يحدث في مصر

محمد موافى : مشاهدينا أهلا بحضارتكم فى حلقة جديدة من يحدث فى مصر .. يمكن فى حلقة سابقة إتكلمنا مع المهندس عمرعسل رئيس الهيئه للتنمية الصناعية ومحاولات الهيئة إعادة شعارصُنع فى مصرمرة ثانية.
ريهام إبراهيم : إحدى هذه المحاولات الجادة لإعادة هذا الشعار مرة أخرى كانت فى مشروع المطورالصناعى هنتكلم النهارده عنه بشكل أكبروعن مراحلة الأربعة لأن الهيئة الحقيقة طرحت 42 مليون متر مربع فى مراحل المشروع ودا كان لإقامة مناطق صناعية بنظام المطورالصناعى وكان بإستثمارات متوقعة الإستثمارات بتفوق 85 مليار جنيه هنتعرف عليها بشكل أوسع من خلال ضيفنا وضيفكم النهارده فى يحدث فى مصر فى الإستديو .
محمد موافى : وهنتكلم برضه يا ريهام عن فكرة إستغلال الرمله السوداء – الرمال السوداء بمنطقة البرولوس واللى بتقدرإستثماراتها بنحو 125مليون جنيه وعن المنطقة الحرة بسيناء وشكل الصناعات المستقبلية فى البقعة الغالية جدا علينا كلنا .
ريهام إبراهيم : نرحب معاكم مشاهدينا الكرام بضيفنا المهندس عمرعسل رئيس هيئة التنمية الصناعية أهلا بحضرتك يا فندم .
م/عمر عسل : أهلا بك يافندم .. أهلا بك .
محمد موافى : أهلا وسهلا باشمهندس نبدأ بس نشوف التقرير ونبدأ الحوار مع حضرتك .
عمر : إتفضل يا فندم .
فاصل " تقرير "
يهدف المطور الصناعى الى توفير مزيدٍ من الأراضى الصناعية المرفقة والمجهزة للإستثمار دون تحميل ميزانية الدولة أى أعباءٍ جديدة
"م / مجدى العراقى رئيس الإدارة المركزية للمناطق الصناعية الخاصة : دور الهيئة مع المطورين الصناعيين هو متابعة التنفيذ للمطور الصناعى والإشراف عليه والإشراف على تنفيذ البرنامج الزمنى اللى هو بيديه لنا بحيث إن هو كل الإلتزامات التعاقدية اللى بينه وبين الهيئة بيقوم بتنفيذها ."
وقت تشغيل المصانع التى ستقام فى مناطق المطورين وجزب المزيد من العمالة فى تلك المصانع تستهدف هذه المرحلة من إنشاء جيل جديد من المناطق الصناعية بمظام المطور الصناعى تطوير وترفيق 22مليون متر مربع بإستثماراتٍ تبلغ 37 مليارجنيه وذلك لإنشاء مناطق وتجمعات صناعية تستوعب المزيد من الإستثمارات فى قطاع الصناعات الخفيفة والمتوسطة المتخصصة فى التصديرمما يؤدى الى زيادة الصادرات المصرية .. ويظل للمطور الصناعى دورٌ هام فى إقامة تجمعات صناعية متخصصة على مستوى عالمى وتوفير خدماتٍ صناعية متميزة للمستثمرين وتأهيل الكوادر البشرية على أساليب التصنيع الحديثه مما يضع مصر على طريق الدول المتقدمة الصناعية .
فاصل
ريهام إبراهيم : باشمهندس عمر بنرحب به مره ثانيه معانا الحقيقه شوفنا دلوقت فى التقرير إن المطور الصناعى له أهداف كبيرة جدا زى ما كان ختام التقرير بيضع مصر فى وسط بمعنى أوضح الدول المتقدمة وبيضعها فى الصف الأول إيه رأى حضرتك نوضح بصورة أكبرما هوالمطورالصناعى وأهدافه ؟
م/عمرعسل : المطور الصناعى هو نظام مشاركة بين الحكومة والقطاع الخاص فى إنشاء مناطق صناعية جديده ودا لأول مره يتم فى مصر ودا جزء من السياسة اللى حطها المهندس لاشين هو لازم نمشى بسرعة ونمشى بسرعة أكبر من قدراتنا الحكومية إحنا قدراتنا الحكومية على التنمية حوالى 2 مليون متر ممكن ننميهم بمواردنا الذاتيه ولكن إحنا إحتياجاتنا لتنفيذ خطة ألف مصنع كانت 10 مليون مترمربع مرفقة وبالتالى الفرق ما بين 10 مليون و 2 مليون
محمد موافى : 8 كتير قوى .
م/عمر عسل : 8 كتير ..درسنا تجارب العالم أول ما بدأنا رحنا اليابان ورحنا فييتنام ورحنا بلاد أخرى ندرس إزَّاى نجحوا ماليزيا نجحت إزَّاى فييتنام نجحت إزَّاى الصين فى الحقيقة 80 % من بلاد العالم كلهم دعوا الى برنامج المطور الصناعى بمشاركة حكومه مع قطاع خاص لإنشاء مدن صناعية ماقلش الحكومة هى اللى تنشأ مناطق صناعية بقى القطاع الخاص هو اللى بينشأ مناطق صناعية بقى متخصص ليه بيعلم كده لأن فى ماليزيا الماتيرمحمد قال لنا عشان أنجح على بال ما أدعو المستثمرالأجنبى ييجى وأشجع المستثمرعندى على القدرات الماليه عندى ما أقدرش لما جيه مستثمرعندى يابانى ومن سنغافورا ومن البلاد الأخرى قدر ينشأ مناطق صناعية وينزل بالمستثمرين الخاص ببلاده ويحط إستثمارات من جيبه هو وسرع عملية التنمية .
محمد موافى : يعنى إحنا بندى لهم الأرض .. بندى مستثمركبيرالأرض وبنوصل له المرافق بره .
م/عمرعسل : إحنا دلوقت بندى المستثمرأرض بحد أدنى مليون متر أو 2 مليون متر أو أكبر وبنديهم مرافق زى ما إنت قلت على وش الأرض مياه وصرف وكهرباء على بداية الأرض ثم هو ينمى الأرض اللى جوه ينميها يعنى إيه يستثمرر ويمول إنشاء المرافق وإنشاء المصانع وبهذه الأراضى والمصانع اللى موجوده وإدارة المنطقة وإعطاء خدمات جديدة ما كنتش موجوده قبل كده .. يعنى مستثمر عايز عُمال يقدر يدى له عماله مدربه .. مستثمر عايز تمويل فيه بنوك موجوده .. عايز مراكز تكنولوجيا وإختبارات ممكن المركز دا موجود جوه المنطقة بوليستيه موجوده عاوز يشحن للعالم الخارجى ممكن يقدم له الخدمات ديه ويشحنها له عايزين عمال يسكنوا يقدم مساكن للعماله وديه حزء من مشكله .
محمد موافى : دا دورالهيئه جوه .
ريهام إبراهيم : وفرت لهم كل الحاجات ديه؟
م/عمر عسل : بالظبط
ريهام إبراهيم : يعنى المستثمردا عايز رقابه ما هو لازم يدى لى إنتاج وإلا كدا يبقى فيه عدم إستغلال للمشروع ويبقى فيه مردود سلبى .
م/عمرعسل : الأرض يعنى .. فى الحقيقة الفكرة بتتحط على 8 شهور لقينا المستثمرين العالميين كلهم ييجوا يقعدوا معانا وحطينا فكر الدول الأخرى ووصلنا الى شروط الحكومة عايزة إيه من المستثمر أو المطورالصناعى والمطور عايز إيه من الحكومة المطور عايز الحكومة تدى له مرافق وتلتزم بها وتسهل له إجراءات وتراخيص للمستثمراللى عنده هو إحنا عايزين منه كحكومة كوزارة التجاره أو الصناعه أو هيئة التنمية الصناعية عايزينه يلتزم بالتنمية فى وقت معين يقدم الخدمات المطلوبه منه ويبيع الأرض بثمن تحت رقابة وزارة التجاره والصناعة .
ريهام : بس حصل يا فندم إن فيه ناس أخذت الأراضى وماقدمتش إنتاج .
م/عمر عسل : لأ أنا ما أعرفش الناس ديه .
ريهام إبراهيم : يعنى هل الأراضى سحبتوها ؟
م/عمرعسل : لأ فيه أراضى صناعية سحبناها ديه أراضى إحنا بنخصصها فى مدن الصناعية التاريخيه التقليدية بتاعتنا – المطور الصناعى ديه حاجه تانيه فعشان نخلص موضوع المطور وبعدين نرجع لموضوع سحب الأراضى .. المطور ده مستثمر زى فى مصر ما بدأنا فى المشروعات العقارية كل المشروعات العقاريه اللى فيها إسكان ديه تمت عن طريق مطور عقارى أو المشروعات السياحية تمت عن طريق مطورسياحى دا مطور صناعى بياخد أرض مليون متر بيرفقها .
محمد موافى : باشمهندس عشان تبقى الصوره واضحه فيه مشروع بالفعل بدأ ؟
م/عمرعسل : إحنا عندنا 12 عقد تم توقيعهم لحاد النهارده فيه 5 بدأو التنفيذ فى أرض الواقع كمرافق وكطرق وميه وصرف وكهرباء ومبانى إدارية وخدمات ومصانع تحت الإنشاء .
محمد موافى : فين يا فندم ؟
م/عمر عسل : فى 6 أكتوبر وفى العاشر من رمضان المفروض المصانع ديه تشتغل فى 2011 – 2012 فيه مصانع قبل الميعاد بدأت فى 2009 و1010 اكثر من 7 مصانع تحت التشغيل والتصدير .
محمد موافى : فيه حد بيتفرج علينا دلوقت يقول طيب هى اكتوبر ولا العاشر محتاجين إن إحنا نديها لحد يركب لها مرافق دا هى بقة وسط البلد يعنى ؟
م/عمر عسل : خلينا أقول لك تانى إمكانياتنا المحدودة إحنا النهارده إمكانياتنا نرفق 2 مليون متر كل سنه إحنا لسه عندنا بعض الأراضى فى بعض المدن الصغيره ديه بقالنا 4 سنين بنرفق فيها والمستثمر مستنى المرافق عشان يبنى المصنع أحنا مش عايزين نخش فى الدورة ديه ناخد أراضى غير مرفقه والمستثمر يستنانا ما بينيش المصنع والعمالة ما تشتغلش ونقعد نتفرج على بعض ونقول إحنا كدا كويسين لأ عشان نوفر 10 مليون متر كان عندنا هدف مهم فى وزارة التنمية والصناعة إنه التنمية لازم تكون متوازنه على مستوى مصر كلها ما نركزش على 6 اكتوبر والعاشر من رمضان وبالتالى كل التمويل اللى جاء لنا من وزارة المالية بالكامل لم يضخ منه جنيه واحد فى القاهره أو الإسكندرية كل التمويل راح للصعيد وراح للدلتا وراح لسينا وراح للوادى الجديد ونتج عنه 830 مشروع جديد جم نتيجة إن ضخينا مليار و450 مليون جنيه فى 33منطقه صناعية فى 24 ومحافظة اللى إحنا إتكلمنا عليهم إمبارح .
ريهام إبراهيم : كان المبلغ دا مخصص للصعيد ولا كان مخصص لأكثر من محافظة وتم إختيار الصعيد ؟
م / عمر عسل : فى 24 محافظة وخصصنا 50% منه للصعيد فالصعيد فيها20% من السكان المفروض يأخذوا 20% من التمويل ولكن عشان التوجه للصعيد أكثر وإنه ما أخذش حظه من التنمية كان توجيهات الوزارة 50% من هذا المبلغ يروح للصعيد نتج عنه مشروعات بنى سويف والمنيا فوقعنا دلوقت 5 عقود محمد موافى : للمطور الصناعى ؟
م / عمر عسل : مشارعنا القطاع الخاص مع الحكومة فى انشغالات الصناعية 5 عقود إتمضت المطور الصناعى بنى المرافق بتاعته فيها أكثر من 94 مشروع تحت الإنشاء النهارده 7 إشتغلوا أنا بأقول الكلام دا فى اول سنتين إحنا مضينا عقود ثانيه وصلنا 12 عقد فييتنام اللى أنا بأتكلم عليها اللى زرناها من 3-4 سنين فيها 152 منطقة صناعية عن طريق المطور الصناعى بتصدر من هذه المناطق أكثر من 140 مليار دولار تصدير من هذه المناطق إحنا لما نجحنا مع وزير الصناعه المهندس رشيد لما بيقول إحنا كنا فى مليار دولار لصادرات 2002 وصلنا الى 14 مليار عام 2009 نجاح كبير بس لسه المشوار طويل .
محمد موافى : ال8 مليون متر الفرق ما بين قدرات الحكومة وطموحهاال12 عقد دول ؟
م/عمر عسل : القطاع الخاص .. دول 17 مليون متراللى هم يغطو إحتياجاتنا فى سنتين بالظبط دول ال3 مراحل اللى طرحناها المرحلة الرابعة طرحنا فيهم 24 مليون متر لأراضى المناطق الصناعية الجديدة و20مليون متر لأراضى خدمات لوجستيه ومخازن – ففى 42 متر جداد طرحنهم مرحلة رابعة للمستثمرين تقدم لينا النهارده 17 شركه مصرية وأجنبية وصينية بإنشاء مناطق صناعية لهذه الأراضى لما تتخيلى ان فيه 17 منطقة صناعية جديدة بتنشأ وفيه 12 قدام المتوالية سريعة جدا جدا إنما إحنا على قدراتنا الأولانية كنا هنستنى الفلوس ونوجهها للقاهرة وإسكندرية على حساب تنمية الصعيد والدلتا والوادى الجديد وسيناء ما عدش ينفع الكلام ده التنمية متوازنه مهمه تنمية الصعيد مهمه وبالتالى المشاركة هى الحل العالم كله 80 % مناطق صناعيه فى العالم لجأت لهذا الإسلوب ونجحت به عن هذا المشروع يمكن لو رحنا 6 اكتوبر نزور هذه المشروعات هنلاقى نجاح كبير تم لحاد النهارده العاشر من رمضان تم نجاح كبيرالهدف الجديد برج العرب والسيدات يخشوا معانا وفيه منطقه صناعية كبيره جدا تم الموافقه عليها 30 مليون متر فى الفيوم دا لسه من 3 شهورأخذنا الموافقة عليها إننا نعمل دراسات وتكلفة المرافق الرئيسية وإسلوب طرحها بنظام التطور الصناعى عشان نخلص وننميها فى وقت قصير وبأنزل بها إستثمارات .
محمد موافى : ديه لم يتم الاعلان عليها ؟
م/عمر عسل : دا تحت .. حاليا يمكن خلال 3 شهور يتم الإعلان عن هذا المشروع فى الفيوم لإن دا هيبقى محور بديلى ل 6 أكتوبر – 6 أكتوبر أكتملت بالكامل ماعدش فيه أراضى مطروحه عندنا ولا متاحه خلصت فالبدائل .
محمد موافى : بتنسحب ؟
م/عمر عسل : أراضى تنسحب نتكلم بقى عن الأراضى إحنا فى مصر عندنا 16 منطقة صناعية تبع هيئة المجتمعات العمرانية الجديده و64 منطقة فى المحافظات مصر كلها من 4 سنين لما بدأنا نشتغل نوفر أراضى لمشروع ألف مصنع وإزاى ننجح كان فيه حديث مع الوزير وزع الوزارة وكل إخوانا فى الهيئات الأراضى موجودة مع ناس فى العاشر من رمضان و6 اكتوبر والقاهرة الجديدة جزء منهم ما عملوش حاجه جزء عمل بس الناس تيجى لنا عايزين أراضى نقول لهم ما فيش .
ريهام إبراهيم : هو مش لهم توقيت يا فندم إذا ما عملوش لحد هذا اليوم خلاص يسحب منه ؟
م/عمرعسل : فيه توقيت وهيئة المجتمعات العمرانية كان ليها 3 سنين المكتسب يكون عمل مصنع يإما تنسحب منه لما ييجى يسحب منه الأرض لما نيجى نسحب منه الأرض اللى ما عملش عليها حاجه يخش فى قضاء – القضاء بتاعنا طويل شويه فيه قضاء إبتدائى وإستئناف ومعارضه ممكن يقعد من 5 سنين الى عشر سنين الى عشرين سنه الأرض – الأرض معاه والحكومه بتقول له هات الأرض الخلافات شغَّاله مش عارفين نسحبها ونديها ونديها واحد تانى فبقة أزمه كبيره .. كل هذه المعادلات الصعبة إتحلت 4 سنين بنقول حلناها بنقول إن فيه قرارات وزارية المهندس رشيد طلعها وكان مهم جدا .
ريهام إبراهيم : المهلة مثلا بقة قد إيه دلوقت اللى ممكن إن هو يأخذها وإذا لم يتم الإنتاج فيها تسحب منه ؟
م/عمرعسل : هنتكلم على ملفين ملف سحب من الناس اللى أخذوا أراضى وماعملوش بها حاجه وملف تانى هو تخصيص أراضى جديده بقواعد جديده لأول مره اللى هى بالقواعد الجديه وملائم ماليه ديه إسمها خطاب الضمان – تسمعى مشاكل كتيره الهيئه حطه أرقام كبيره مليون جنيه وأنا أجيبهم منين .
محمد موافى : أيوه يا باشمهندس بس ما هو مليون جنيه مبلغ كبير .
م/عمرعسل : أنا فاهم هأدى مثال واضح عشان المبدأ دا المهم فرصه النهارده نوضحه للجميع النهارده المستسثر بيأخذ الأرض 3 سنين وبيأخذها مدعمة من الدوله .
محمد موافى : يعنى انا مستثمر وماعييش مليون جنيه .
م/عمرعسل : إنت مش مستثمر أنت راجل مذيع جيد يعنى إنما إن شاء الله لما يبقى فيه مليون جنيه هتبقى مستثمر .. النهارده الأرض بتأخذها من الدوله مدعمه ب 100 جنيه أو 140 جنيه مقدم تسهيل عملته وزارة الصناعة ووزارة الإسكان ساعدتنا فيه حتى تلاقى فيه علاقه بين الوزرات بينها وبين بعض هذه الأراضى ملك هيئة المجتمعات العمرانيه الجديده السيد وزير الإسكان المهندس رشيد والحكومة سهلوا الأرض 140 جنيه فى 6 اكتوبر أو فى العاشر من رمضان 14 يوم مقدم 3 سنين سماح والباقى على 7 سينين هنكمل بعد ال7 سنين
محمد موافى : دا موضوع مهم .
م/عمرعسل : إتفضلى يا فندم .
ريهام إبراهيم : وهناخد فاصل فى حلقتنا النهارده .. ونستكمل معكم حديثنا عن المطور الصناعى مع المهندس عمر عسل .
فاصل
محمد موافى : مشاهدينا أهلا بحضراتكم مره ثانية مازال حديثنا متواصل مع المهندس عمر عسل رئيس الهيئة العامه للتنميه الصناعية بنتكلم عن المطورالصناعى وكنا يا ريهام بنتكلم عن سحب الأراضى وخطاب الضمان والقصه .
ريهام إبراهيم : مليون جنيه .. إنه عائق كبيرأمام المستثمرين وممكن يؤدى لهروبهم – هو مش عائق لو زعمت إنه مليون جنيه حضرتك كنت بتتكلم عن كدا ياريت تستكمل حديثك .
م/عمر عسل : الحقيقة فيه فجوة ما بين سعر الدولة اللى بتديه لمستثمر صناعى أراضى مدعمه وبين إن حد بيأخذ الأرض ويبيعها سوق سودا بأضعاف هذا المبلغ وفى النهاية المستثمرالحقيقى بأخذ الأرض غاليه جدا ومكلفة ودورالدولة إنها توصل الدعم لمستحقية زى القمح زى الدقيق زى أى دعم الدوله بتديه .. فى العالم كله طالما فيه فجوه ما بين سعر مدعم وسعر حر فيه ناس بتطلع تستغل هذه الفجوة كان دورنا إن إحنا نوصل المشروع الصناعى بتكلفه منخفضة مدعمه للمستثمر الصناعى عشان تكلفته تقل ويعرف ينافس المنتج العالمى فى أى حته فى العالم دا كان الهدف الأساسى – عشان نعمل كده ونحل مشاكل من 20 سنه إحنا بدأنا الهيئة لقينا عندنا 4240مشروع صناعى فى مصر عدى عليهم 3 سنين وما إشتغلوش بمعنى أخذوا أراضى ركنوها .
محمد موافى : لم يثبتوا جديته ؟
م/عمرعسل : سواء أرض فاضية أو بنى جزء وماكملش المشروع وبالتالى كان فيه أزمة لما هيئه المجتمعات طلبت تسحب الأراضى طبقا للقانون فبتخش فى قضاء وقت طويل جدا وبالتالى بقى عندنا أزمة كل الناس تقول عايز أعمل مصنع عايز أشغل عمالة وانا أقول ما عنديش أرض والأراضى فاضيه قمة المأساه فى الحقيقه الوزير طلع قرار حاسم بيقول إنه ممنوع على الجهات الحكومية تتعامل مع أى مشروع صناعى عدى عليه 3 سنين الكلام دا طلع شهر 7 سنة 2007 ومنذ هذا القرار حتى النهارده تم إنضباط كامل لكل هذه المشروعات
ريهام إبراهيم : الضوابط والقواعد عندما توضع لحماية حقوق الطرفين من الضرورى أن يتم إحترامها .
م/عمرعسل : أخطر حاجه إن أنا أوقف أراضى الدولة عملاها للتنمية الى 20 سنه أوقف التنمية .
محمد موافى : عندما أعلنتوا الشروط ديه إن المفروض اللى بنى 5% على الأقل ييجى ويحدد مده ويدفع .. يعنى الكلام دا هل كل الناس عرفته ؟
م/عمرعسل : أعلن فى جميع المدن جمعيات المستثمرين وإنت فى كل حته بيشتكوا خطاب الضمان ديه الشكوى اللى موجوده بس هى الإسلوب الوحيد اللى قدرنا نحقق به جديا وننجز به مشروعاتنا ويبقى الجدية متبادله الأراضى الجديدة خطاب الضمان اللى بمليون جنيه اللى حضرتك إتكلم عليه ده دا موضوع ثانى لما كنا بندى أراضى للناس مدعَّمة بيدفع 10 جنيه فى المترمقدم ويأخذ أرض الف متر مثلا – بيدفع 10آلاف جنيه ويأخذ أرض ألف متر ينام عليها برضه مده طويلة أو يبيعها ويكسف فيها ملايين ويعنى لو باعها ب500 جنيه يكسب نصف مليون جنيه وهو دفع 10 آلاف جنيه والمستثمر الجديد عليه أعباء كبيره الحاجه غاليه فالحل خطاب الضمان اللى هو بيقول إيه بدأنا الفكر قلنا له يدفع 50 جنيه على المتر يعنى إيه 50 جنيه على المتر المصنع الألف متر بيتكلف حوالى 3-4 مليون جنيه عشان يتعمل مصنع التر بتكلف 3 آلاف جنيه فلما أخذنا 50 جنيه خطاب ضمان بنقول له إحنا عايزين منك معيار جديه بس بتقول إنك إنت خلال سنه تعمل أساسات للمصنع بعد سنه هنرجعه له ثانى ف 50 ألف جنيه بالنسبة ل3 مليون جنيه رقم ولا حاجه دا على الألف متر فلو أخذ 100 الف متر هيدفع 5 مليون جنيه .
محمد موافى : لو أخذ المساحة دية ياريهام لازم هيبقى قادر يدفع .
م/عمرعسل : كل المناطق بتبقى 200 مليون جنيه بتكبر .
ريهام ابراهيم : يعنى ديه أحدى النقاط اللى نقدر نقول إنه تم وضع حل ليها لإحترام الموقف بأكمله سياسات أخرى ممكن تكون عاثق آخر أمام المستثمرين سياسات بيتم إتهام الهيئة بأنها بمثابة تحديات إيه مشكلة المستثمر العربى ومشكلة مكورات الحديد ؟
م/عمرعسل : مكورات الحديد هى نشاط تسييف الطاقة أما الحكومة أعلنت من 3 سنين وزارة التجارة والصناعة عن إحتياجها لمشروعات الحديد لتعميق التصنيع المحلى علشان – الحديد التسليح فيه عندنا 22 مصنع بينتجوا 9 مليون طن أو 8 مليون طن أكثر من إحتياجاتنا بس فيه مشكلة فى الفجوة فى البلد الخامات اللازمة لتصنيع الحديد وبالتالى كان سياسة تعميق تصنيع محلى هو دا السياسة اللى أعلناها وزارة التجاره والصناعه المهندس رشيد وادينا فعلا 6 رخص لمشروعات صناعية فى هذا المشروع منهم شركات تعمل (الدى آر والبلت ) اللى هو الحديد المختزل ومربعات الحديد ومشروع يعمل المكورات اللى هى الخامات اللى بتيجى من الجبل ويطلعها الى مكورات تخش فى صناعة الدى آر .
محمد موافى : اللى بيبدأ الموضوع .
م/عمرعسل : آه إدينا رخصتين فى هذا المشروع رخصة المستثمر كمل الرقم بتاع الرخصة 108 مليون جنيه فيه مستثمرعربى أخذ هذه الرخصة والمستثمر الثانى ما كملش التأمين بتاعه وبالتالى ما أخذهاش فاللى دفع الإلتزامات بتاعته الماديه طبعا للمعلن أخذ الرخصة وبيدور على موقع عشان يبدأ فيه المصنع بتاعه المصانع الثانيه إشتغلت وتحت الإنشاء مشروعات كتيره جدا فى الحديد فى الأسمنت 13 مصنع بيشتغلوا ومصنعين لسه .
محمد موافى : بس هنا يا باشمهندس عايزين نأكد على حاجه هنا دا قانون أوإجراءات أو قواعد على الكل على مصر وعلى أى جنسية ثانيه مش زى ما بنسمع إن بنتشطر على المصريين والتانيين بنسيبهم دا المسألة واضحه ؟
م / عمر عسل : لا..لا..لأ أبدا مستثمر عالمى دفع 340 مليون جنيه طبقا للمزايده اللى تمت ومعلنه الآخ 108 مليون دفع 108 مليون الأخ الثانى ما دفعش يعنى إحنا بنحترم وجهة نظره لكن المستثمر الجاد دفع وإلتزم بالقواعد المعلنه للجميع فمكانش فيه مشكله خالص يعنى .
ريهام إبراهيم : المشاكل لما بتكون موجوده بتحتاج زى ما حضرتك ذكرت ضوابط وقواعد وممكن كمان لقوانين للأحكامها قانون الصناعة الموحد لو حضرتك تديى لنا ملامح رئيسية عنه وأد أيه أدى صلاحيات لإتخاذ القرار؟
م / عمر عسل : دورنا فى وزارة التجاره والصناعة وهيتئة التنمية الصناعية مراجعة القوانين اللى موجوده وإزَّا نبسط الإجراءات بعض هذه المشاكل اللى الناس بيعانوا- فيه مشاكل - والناس بتعانى من تعدد الجهات وتعدد التراخيص من عدة جهات لازم نوحدها ونقلل الإجراءات فبعض هذه الإجراءات تم فعلا القرارات الوزارية لتبسيطها فيه 420 قرار وزارى تم إصدارهم لإغاء قرارات وزارية قديمة بتعوق الإستثمارالمهندس رشيد طلعهم فعلا والجزء الباقى هو تعديل القانون – قانون الصناعة بيتكلم على رخص تشغيل رخص بناء على سجل صناعى على إنضباط المستثمر الصناعى وإلتزامه بالقواعد والمواصفات والجودة والتحديث - القانون الجديد بسط هذه الإجراءات وادى قواعد جديده لرخص التشغيل اللى الناس بتعانى منها ومقترح إلغاء رخصة التشغيل بالكامل ووضع وثيقة تأمين بديله ليها والسجل الصناعى فى وزارة التجاره والصناعه عندهم مشروع قانون لتوحيد جميع السجلات يبقى السجل التجارى هو بس اللى بيطلع وفيه كل السجلات الأخرى داخل هذا السجل التجارى الموحد .. فيه جزء خاص بحوافز لمشورعات تشييد الطاقه .. فيه حوافز لتصنيع الصالات المعدنية فيه جزء خاص بالتكنولوجيا فيه جزء خاص بتبسيط الإجراءات والرخص الموحده .. فيه أساليب كثيره جدا للمستثمر الصناعى لكل اللى إحنا.
محمد موافى : عانينا منه الأماكن الكتيره اللى كان ممكن الواحد يروحها كتير قوى يخلص حاجه .
م/عمرعسل : والجهات كتيره قوى ممكن جهة واحده قدر تدى هذه الإجراءات بدون رجوع المستثمر لعدة جهات وبالتالى وإدى قوى للجهات منشأة بقرار جمهورى إنها تدى قواعد مهمة وإدى حاجه مهمة قوى عقوبات .. العقوبات اللى عندنا اللى ما عندوش سجل صناعى أو رخصة بيدفع 100 جنيه غرامه وبالتالى هو بيخالف لما تروح تقول له إدفع 100 جنيه يقول لك خد 100 جنيه وبخالف ومن تحت السلم وبأشتغل من غير رخصه وبنعانى من عدم الإنضباط والقواعد .. تشديد العقوبات بتساعد المصانع المنضبطه اللى بتشتغل تحت مظلة القانون عايزه الحكومه تحميها من المصانع الغير منضبطه وبالتالى المستهلك المصرى أو اللى بيأخذ منتجات غير مضبوطه إن ما كنتيش هتخضعى للراجل اللى بيعمل مواصفات غلط أو متهرب وبالتالى تشديد العقوبات كان حزء مهم فى نجاح السياسة الصناعية .
محمد موافى : بقى العقوبات قد إيه يا فندم ؟
م/عمرعسل : بتختلف حسب المخالفه ومتدرجة.
محمد موافى : يافندم من القانون دا فيه مشروع تانى مشروع مهم اللى هو صندوق تطوير وترفيق المناطق الصناعية إيه دورالصندوق ؟
م/عمرعسل : دور الصندوق بالتحديد مساعدة المناطق الصناعية فى التنمية ووضع جميع الحوافز المطلوبه اللى تساعد فى نجاح الصناعة فى هذه المناطق وهذا الصندوق إجمالى الدعم اللى أخذه لحاد النهارده مليار و450 مليون جنيه وكان هدف الصندوق هو توفير المرافق زى ما قلنا يمكن للمناطق اللى محتاجه تنمية مرافق ودا دعَّم 24 محافظة فى 33 منطقة صناعية لإستكمال المرافق اللى فيها وزى ما قلنا إهتم بالصعيد ب750 جنيه والدلتا والوادى الجديد وسيناء وبالتالى عن طريق هذا الصندوق قدرنا نوفر المرافق اللازمة لجذب الصناعة هناك ..النهارده لو رحت جمصه هتلاقى منطقة صناعية كبيره المرحله الأولى والثانيه والثالثه والرابعه وحاليا والخامسه والسادسه تحت الإنشاء ما كنتش موجوده قبل كده لو رحنا فيه إسماعيليه منطقة أبو خليفه – لو رحنا بنى سويف كوم أبو راضى ما كنتش موجوده قبل كده .
محمد موافى : الصندوق له دورفى الأماكن ديه ؟
م/عمرعسل : طبعا هو اللى بيمول إنشاء هذه المناطق اللى الدولة دورها موجود .. لما إتكلمنا عن المطور الصناعى عملنا إيه الفلوس بتاعة الصندوق توجه الى محافظات للتنمية والمطور الصناعى شاركنا فى القاهره وإسكندريه مناطق جاذبة الإستثمار هواللى مولها وبالتالى مثلا لحاد النهارده إستثمارات ب10 مليار جنيه إتحطت من المطورين الصناعيين وإحنا وجهنا إستثمارتنا الى الصعيد والدلتا .
محمد موافى : اللى هى أقل جذبا ؟
م/عمرعسل : دورالحكومة تروح الصعيد تروح الجهات الأقل جذبا والمطور يورح المنطقة الجاذبة هو اللى يمولها مش إحنا اللى نمولها مع تحديد سعرالبيع ب 200 متوسط بحد أقصى 270 جنيه وبالتالى فيه تحكم من الوزارة طبقا لتوجه المهندس رشيد الى سعر البيع للمستثمر الصناعى عشان ما يعلاش ويؤثر على النمو الصناعى وإحنا نروح .. الصعيد الأرض ببلاش – السيد الرئيس مدى قرار الأرض ببلاش فى الصعيد حافز لجزب إستثمارات ما ينفعش واحد يروح الصعيد ويعمل مشروع ويبيع بفلوس فدا حافز من الحكومه فده الدعم عشان جزء إستثمارات حفنه كبيره قوى من الدوله .
ريهام إبراهيم : كلام حضرتك مبشر كله أين المستثمر الأجنبى فى كل دا يعنى فى نسب معينه بتقول إن المستثمر الأجنبى تراجع فى وسط كل المستثمرين فى ظل كمان المشروعات الجديده والمطروحه اللى حضرتك بتذكرها هل دا مثلا من أسباب الأزمة العالميه والا دا شيئ من زمان ؟
م/عمرعسل : الله فى الأزمة العالميه أعلنا عن 224 مشروع أرض صناعى فى 6 اكتوبر والعاشر من رمضان والعبور أثناء الأزمة العالمية وحطينا خطاب ضمان بدل 50 جنيه بل حطينا 200 جنيه أكثر تشدد إتقدم لنا 780 مستثمر مرحله اولى ومرحله ثانيه لما طرحنا أراضى ثانيه إتوصلنا 2800 طلب على 780 أرؤض طرحت أثناء الأزمة العالمية فكنا بنعمل قرعة عشان ندى أراضى أثناء الأزمة العالميه لمستثمرين ينشئوا مصانع أثناء الأزمة .
كنا إمبارح فى زياره مع السيد المهندس رشيد الى السويس.
ريهام إبراهيم : مستثمرين من الخارج يافندم تقصد ؟
م/عمرعسل : مصريين وعرب وأجانب .. كنا فى السويس بنفتح مصنع جديد المهندس رشيد كان بيفتحه مع المهندس وزير الكهرباء إنشاء أبراج كهرباء لتوليد الطاقة من الرياح لأول مره فى مصر والشرق الأوسط تنشأ هذا المشروع من شراكة مصرية ألمانية أعظم شركة فى العالم لأبراج الرياح شاركت المستثمرالمصرى فى إنشاءهذا المصنع وطلع أول بورت.
ريهام : عشام بس ما نسبش النقطه ديه إيه هى كانت عوامل الجذب فى مشروع كبير زى دا وحضرتك بتقول إن أول دوله بيُطرح فيها هذا المشروع فى الوطن العربى ؟
م/عمرعسل : هذا المشروع قيمته بالنسبه لى أنا حضرت حجرالأساس فيه فى سبتمبر 2008 دا فى عز الأزمة العالمية كان الناس قلبها واقع والأزمة هتأثر علينا وهيحصل إنكماش ومش شايفين أحنا رايحين فين ولكن المستثمرين إستثمروا وعاونوا المشروع وإشتغل والنهارده بيقولوا إحنا نجحنا لإن العالم والأزمة عديناها وإبتدينا نتفوق عليها وإبتدى يبقى فيه جذب كبير اللى عايز أقول فى مصر فيه عوامل جذب كبيره وزارة التجاره والصناعه والمهندس رشيد عمل إتفاقية تجاره مع مصر وأوربا .
ريهام إبراهيم : والعوامل البيئية كمان مش كده ؟
م/عمرعسل : يعنى بنتكلم عن إتفاقية التجاره ومصر وأمريكا ومصر والبلاد العربيه ومصر أفريقيا والنشاط الفردى .
محمد موافى : ويمكن بالنسبة للمستثمر اللى بره كان التجاره الموحد اللى إتكلمنا عليه دا أو الصناعة الموحد دا من أول عوامل الجذب .
م/عمرعسل : لسة ما طلعش إنما دا هيجذب للتسهيل اللى بيتم .. فيه حوافز للتصدير طبعا المهندش رشيد عنده مجموعة كامله من سياسات أدت الى جذب المستثمرين المصريين والعرب .
محمد موافى : فين تصنيع السيارات من الحوافز ؟
م/عمرعسل : الحقيقة يمكن هنتكلم على صناعة السيارات تحت عنوان أعلن سياسة تعميق تصنيع محلى وأعلنت السياسة من شهرين وديه جزء من سياسة أعلنت برضه لمضاعفة قيمة الصادرات المهندس رشيد أعلن لمضاعفة السيارات من 95 مليار جنيه الى 200 مليار جنيه عام 1013 فديه سياسه ليها سياسات تركيزيه جزء من سياسة التنفيذ والتأكيد على نجاح السياسة تشجيع وتعميق الصناعة المحلية وتم إختيار 90 صناعة مطلوبه تواجدها ودا عن طريق مجلس تعميق التصنيع المحلى بيرأسه حمدى هيبه .
ريهام : 90 صناعه كتير نأخذ أهمها مثلا منها السيارات ؟
م / عمر عسل : صناعة السيارات ومكونات السيارات وصناعة مكونات توليد الطاقه ابراج الرياح الريش التربينات الإستمباط كلمة إستمبه فى الصناعة ديه مهمه قوى .
محمد موافى : طبعا هى الأصل .
م / عمر عسل : كل واحد بيصنع محتاج إستمباط كتيره عشان يعمل كل المنتجات الكتيره ومش معقول يجيبها من الصين ولا جاب إستمبه جديده يعمل بيها 1000 منتج مش هتبقى إقتصاديه وبالتالى بقة عقبه فى التطويل صناعة الإستمباط .. الحزمة اللى أعلنها المهندس رشيد لتنمية وتسهيل الصناعة بتدى حوافز جديده لتعميق التصنيع وبتدى لهم حوافز لفرصة العماله حوافز فى الجمارك فى التصدير مجموعة حوافز تجزب هذه الصناعات اللى هى تيجى على أرض مصر عشان تشجع فى إقامة الصناعة كلها منها السيارات – السيارات ليها حزمة مهمة جدا خاصه بالتعميق والتصنيع هدفنا إن إحنا النهارده بننتج 105 ألف عربيه فى مصر هدفنا عام 2020 نوصل الى 600 ألف عربيه إنتاج مصرى لسوق محلى وللتصدير .
محمد موافى : مع مراقبة الجودة ؟
م/عمرعسل : جزء من السياسة اللى أعلنت هى تطوير مواصفات الجودة للسيارات عشان تتماشى مع المواصفات العالميه جزء منها خاص بتعميق التصنيع .. إحنا النهارده الشرط اللى موجود 75% مكون محلى أحنا فى السياسة ديه بندى حوافز للى فوق 50% بيأخذ حوافز ماديه بتساعده على إنشاء مصانع جديده لخلق فرص عمل جديده فى السيارات دا جزء من بعض السياسات اللى أعلنت لتعميق تصنيع محلى .
م/عمرعسل : سألتنى سؤال عن الرمله السوداء متهيأ لى مش كده .
ريهام إبراهيم :: آه إتكلمنا عليها فى المقدمة .
م/عمرعسل : الرملة السودا دا جاى فى سياسة تشجيع تصنيع الثروه المعدنية دا ما أخذتش حظها فى الفتره السابقه النهارده فيه سياسات أعلنت لتشجيع الصناعة معتمده على الفوسفات معتمده على الرخام معتده على الرمله السوداء .. الرمله السوداء عندنا فى البرولوس وفى سيناء وفى بعض المحافظات ولم تستغل يمكن من الستينات بنتكلم عن مشروع الرمله السوداء ولم يتم تفعيله عن طريق وزارة الكهرباء ووزارة الصناعة مع بعض وتوجيهات السيد رئيس مجلس الوزراء تم تشكيل لجنه مشتركه – وأعلنا عن المناقصه ديه عالميا لجذب مستثمرين لإستخدام الرمله السوداء فى الرولس وإنشاء صناعات عليها الخدمات لزياده الكولما ألمانايت والخامات المشعة اللى ممكن تستخدم كوقود لمحطات الطاقه النووية .
ريهام إبراهيم : نتمنى التوفيق فى المشروع دا وكل المشروعات اللى حضرتك ذكرتها شكرا لحضرتك .. المهندس عمر عسل رئيس الهيئه العامه للتنمية الصناعية .
م/عمرعسل : شكرا جزيلا يا فندم .
محمد موافى : شكرا على وجودك يافندم وشكرا على الإنجازات ديه وشكرا لمشاهدينا شوفنا حزمة من الحوافز وشوفنا برضه ضوابط لمنع التلاعب المسألة مهمة جدا لإن الصناعة ديه هى مستقبل مصر حتى يعود شعار صُنع فى مصر مرة أخرى حتى نلقاكم فى يحدث فى مصر دمتم فى رعاية الله .
ريهام إبراهيم : شكرا