كشف الإعلامى محمد شبانة رئيس رابطة النقاد الرياضيين عن «فضيحة» من العيار الثقيل فجرها عبر صفحات جريدة «الأهرام المسائى» بنشره نص مكالمة دارت بين أحد المسئولين فى إتحاد الكرة «س» و مسئول بلجنة الحكام «أ» لتكشف النقاب عن الطريقة «الهزلية» التى يتم بها إختيار الحكام فى مباريات الزمالك إرضاءً لرئيسه. وجاءت نص المكالمة «الكارثية» كالتالى: مسئول في الجبلاية: ها... يا كابتن أ... إزيك مسئول في لجنة الحكام: الحمد للهيا باشا مسئول في لجنةالحكام: كنا عايزين نتكلم مع بعض يا كابتن شوية مسئول في الجبلاية: أأمرني مسئول في الحكام: نقعد مع بعض نشوف هنعمل إيه الفترة اللي جاية.. والأمور إن شاء الله والدنيا تتظبط كده.. والأمور تبقي كويسة. مسئول في الجبلاية: أنا مسافر للعمرة. مسئول في الحكام: هتيجي إمتي إن شاء الله. مسئول في الجبلاية: هاجي السبت.. الأحد هكون معاك. مسئول في الحكام: ماشي.. تقبل الله منك. مسئول في الجبلاية: هاجي السبت.. الأحد هكون معاك.. وأنا.. متشغلش بالك أنا عارف إن فيه حروب بين المجلس نفسه.. وأنا مساند ج في قراره ع مصر ومتمسك بوجودك..(.......) اللي اسمه جمال الغندور طبعا عامل يعني تكتلات علشان يجي.. أحمد من ناحية.. كذا عضو كده من ناحية.. كابتن حسن فريد النهاردة كلمته ومحمود الشامي وحمادة المصري.. يعني معانا اللوبي فيه ستة أعضاء.. بس عايزين المرحلة اللي جاية دي يا كابتن أ نعديها.. يعني إمبارح محمد فاروق كان عشرة علي عشرة محدش يقدر يتكلم وكلمت رئيس الزمالك قلتله أظن مالكش كلام. مسئول في لجنة الحكام: ده طلع مع خالد الغندور قال تحكيم محترم وخالد الغندور قال له.. مش عارف إيه.. والحكاية والرواية والبلاغ اللي إنت مقدمه..قاله الكابتن... مالوش دعوة بالرشوة.. كابتن... متفق مع المجلس إنه هيمشوه في يناير ولكن هو بالنسبة للرشوة هو مالوش دعوة بالرشوة.. الرشوة دي كانوا حكام ومتفقين عليا عايزين يحطموا ويخسروا النادي ولكن كابتن...... مالوش دعوة بالرشوة خالص وهو بعيد عن الموضوع ده. مسئول في الجبلاية: تمام.. لأ.. هو غلبان خلي بالك يا أستاذ أ.. أنا لما اتكلمت معاه.. أنا قعدت معاه قلت له عشان خاطري.. أجيبلك مين ؟!.. عايز تجيب جمال الغندور يبيعك ولا عصام صيام.. ياعم خليك في اللي نعرفه يكفي أنك تبقي واحد نضيف.. وقلتله بعد إذنك إنت ليك حاجة واحدة قبل الماتش إحنا مش هنجيب.. قالي أنا مش عايز حد يحكم لي أنا مش عايز حد يبقي عليا.. قلت له جميل هنجيب لك حكام دوليين محترمين. مسئول في لجنة الحكام: وأنا جايب له حكم هو بيحبه.. وهو مبسوط منه. مسئول في الجبلاية: اللي هو مين ؟ ماتش إيه ؟ مسئول في لجنة الحكام: ماتش الزمالك والمقاصة.. جهاد جريشة. مسئول في الجبلاية: زي الفل. مسئول في لجنة الحكام: تمام. مسئول في الجبلاية: مالوش حجة.. زي الفل.. أحسن كده.. متقولش لحد خالص الكلام ده. مسئول في الحكام: لأ.. أنا بأقول لك إنت بس. مسئول في الجبلاية: إنت عارف ليه أنا بأسكته بالكلام ده! علشان يبعد عننا.. ما هو خد بالك.. هو برضه سم.. أنا كده علشان أعرفه اللي بيعمله معاك كابتن... مش هيعمله معاك إلا إنت. مسئول في الحكام: خلي بالك يا كابتن...... س إن الإعلامي ش كان بيقول لي إنت هتلاعب جهاد اللي راح لرئيس الزمالك الصوان والبتاع علشان يسانده.. قلت له يا كابتن ش أنا عندي جهاد محترم وكبير. مسئول في الجبلاية: سمعتك يا باشا.. قلت له.. أحسن حاجة إنك قلت له أآمنه علي نفسي.. سمعتك.. كلام محترم.. إن شاء الله.. بس متشغلش بالك.. وأنا.. خلي بالك لما بلاقي فيه خطر... بأعمل لوبي.. أنا عامل لوبي دلوقتي.. مسئول في لجنة الحكام: أنا يهمني إنت يا كابتن.. يهمني إنت أهم حاجة. مسئول في الجبلاية: يا باشا متشغلش بالك.. ولا حد يقدر يجي ناحيتك.. يلا يا كابتن أشوفك في الاتحاد إن شاء الله. مسئول في لجنة الحكام: إن شاء الله تيجي بالسلامة.. بس خليه يهدي علينا يا كابتن.