كانت سنة 83 دا يمكن كان مخطط شامل للقاهره الجديدة القاهرة الكبرى مع المدن الجديده اللى حواليها ويمكن المخطط دا جزء من أهم مشروعاته إذا كانت إتنفذت موضوع الطريق الدائرى مثلا ومحور 26 يوليو تطوير الإسراع بالمدن الجديدة والتجمعات الجديده اللى حوالين القاهرة ديه كلها كانت فى مخطط اللى هو إتعمل سنة 83 .
فى الحقيقه كان هناك إحتياج ضرورى مع الزياده السكانية الكبيرة جدا اللى بتحصل مش فقط للقاهره ولكن لمصر كلها وإبتدى النهارده إقليم القاهرة الكبرى 16 مليون نسمه إن إحنا نبدأ نُعيد النظر فى مستقبل القاهرة .
خلينا نبدأ بنقطة بدايه لازم كلنا نتفق عليها إن إحنا لازم نعترف إن فيه مشاكل موجوده فى القاهرة.
ريهام إبراهيم : أولها المرور والإزدحام زى ما حضرتك ذكرت كان الإهتمام على الطرق .
د/مصطفى مدبولى : بالظبط .. وديه يمكن أنا هأشرحها لحضرتك ليه إنما برضه إحنا يمكن كان القاهرة كمدينة كانت هى دائما الحلم اللى أى مواطن مش فى مصر بس كان فى الشرق الأوسط كله بيبقى دائما بيتطلع إن ييجى القاهرة اللى عايز يتعلم كان ييجى القاهرة اللى عايز يتعالج كان ييجى القاهرة اللى عايز سياحه اللى عايز أى حاجه دائما القاهرة ديه هى المكان الرئيسى اللى كل الناس بتبقى عايزه تيجى فيه .
خلينا نعترف إن البداية إن القاهرة فى خلال يمكن الفتره الأخيره تدريجيا إبتدت تفقد هذه المكانه وإبتدت مدن أخرى فى المنطقة بتبدأ تجذب أدوار القاهرة كانت بتلعبها فكان مدخلنا إزَّاى نعيد الريادة للقاهره دا كانت فكرة القاهرة 2050 نرجع إزاى القاهرة بحيث تكون العاصمه الأولى على مستوى الشرق الأوسط .
ريهام إبراهيم : لقيتوا إيه بقى ؟
د/مصطفى مدبولى : أهم نقطه طبعا إن إحنا كنا نبدأ نبص على هذا الموضوع ويمكن الهيئة أنا عايز ءأكد إن الهيئه برغم إن هى الهيئه المسؤلة فى مصر كلها على موضوع التخطيط العمرانى لكن من البدايه أخذت إسلوب تشاركى يعنى بتقول القاهرة ديه مش هيئة فقط هى اللى بتعمل لها المخطط دا المفروض يبقى مشروع لكل المواطنين فى مصر مش فى القاهرة فقط عشان كده إستعنا بخبرات كتيره جدا خبرات محليه وخبرات دوليه عشان نبدأ موضوع القاهرة 2050 أهم حاجه إن إحنا وصلنا لرؤية إن أنا عايز أو الحلم زى ما حضرتك بتقول إن القاهرة تكون مدينه عالمية مدينة خضراء مدينه مترابطه .. يعنى إيه الكلام ده ؟
كلمة عالميه ببساطه شديده إن القاهرة زى ما قلت لحضرتك تستعيد مكانتها إنها تكون العاصمة الأولى على مستوى الشرق الأوسط وأحد المدن على أعلى مستوى على مستوى العالم كله من حيث مستوى معيشة الفرد فيها بمعنى إن الخدمات اللى تبقى موجوده فيها المناطق اللى مفتوحة النقل والمواصلات يبقى زى أى مدينة على مستوى العالم بنعتبرها من المدن المتقدمة ديه كلمة عالمية وتكون مدينة جاذبة ومنافسه يعنى تبدأ تانى تستعيد الريادة التجارية والترفيهية والسياحية مرة أخرى .
موضوع خضراء وديه نقطه جوهرية أكيد كلنا بنلمسها إن المناطق الخضراء والحدائق فى القاهرة لما نييجى نبص نصيف المواطن النهارده قد إيه فى هذه القضيه المهمة هنلاقى إن متوسط نصيف المواطن النهارده فى القاهرة الكبرى ما بيتجاوزش 2,5 م2 المعدلات العالمية طبقا لأى تخطيط 12 م2 يعنى تحس قد إيه إحنا أقل يمكن إحنا 20 % من المعدل اللى المفروض نبقى عليه فيه مدن عالميه واصله نصيب الفرد فيها بيبقى 60 متر لكن أنا هاأتكلم بس على الإستندر العالميه أو المستوى اللى هو بنتكلم 12 متر فكان الهدف إزَّاى أزيد الرقعه الخضراء جوه القاهرة إزاى أبدأ أنشئ حدائق ومسطحات كبيرة وديه يمكن حصل عليها برضه احد الكلام كتير على موضوع إن إحنا نبدأ نشوف المناطق المتهالكه والقديمه اللى جوه القاهرة المناطق اللى مش مستغله إستغلال كويس ونبدأ نحولها الى حدائق ومتنزهات خضراء دا جنب طبعا فيه تركيز فى المدن الجديده بتتبع وزارة الإسكان إن إحنا بننشئ حدائق كبيرة جدا لكن .
ريهام ابراهيم: د. مصطفى يعنى واضح من كلام حضرتك كده إنه الهيئة بتقوم بدور التخطيط يعنى التنفيذ هو خارج عن إطار شغل الهيئة .
د/مصطفى مدبولى : عن عمل الهيئه طبعا .. إحنا كجهة القانون واضح جدا بيقول الهيئة هى الجهاز الرسمى للدوله المسؤل عن رسم سياسة التنمية العمرانية وعمل مخططات التنمية لكل المدن والقرى فى مصر لكن كتنفيذ طبعا بتتولاه جهات أخرى ويمكن دا لما هنتكلم على موضوع إمبابه بتبدأ جهات زى وزارة الإسكان نفسها بأجهزتها التنفيذيه المحافظات وزارة النقل يعنى الجهات المختلفة المعنية بالتنفيذ بتبدأ تأخذ هذه المخططات وتنفذها .
خلينى أرجع لآخر مكون وهو اللى يهم المواطن النهارده موضوع إن القاهرة تبقى مترابطه كلمة مترابطه إن تبقى فيها أفضل وسائل النقل الجماعى مشكلة القاهرة الكبرى إن إحنا النهارده دائما نقول إيه دا حجم القاهرة كبير المواطن دائما يقول القاهرة كبرة قوى عايزين القاهرة ما تكبرش أكثر من كده لما إبتدينا نبص من دراساتنا لمسطح القاهرة الكميه ديه مسطح ونقارنها بالمدن العالمية وجد إن القاهرة كمساحة أقل بكثير جدا من مدن أخرى باريس ولندن ونيويورك كل ديه مدن أكبر من القاهرة أضعاف مضاعفه كمساحة مشكلتنا إيه فى مصر إن 75 % ال16 مليون اللى عايشين جوه القاهرة الكبرى عايشين فى دائره قطرها 20 كم إقليم القاهرة دا كله بيوصل 100 بالمدن الجديده اللى حواليها إنما الناس كلها متركزه فى النصف 75% قاعده فى النصف فبالتالى الزحمه اللى إحنا عايشنها طول النهار طيب نقعد نسأل نفسها ليه طيب الناس عايشه ليه فى النصف دا وما حاولتش تخرج بالصوره المرجوه لإن ببساطه شديده إحنا بنفتقد بوسائل نقل جماعى كافيه فهدفنا عشان كده كان التركيز إزَّاى نخطط لرفع مستوى موضوع النقل الجماعى .
محمد المغربى : د. مصطفى يعنى كان التفكير فى البدايه إن أن لا نجعل القاهرة هى القضب الأوحد فى مصر يعنى إن إحنا نعمل بدائل عن القاهرة مش نكبر القاهرة ربما البعض قال إن كان الأولى به إن إحنا نشوف حاجه تانيه نشوف 6 أكتوبر نشوف حلوان ونبدأ على تطويرها لماذا القاهرة لماذا الإصرار على القاهرة – القاهرة فيها حوالى 40% من الأحياء العشوائية فيها حوالى 7% بطاله لماذا القاهرة ؟
د/مصطفى مدبولى : بص حضرتك أول فيه نقطه مهمه جدا أحب أوضحها إن الهيئة النهارده ما بتشتغلش فى القاهرة فقط دا بالعكس إحنا نقدر نقول 70% من شغل الهيئة النهارده خارج القاهرة بنتكلم على موضوع الأحوزه العمرانية لكل مدن وقرى مصر موضوع إحنا بنعمل النهارده مشروع كبير قوى يمكن أكبر بكثير من القاهرة 2050 هو مصر 2050 كيف سيكون شكل العمران فى مصر 2050 كيف تستوعب الزياده السكانيه الكبيره المتوقع حدوثها نقطه مهمه جدا إحنا النهارده 80 مليون فى 2050 إحنا طبقا لأفضل الأرقام المتفائله هنزيد عن 140 مليون
محمد المغربى : 148 تقريبا المتوسط ؟
د/مصطفى مدبولى : يعنى أنا بأتكلم على زيادة على الأقل 60 مليون نسمه يعنى دوله جديده .
ريهام إبراهيم : يعنى إحنا بنسمع كتير مثلا عن نقل الوزارات من القاهرة وإن وزارة الإسكان هتقوم بدا فعلا فى خطه كده لتنظيم الإزدحام تنظيم الحركة المرورية اللى ممكن بتشهدها القاهرة تحديدا فى الفتره الأخيرة الخطط ديه وصلت لفين ؟
د/مصطفى مدبولى : دا كان أحد مشروعات القاهرة 2050 لتخفيف الإزدحام المرورى جوه القاهرة هو نقل مجموعة من الوزارات مش كل الوزارات إحنا بنتكلم على الوزارات المركزه فى منطقة القصر العينى اللى هى حوالى 13 وزارة بالإضافة الى مقر مجلس الوزراء وديه إللى أحنا بننقلهم فى منطقة جديده بالكامل مش فقط لنقل الوزارات إحنا بنخلق مركز جديد للقاهره إحنا عارفين حضرتك وسط البلدا دائما اللى بنقول عليها اللى هى منطقة وسط البلد ديه النهارده منطقة تاريخية وقديمه إبتدت النهارده مع المشاكل المرورية ووجود هذه الوزارات بقة فيها مشاكل كتيره الزحام إبتدت تفقد مكانتها فكرنا كان فى القاهرة إن إحنا بننشئ مركز جديد شرق القاهرة بنعمله على مساحة أكبر بنقول عليه دا هيمثل القاهرة فى المستقبل قاهرة الألفيه الثالثه وفى نفس الوقت بنبدأ نستعيد مكانت المركز القديم نرجعه كمركز سياحى فى الأساس اللى هو القاهرة بتاعة وسط البلد .
ريهام إبراهيم : بس الوزارات ما كنتتش هى المشكلة الرئيسية فقط ؟
د/مصطفى مدبولى : هى مش فقط الوزارات إنت عندك الوزارات برضه ديه نقطه مهمة لازم ناخد بالنا إن المنطقة اللى أنا بأقول لحضرتك عليها القصر العينى ديه 60 ألف موظف يوميا بيترددوا على هذا المكان بالإضافه الى أكثر من 120 ألف مواطن فى منطقة صغيره جدا غير مؤهله إنها كانت تستوعب هذا العدد فنبدأ النهارده بالتخطيط الجديد أنقلهم فى مكان آخر منطقة أوسع دا أنا بأتكلم على الموظفين على أساس إن أنا أحل جزء كبير جدا من مشكلة التكدس فى هذا الموضوع .
النقطه المهمة إن هذا المشروع النهارده بدأ الخطوات التنفيذيه له ودا تحت رعاية السيد رئيس الوزراء وفيه دعم مهم جدا لهذا المشروع إبتدينا إن إحنا بنتكلم على خطة تنفيذيه إن إحنا نبدأ مرحلته الأولى وتكون تبدأ حيز التنفيذ فى خلال 5 سنوات .
محمد المغربى : د/ مصطفى إسمح لنا معانا فاصل سريع هنطلع فاصل ونأتى لنستكمل معنى الحلم القاهر فى 2050قاهره تانيه خالص خليكوا معانا .
فاصل .
ريهام : بنستكمل مع حضراتكم موضوع حلقتنا النهارده عن التخطيط العمرانى للقاهره مع ضيفنا وضيفكم الدكتور مصطفى مدبولى .. دكتور مصطفى كنا توقفنا عند فكرة تقليل الإزدحام وشكل القاهرة الجديد وبعض المخاوف من عرقلة الخطة الجميله ديه اللى بترقى بالقاهرة وبتعود بها للرياده مرة أخرى كنا ذكرنا الوزارات عندكوا عقبات أخرى كنا قرأنا مثلا عن المقابر عن الجذر النيلية إزَّاى بتتعاملوا مع الحاجات الكتيره ديه عشان ترجعوا بالقاهرة مرة أخرى ؟
د/مصطفى مدبولى : أنا سعيد جدا بهذا السؤال لإنه بيمس نقطه كانت إثيرت أكثر من مره فى وسائل الإعلام المختلفة .. موضوع تعاملنا مع موضوع سواء المقابر أو الجذر النيلية بيأتى فى إطار الجزء الثانى من الرؤية اللى إحنا كنا بنقول عليه القاهرة الخضراء إن تبقى نزود المسطحات المناطق الخضرا ديه أهم حاجه فى موضوع القاهرة 2050 إن أنا بأستغل نهل النيل كمحور ترفيهى مش محور حركه إن أنا بأحاول بقدر الإمكان أخلى دا متنفس للمواطن اللى فى القاهرة إن هو يقدر إن هو يمشى على النيل يقعد فى أماكن ومناطق خضراء ومفتوحة ودا يمكن فيه تخطيط بالكامل .
ريهام إبراهيم : زا ما كنا بنشوف مثلا فى أفلام زمان .
د/مصطفى مدبولى :بالظبط يا فندم إنه مش إحنا نشوف النهارده حركة السياره طغت بصورة كبيره جدا على الوجهة النيلية إحنا بنعمل العكس النهارده بالتخطيط إن إحنا هنقلل حركة السيارات وفيه تصور إن هيبقى الكورنيش إتجاه واحد فقط للسيارات وهيبقى بنقلل عرض السيارات ونزود عرض المنطقه اللى هى المشاه اللى هى على النيل عشان نسمح للمواطن إنه يستمتع بها نيجى لنقطة وقضية الجزر النيلية .. الجزر النيلية فيها مشكلة كبيرة إن إحنا عندنا النهارده مجموعة من الجزر وبالأخص 3 جذر موجودين فى قلب القاهرة النهارده وبالرغم إن كان فيه قرار من مجلس الوزراء صادر إن هذه الجذر تتحول الى محميات طبيعية لكن المشكلة الجوهرية النهارده إن هذه الجذر إبتدت للأسف بتتحول الى نسخه من العشوائيات إبتدى فيه النهارده منشآت كثيره جدا بتظهر فيها بصورة عشوائية وغير قانونية وفكره كان إنها تبقى محمية إن أنا بأحتفظ بيها مناطق حضراء وماحدش يبنى عليها وتفضل كمتنفس للمواطن فالنهارده مع اللى بيحصل وإن الناس اللى موجودين ودول مواطنين وموجودين فى القاهرة ومن حقهم وساكنين فيها بقالهم فترة لكن فى نفس الوقت بيعانوا من مشاكل ماعندهمش ولا مياه ولا صرف ولا خدمات بسبب إن فيه قرارات طالعه محمية طبيعية .
محمد المغربى : وفيه جزر مش عارفه هى بتتبع محافظة إيه أصلا .
د/مصطفى مدبولى :لأ هى كل الجزر الرئيسية ديه تبع محافظة الجيزة الخصاية والدهب والوراق لكن القضية المهمة النهارده إحنا بنقول محمية بسبب إنها محمية مانع البناه وبالتالى ما بوصلش ليها أى مرافق وخدمات فيه مواطنين ساكنين فى هذه الجزر وضعهم النهارده بيقولوا إحنا غير قانونيين مش عارفين ناخد خدماتنا ومعزولين عن القاهرة بسبب هذا الموضوع هذه الجزر ما حدش يقدر يوصل لها يعنى إحنا بنعدى كلنا من فوقيها لكن ما حدش فينا بيقدر ينزل لهذه الجزر .
محمد المغربى : والحل إيه يا دكتور ؟
د/مصطفى مدبولى :كان هدفنا ليها ببساطة شديدة إن أنا أبدأ أطور هذه الجزر إن أنا أطور الحى السكنى اللى فيه ما فيش مواطن يخرج من هذه الجزر المواطن اللى موجود هيفضل موجود بالعكس دا أنا هوفر له خدمات هأوفر له فرص عمل جديده فى الأساس قائمة على فكرة السياحة والترفيه .
ريهام إبراهيم : إنتوا بتتعاملوا كمان مع ثقافتهم فى التفكير هم متمسكين بأماكنهم .
د/مصطفى مدبولى :ما حدش هيخرج ودا اللى إحنا بنؤكد عليه إحنا بالعكس دا إحنا بنقول النهارده دا مواطن موجود ومن حقه إن هو يسكن فى دا مكانه وبقاله جذوره موجوده فيها وليه ملكياته وفيه اراضى موجوده وملك أفراد لكن النهارده هدفنا إن إحنا نحافظ على هدف عام إن أنا عايز أحتفظ بهذه الجزر كمناطق خضراء لل 16 مليون لإن لو سبناها أو سمحنا بالبنى فيها خلاص بينتهى الغرض الرئيسى اللى كنا بنحلم به لهذه الجزر .
محمد المغربى: إسمح لى محتاج منك تعليق على تحذير أطلقه مركز متخصص فى شئون السكن إسمه المركز المصرى لحقوق السكن التحذير بيقول هو بيحذر من مخطط 2050 لمبدأ بيع جزيرتى الدهب والوراق وكورنيش النيل هو سماها للمستثمرون ورجال الأعمال فضلا عن تهجير مواطنين أيضا من أجل المستثمرين الكبار عاوز منك توضيح للناس فى النقطه ديه ؟
د/مصطفى مدبولى :هو يمكن هذا المركز إحنا كنا رحنا عملنا ندوة أصلا بالتعاون معاه بعد ما هو كان أطلق هذا التحذير ورحنا لإن الموضوع إحنا بنتعامل فيه بمنتهى الشفافية أصل فى الآخر القاهرة ديه تخصنا كلنا إحنا كهيئة بنخطط ولا يوجد لدينا أى نوع من التوجهات بالعكس أنا هدفى فى الآخر مصلحة هذا الكيان الضخم فكانت النقطه الواضحة إن النهارده زى ما بأقول لحضرتك هذه الجزر النهارده هى ملك أفراد ما فيش حد هيقدر يجبر الأفراد اللى موجوده هناك وساكنه فى هذه الجزر على بيعها لحد إلا هم نفسهم اللى هيبيعوها فدا حريه شخصيه بالعكس يعنى الدوله مش تقدر النهارده تدخل وتفرض إنها تُباع لمستثمرين أو تروح لإن ديه فى الآخر ملكيات خاصه فبالتالى ما عندناش هذا التوجه ولا إنها تتحول زى ما بأقول لحضرتك باكد لحضرتك هدفنا نحتفظ بغالبية هذه الجزر كمسطحات خضراء وحدائق ونحاول نشجع الناس نفسهم هم اللى يحولوا المناطق اللى هم ساكنين فيها تبقى حاجات سياحية وترفيهية يبدأ يعمل مطعم يقدر يعمل كافيتريا يعمل حاجه تستثمر المكان الجميل جدا اللى موجود المكان دا لا يتكرر إنت فى قلب القاهرة فى قلب النيل مكان مش موجود آخر فهنا ديه الفكره الرئيسية .
ريهام إبراهيم : يعنى عملتوا كده مع الجزر النيلية؟
د/مصطفى مدبولى :تصوراتنا المبدئية إحنا لسه بنخطط ليها تفصيليا لكن خلينا ءأكد على حاجات لن يخرج أو لن يطرد مواطن من هذه الجزر بالنحاول نحتفظ بالمساحة الخضراء الكبيره إنها موجوده ويستفيد بيها ال16 مليون مش تبقى إن إحنا فقط بنعدى عليها .. هل حضرتك حد فينا راح شاف الجزر ديه عمرنا ما نزلنا عليها يعنى لإنها ما بتقدريش إنك توصلى لها .
ريهام إبراهيم : لكن نفس التفكير دا ويمكن موجود بشكل كبير فى العشوائيات عملتوا إيه مع الأماكن المختلفة المهدده بالإنهيار كان فيه حادث طبعا قريب وكان فيه على الصعيد الآخر وحدات سكنيه سلمت فورا للمتضررين أكيد الوحدات ديه كان تم بنائها من قبل ما ظهرتش فجأة وقت الحادثه لكن هو اللى حصل الترتيب عملتوا إيه عشان ما يحصلش دا تانى وخصوصا إن إحنا عندنا أماكن كتير بتتقدمها مثلا أماكن زى إسطبل عنتر ؟
د/مصطفى مدبولى :موضوع تطوير العشوائيات دا بالنسبة لمصر كلها إنه فيه اللى حضرتك أشرت فى التقرير العدد للمناطق العشوائية اللى 1209 منطقه مشكلة العشوائيات ديه باديه من إحنا نقدر نقول من اكثر من 40 سنة فى مصر وموجوده نتيجه لظروف كثيره جدا حصلت إبتدت الدوله تتعامل معاها بصوره جاده يمكن من منتصف التسعينات لما إبتدى يبقى فيه خطة لتطوير المناطق العشوائية وتوصيل المرافق الأساسيه لهذه المناطق العشوائيه لتغليب البعد الإنسانى إن الناس ديه فى الآخر مواطنين مصريين صحيح بنوا بصوره غير قانونية لكن النهارده بقى ليهم حق إن إحنا نوصل لهم المرافق لكن كان معروف لينا إن إحنا تدخلنا بموضوع المرافق إحنا بنحل مشكلة حاله للمواطن وبنوصل له المرافق لكن مش هو دا الحل الأمثل .
ريهام إبراهيم : إن هو زى مُسكِّن .
د/مصطفى مدبولى : بالظبط إحنا بنعالج أولويه أولى للمواطن هو عايز ميه عايز صرف عايز كهرباء فده بنحلها لكن ده ما بيحلش المشكله كلها .
ريهام إبراهيم : يادكتور هو فيه ناس برضه هناك مصممه إنها تتمسك بمكانها فى الجبل ؟
د/مصطفى مدبولى : خلينا أشرح لحضرتك موضوع العشوائيات دا القاهرة بالذات – القاهرة النهارده إحنا وصلنا بالتخطيط ويمكن مع كمان إنشاء صندوق تطوير العشوائيات اللى هو أنشئ سنة 2008 قسمنا العشوائيات فى القاهرة لنوعين نوع بنقول عليه مناطق غير آمنه يعنى بتمثل تهديد لأرواح الناس اللى ساكنين فيها اللى هى منهم منطقة الدويقه اللى أشرت إليها منطقة إسطبل عنتر وعزبة خير الله وبعض المناطق مثلا اللى هى كلها على الحواف الجبليه وجبل المقطم أن إنها النهارده المناطق متهالكه قديمه قوى فى قلب القاهرة تلاقى عشش وديه حاجات قليله لكن برضه موجوده .
ريهام إبراهيم : فى حضن الجبل كمان .
د/مصطفى مدبولى :ديه إحنا قلنا التعامل مع هذه المناطق ما ينفعش النهارده نتيجة إنها بتمثل خطوره كبيره على أرواح المواطنين ما ينفعش إن أترك المواطنين فى هذه المناطق لإن ممكن يحصل فى أى لحظة نفس الحادثه اللى حصلت فى الدويقه منذ عامين فبالتالى إبتدت الدوله تتحرك إنها بتدى لهم بديل فى أماكن مختلفة منهم مثلا كان المشروع اللى حضرتك أشرت إليه اللى هو كان فى منشية ناصر نفسها فى خلف المنطقة محافظة القاهرة عندها برضه مناطق تانيه فى السلام وفى النهضه بتعمل وحدات سكنيه لإن إحنا بنشوف فين الأراضى المتاحة فاضيه عشان نبنى عليها إسكان بديل لإن هذه المنطقه ما ينفعش تفضل فيها إسكان دا الجزء اللى إحنا بنقول عليه غير آمن اللى هى بيوت فى حالة خطوره ومانقدرش نسكت ولازم يبقى فيه بديل آخر للمواطنين مش هيبقى فى نفس المكان مش نقدر نسيبهم فى نفس المكان .
ريهام إبراهيم : خطر عليهم وعلى المحيطين كمان .
د/مصطفى مدبولى :بالظبط .. لكن دا اللى أنا عايز أطمن الناس له إن دول بيمثلوا نسبه قليلة جدا لا تتجاوز 3 : 5 % من إجمالى عشوائيات القاهرة الغالبيه بقى العظمى من عشوائيات القاهرة زى موضوع إمبابه شمال الجيزه ومنطقة مطار إمبابه ديه العشوائيات ديه نوعها إيه نقدر نقول ليها إنها مناطق خططت أهليا الناس هم قسموا الأرض كانت أراضى زراعية ملكهم قسموها وكل واحد إبتدى يبنى بيته لكن نتيجه لإنه ما تمش تخطيطها بصوره حضاريه أو صورة رسمية من الدولة إبتدينا نجد فيها مشاكل إيه الشوارع ديقه قوى مافيش مكان فاضى لخدمات بقة المناطق ديه بتعانى إنها مافيهاش مدارس مافيهاش مستشفيات .
محمد المغربى : يعنى منطقة عشوائية مواصفات المناطق العشوائية .
د/مصطفى مدبولى : بقة فيها مشكلة لكن لما نييجى نبص للبيوت المبنية بيوت خرسانية وحالتها الإنشائية حالتها ممتازه فالتعامل مع هذه المناطق بقى يبقى مختلف إنك إنت النهارده محتاجه توفرى لها خدمات محتاجه تحلى مشكلة الشوارع الضيقه لإن عندك ديه مشكلة لإن لاقدر الله لو حصلت مثلا حريقه حصل أى مشكلة مش هتعرف السيارات تدخل عشان تتعامل مع هذه القضية فكان ده يمكن كان مشروع تطوير مطار إمبابه أو شمال الجيزه هو إسمه شمال الجيزه – منطقة شمال الجيزه ديه عشان نبقى عارفين واحده من أكبر المناطق العشوائيه فى مصر كلها عدد سكانها مليون نسمه .
محمد المغربى : د. مصطفى تسمح لى سريعا قبل ما نروح الحوز العمرانية حجم رأس المال الخاص لشمال الجيزه قد إيه تقريبا ؟
د/مصطفى مدبولى : ما فيش رأس مال خاص فى هذا المشروع – المشروع دا بتنفذه الدوله بالكامل تكلفه تصل الى 4 مليار جنيه .
محمد المغربى : نتحول الى الحوز العمرانية وخطة الهيئة لإعداد خريطة جديده للقرى والنجوع تقابله فعلا تحدى فى هذا المجال نعرف إن الصعاب كثيره جدا .
ريهام : بس الأول تشرح لنا الأحوزه العمرانيه ؟
د/مصطفى مدبولى : حاضر .. كلمة حيز عمرانى عشان بس يبقى المواطن عارف هو الحدود اللى بنرسمها لأى مدينه أو قرية إن يبقى جوه هذا الحيز أو الحجم مسموح بالبناء الأراضى اللى جواه تبقى مبانى إنما لو براه تبقى مازالت أراضى زراعية فبالتالى ديه كانت فكرة كلمة حيز عمرانى هو خط بنعمله بنقول اللى جوه مبنى أراضى بنى واللى بره تفضل أراضى زراعية .
السيد رئيس الجمهورية فى 2005 ضمن البرنامج الإنتخابى له لما أطلق أحد أهم محاور هذا البرنامج إعادة تخطيط 4 آلاف قريه مصرية أو إعداد أحوزه عمرانية جديده ل 4 آلاف قريه مصرية أنا عايز أقول نقطه مهمة إن كل قرى مصر اللى هى حوالى 4600 قريه منذ نشأة مصر من آلاف السنين لم تخطط على الإطلاق كانت خارج كل أطر التخطيط والبناء بمعنى إن المواطن فى هذه القرى كان المواطن نفسه هو اللى بيبنى وهو اللى بيطلع من غير ولا رخص بناء ولا أى تخطيط عشان بس نعرف حجم التحدى اللى إحنا وجهنا به كهيئة فى هذا الموضوع .. عشان كده كانت بنشوف القرى بتاعتنا عشوائيات والنمو العشوائى ويمكن كان التدخل فقط الدوله كان بقوانين الزراعة اللى بتحاول إنها تحد من المبناء على الأراضى الزراعية وما تنميش هذه القرى .. اللى عملناه ببساطه شديده إن إبتدينا نتعامل مع هذه القضية لإن المواطنين كانوا إبتدوا طبعا بيبنوا لإن الزياده السكانية بتحصل وإبتدى وضعهم غير قانونى مئات الآلاف من القضايا قدام المحاكم ما بين الدوله والمواطنين اللى بنوا خارج الإطار الرسمى لهذه القرى فدا كان الفكر بتاعنا إن إحنا نبدأ نقنن أوضاع هذه القرى إحنا كان عندنا 3,5 مليون أسرة وضعهم غير قانونى فى الريف المصرى فإبتدى من خلال المخططات الجديده لهذه القرى بنعمل لأول مره مخططات للقرى المصرية مش فقط على الوضع القائم وتستوعب القائم ولكن كمان ل 20 سنة قدام إزَّاى القريه المصريه تنمو بصوره مخططه وغير وعشوائية عشان دا جزء من إن إحنا إزَّاى نحد من العشوائيات – الحمد لله يمكن دا كان الفِكر بتاعنا إن إحنا كان ننتهى به نهاية 2011-2012 إستطعنا إن إحنا ننتهى من هذا المشروع قبل الخطه المحدده ديه بسنتين يعنى إنتهينا منه فى 2009 ودا سمح لنا نبدأ فى العزب والتوابع اللى كانت للقرى اللى إحنا بنتكلم على 27 ألف عزبه وتابع دول برضه لا يوجد لديهم أى تخطيط ولا أى شيئ بالتوازى مع ده بنعمل مخططات أيضا وأحوزة كل مدن مصر هو حجم شغل غيرعادى يعنى إحنا – عشان بس حضراتكم تعرفوا فيه أكثر من 12 ألف خبير ومهندس على مستوى الجمهورية بيعملوا فى هذا الموضوع .
ريهام إبراهيم : لأ وتخطيط القاهرة أو تخطيط القرى هو طبعا حجم شغل غير عادى بنتمنى يعنى ما نُفِّذ إن شاء الله يكتمل على خير وما لم يتم تُنفيذه يترجم سريعا الى أرض الواقع دكتور مصطفى مدبولى بنشكر حضرتك جدا ونتمنى لكم التوفيق مره ثانيه .
د/مصطفى مدبولى : شكرا .. شكرا يافندم .
محمد المغربى : شكرا يا دكتور مصطفى على الحلم الجميل اللى إحنا عشناه عشنا نصف ساعه فى قاهرة 2050 صحيح إن بعد خمس دقائق هننزل الشارع ونبقى فى 2010 ولكن نحيا بالحب شكرا جزيلا وشكرا لكم مشاهدينا الكرام على وعد بلقاء يتجدد فى يحدث فى مصر .