نص مكالمة "الفضيحة" بين عضو الجبلاية ومسئولة لجنة الحكام لمجاملة الزمالك

انفرد الزميل محمد شبانة رئيس رابطة النقاد الرياضيين بنص مكالمة فاضحة، تجمع أحد أعضاء اتحاد الكرة ومسئول بلجنة الحكام لمجاملة الزمالك في اختيار حكام المباريات، نشرها عبر "الأهرام المسائي"
نص مكالمة الفضيحة بالجبلاية :
مسئول الجبلاية : ها..يا كابتن "أ".. إزيك
مسئول لجنة الحكام : الحمد لله يا باشا.. كنا عايزين نتكلم مع حضرتك شوية
مسئول الجبلاية : أمرنى
مسئول الحكام : نقعد مع بعض شوية نشوف هنعمل أيه الفترة الجاية..والأمور إن شاء الله والدنيا هتتظبط كدا..والأمور هتبقى كويسة
مسئول الجبلاية : أنا مسافر للعمرة
مسئول الحكام : هتيجى امتى إن شاء الله
مسئول الجبلاية : هاجى السبت..هأكون معاك الأحد
مسئول الحكام : تقبل الله
مسئول الجبلاية : هاجى السبت والأحد هأكون معاك..ماتشغلش بالك أنا عارف أن فيه حروب بين المجلس نفسه، وأنا مساند "ج" فى قراره "ع" مصر ومتمسك بوجودك (....) اللى اسمه جمال الغندور طبعا عامل يعنى تكتلات علشان يجى..أحمد من ناحية.. كذا عضو كده من ناحية..كابتن حسن فريد النهاردة كلمته ومحمود الشامى وحمادة المصرى.. يعنى معانا لوبى فيه 6 أعضاء..بس عايزين المرحلة الجاية ياكابتن "أ" نعديها.. يعنى إمبارح محمد فاروق كان عشرة على عشرة محدش يقدر يتكلم وكلمت رئيس الزمالك قلتله أظن مالكش كلام.
مسئول لجنة الحكام : ده طلع مع خالد الغندور قال تحكيم محترم وخالد الغندور قال له..مش عارف أيه..والحكاية والرواية والبلاغ اللى أنت مقدمه..قاله الكابتن"..."مالوش دعوة بالرشوة..كابتن"..."متفق مع المجلس إنه هيمشوه فى يناير ولكن هو بالنسبة للرشوة هو مالوش دعوة بالرشوة..الرشوة دى كانوا حكام ومتفقين عليا عايزين يحطموا ويخسروا النادى ولكن كابتن"...." مالوش دعوة بالرشوة خالص وهو بعيد عن الموضوع ده.
مسئول الجبلاية : تمام..لأ.. هو غلبان خلى بالك يا أستاذ "أ"..أنا لما اتكلمت معاه..أنا قعدت معاه قلت له عشان خاطرى..أجيبلك مين؟!..عايز تجيب جمال الغندور يبيعك ولا عصام صيام..ياعم خليك فى اللى نعرفه يكفى انك تبقى واحد نضيف..وقلتله بعد إذنك ليك حاجة واحدة قبل الماتش احنا مش هنجيب..قالى أنا مش عايز حد يبقى عليا..قلت له جميل هنجيب لك حكام دوليين محترمين.
مسئول لجنة الحكام : وأنا جايب له حكم هو بيحبه..وهو مبسوط منه
مسئول الجبلاية : اللى هو مين؟؟ ماتش ايه؟؟
مسئول الحكام : ماتش الزمالك والمقاصة..جهاد جريشة
مسئول الجبلاية : زى الفل
مسئول لجنة الحكام : تمام
مسئول الجبلاية: مالوش حجة..زى الفل..أحسن كده..متقولش لحد خالص الكلام دا
مسئول الحكام : لأ..أنا بأقول لك أنت بس
مسئول الجبلاية : انت عارف ليه أنا بأسكته بالكلام ده! علشان يبعد عننا.. ما هو خد بالك..هو برضه سم..أنا كده علشان أعرفه اللى بيعمله معاك كابتن "..." مش هيعمله معاك إلا أنت
مسئول الحكام : خلى بالك يا كابتن "..." إن الإعلامى "ش" كان بيقولى أنت هتلاعب جهاد اللى راح لرئيس الزمالك الصوان والبتاع عشان يسانده.. قلت له يا كابتن "ش" أنا عندى جهاد محترم وكبير.
مسئول الجبلاية : سمعتك يا باشا..قلت له.. أحسن حاجة انك قلت له آمنه على نفسى..سمعتك..كلام محترم..إن شاء الله..بس متشغلش بالك..وأنا خلى بالك لما بلاقى فيه خطر..بأعمل لوبى..أنا عامل لوبى دلوقتى.
مسئول الحكام : أنا يهمنى أنت يا كابتن..يهمنى أنت أهم حاجة
مسئول الجبلاية : يا باشا متشغلش بالك..ولا حد يقدر يجى ناحيتك..يلا يا كابتن أشوفك فالاتحاد إن شاء الله.
مسئول الحكام : إن شاء الله تيجى بالسلامة..بس خليه يهدى علينا يا كابتن