مواطنو دمياط: «الكهرباء» بتسرقنا عينى عينك

عادت من جديد ظاهرة الطوابير على منافذ شحن كروت العدادات مسبقة الشحن ،بسبب مفاجأة الكثير من المواطنين بأن العدادات رصيدها صفر صباح اليوم ،على الرغم من تأكيد الكثير منهم أن العداد كان به شحن ولكن فجأة اصبح صفرا .
وشهدت المحافظة فى نهاية فصل الشتاء الماضى ظهور الزحام الشديد أمام منافذ شحن العدادات لنفس السبب نفاذ الرصيد فجأة من عدد كبير من العدادات بالرغم من تأكيدات المواطنين على وجود رصيد يفترض به ان يكفى الإنارة لعدة أيام .
يقول محمود صابر نجار "النهارده نقدر نقول إن شركة الكهربا أو الحكومة بتسرقنا عينى عينك ،لأن أنا العداد بتاعى كان فيه فلوس مفروض تكفى لإسبوع على الاقل ،وبعدين أتفاجئ النهارده إن العداد صفر والكهربا تقطع عن البيت ،طيب الفلوس دى راحت فين ،الشركة بتسرقنا ،ايوه بتسرقنا ،وللأسف مفيش حد نشتكى له ولا فيه حد بيسمع مننا علشان يجيب لنا حقنا ،الشركة لو نزلت ولقت أى مخالفة عند أى مواطن ما بترحموش وبتعمل غرامة ويمكن قضية بآلاف الجنيهات ويمكن يصدر ضده حكم غيابى ويتسجن كمان ،يبقى ليه الشركة تاخد حقنا وتاخد فلوس من العدادات من غير وجه حق ،ولغاية إمتى هنفضل نتسرق كدا ، وكمان نتعذب فى طوابير بالساعات علشان نشحن الكارت مضطرين لأن الكهربا قاطعه عن البيت "
أما طلعت محمد إسترجى ،فيقول إمبارح أنا شايف العداد فيه 35جنية لأنى شاحنه الإسبوع اللى فات ب50جنية ولسه ما فتش على الشحن 7ايام ،النهاردة الصبح الكهربا فصلت أبص على العداد ألاقى العداد مفيش فيه رصيد ،راح فين الرصيد وإزاى يتسحب ولصالح مين ؟والله إحنا ما عدنا عارفين نعيش فى البلد ،سعر الكهربا يزيد وكمان يسرقوا الرصيد اللى فى العدادات ،ويقول طلعت أنا بسأل موظف قالى الفلوس سحبتها الشركة لصالح صندوق تحيا مصر ،ايوه موظف قالى كدا ،وأنا مالى ومال الصندوق ولا إحنا نعرف عنه إيه ؟ولا هى الحكومة عاوزة تجمع مصاريف الفنانين اللى مسافرين مع الرئيس لالمانيا ،يبقوا هما يسافروا يتفسحوا والحكومة تصرف عليهم من عرقنا وأكل ولادنا "
وتتسبب الظاهرة فى حالة من الإستياء الشديد بين المواطنين فى دمياط لاسيما مع موسم تقديم ملفات المدارس ورياض الأطفال وإرغام الأهالى على شراء طوابع تأمين صحى ب104جنية مع وجود حالة من الركود تضرب المحافظة فى صناعة الموبيليا وإنتشار البطالة وتدنى مستوى الدخل للكثير من الأسر .