"رسالة أسير".. قصيدة النقيب محمد وديع لمصر من محبسه: أنا مظلوم ومش مهزوم.. وإيه الفايدة لو أخرج وافضل برده لسه أسير

رسالة أسير
يا جامعه ما بين حاجات فعلا ما تجمعهمش غير أمى ؛
يا أم شهيد و أم مصاب وأم أسير جرى ف دمى ؛
يا أم شباب ماتعرفيهمش بتبكى لناس ما بتشوفيهمش ؛
وفرحك حتى بالكلمه من الناس اللى يوم ما تخونش ؛
وأوعى ف يوم يطولك حزن تقولى عيالى كده راحوا ؛
ده إبنك راح بطل وشهيد وداوى الكل بجراحه ؛
وأسير الحق ف سجونهم ده عايش وسط أفراحه ؛
عرفتى تربى وتصونى عيال لونهم كما لونى ؛
نقول الحق لو هنموت ولو ف السجن يرمونى ؛
مادام أمى تشجعنى مادام بلدى بتوجعنى ؛
مادام ماشي ف طريق الحق ما شيئ يقدر يرجعنى ؛
وتفضل أمى شايفانى وسمعانى وحسانى ؛
ولما هاموت توصلنى وتودعنى
وتفضل أم ناس غيرى كتير تانى ؛
يا أم الدنيا واحشانى ونفسي أطلع أبوس أرضك ؛
واعيش وائع كده ف عرضك ؛ عشان ترضي تسامحينى
عشان أرفع ف يوم عينى
وأقول إنى ما أثرتش
وانا اللى ف نفسى متأثر ؛ بكل فقير ومش لاقى
وكل مصاب بقى فدائي
وكل شهيد بأشلائى ؛ ولسه ليه أنا باقى !!؟
؛ بكل ألام بتجرحنى بكل عيون بتدبحنى ؛
بكل أسير ورا القضبان ومش مكسور ولا محنى ؛
يقولوا أسكت عشان تخرج ومن سجنى لسجن كبير ؛
وإيه الفايده لو تخرج وتفضل برده لسه أسير !!؟ ؛
أبويا خلاص وجاب أخره وأصبح وضعه صحى خطير ؛
وأمى خلاص بتتبهدل وتتعذب بحكم ضرير ؛
وظالم مستبد مصر يدوس ولا عنده أي ضمير ؛
يا رب يا خالق الأكوان أنا فوضت أمرى إليك ؛
وعارف إنك أنت العدل وعمرى ف يوم ما هنت عليك ؛
يارب انصرنا واهزمهم وخد حقى كمان بإيديك ؛
يارب يا ناصف المظلوم أنا من العدل أهه محروم ؛
وبشكيلك وبحكيلك من اللى فاكرها له هاتدوم ؛
يارب يا عالم الأسرار وعالم نيتى بخيرك ؛
أنا مظلوم ومش مهزوم و ف الأخر ماليش غيرك
يذكر أن وديع هو أحد الضباط اًلذين نزلوا إلى ميدان التحرير، للمشاركة في مظاهرات 8 إبريل 2011، لإعلان تضامنهم مع الثوار فيما عرف بجمعة المحاكمة والتطهير، وألقت الشرطة العسكرية القبض عليهم.
وصدر ضده مجموعة من الأحكام وصلت إلى 5 سنوات فضلا عن حبسه عام قبل الثورة بسبب قصيدة كتبها هاجم فيها أوضاع الفساد في المؤسسة العسكرية. ويقضيها الآن في سجن القوات الجوية بالقاهرة بعد حبسه لمده خمسة شهور في الحبس الانفرادي بسجن رأس التين بالإسكندرية.
وتخرج وديع من الكلية الحربية في عام 2005 بسلاح المشاة، وحصل بكافة تقاريره على امتياز، وتولى منصب قائد دورية صاعقة بالكتيبة 33 والمجموعة 127 صاعقة وقائد طاقم قتال الوحدة 999، وأمضى جميع خدمته بالقوات المسلحة في وحدة فرق الإرهاب الدولي إلى جانب حصوله على فرقة السيل رقم 4 والسيل رقم 5 وفرقة مقاومة الإرهاب الدولي وفرقة الضفادع البشرية والنسف والتدمير تحت الماء.
كتب النقيب محمد وديع أحد ضباط 8 ابريل قصيدة جديدة بعنوان '' رسالة أسير ‘‘ من داخل محبسه بسجن القوات البحرية وتنشر البديل القصيدة