طريق النور

في شرع مين!

محمد أبوذكرى
يامصر.. يا أم الخلايق.. والبشر.. والناس.. أنا المتيم بحبك.. وإنتي فوق الراس.. بحلم يا مصر أشوفك عروسة.. واحنا حراسك.. رافعين الهامات والراس.. وفي أرض أطوف.. ألف وأشوف.. أدور في حواريكي.. عن الفرحة في قلب الخوف.. أدور علي الإنسان.
فين يا مصر شهامة ولادك.. كرامة رجالك من بني الإنسان أنا كنت عنوانك زمان دلوقتي بابكي علي حالك وموالك.. ديابة الزمن ده.. بيقولوا عن نفسهم جماعة.. وجايين بكل وداعه.. يقولوا ح نبيع لأحبابنا وإخوانا.. في العالم.. ح نبيع قلوبنا وعقولنا.. وأرضنا.. وزرعنا وحقولنا.. لكل عابر سبيل.. وكل ده في سبيل كرسي الخلافة.. والبيع بحفنة من الدولارات.. والمليارات وبعدها أهل بلدي يعيشوا أيامهم الجاية.. مادين إيديهم لكل جبان خوان.. عميل لليهود والأمريكان.. وكله بالمجان وتمر السنين بحزن دفين.. ونقول في شرع مين!
مرارة الكلمة في سؤال.. عندي ليكو.. يا أهل بلدي مليون سؤال وسؤال.. يا تري من حق حماس.. تدخل وتخرج.. وتعيش علي ريش نعام وتنهش في عرضي ولحمي.. وتمص دمي.. باسم الدين.. حماس ياناس بعد أيام قليلة.. ح تشيل عيالها وعزالها.. وتحط الرحال.. والرجال علي تراب بلادي.. وتسيب أرضها للأعادي.. ويقولوا مسلمين.. في شرع مين!
وسؤال الثاني.. مهرك يا بلدي لمين.. فؤادة الجميلة.. عتريس خطفها.. وعايز يمزق شرفها.. وأرض سيناء بنتها حته غالية منها.. ح تصبح مستباحة.. والبيع عيني عينك.. اتنين مليار دولار للمطرحين.. واتنين كمان للفدانين.. واتنين لرمش العين.. مزاد يا عم.. والمشتري مين ولامين.. لإخواني المسلمين.. ولا للسفاحين.. والأفاقين.. أحفاد القردة والملاعين.. في شرع مين.
وسؤالي التالت لولاد الخال.. عمنا مشعل.. أشعل ضيعته في سوريا.. وساب جنته هناك وجاي يبوس إيد مرشدنا.. مرشد الخير والجنة.. والورد والحنة.. والزيت والسمنة.. ومعاهم سكر مُر.. دليفري.. وبمرور الأيام والأعوام مرشدنا الجديد.. الوليد.. السعيد.. ح يكون من أرض الخلافة الإسلامية.. القدس الشريف يصرخ يستغيث يا مين يغيث.. ويصبح الواحد منا غريب في بلاده.. الخوف في فؤاده.. والدمع في العين رمل وطين.. في شرع مين!
وسؤالي في البيان التالي: صبيان الأمريكان جايين من المراعي.. والاسم راعي.. عينهم علي بنك الفلاحين.. اللي اسمه الائتمان الزراعي.. دولة النفط.. بفلوسها.. تنط.. وتفط وتقعد علي الحصيرة.. وبعد اتفاقها مع اصدقائها ولاد أبوحصيرة.. وحواديت الجزيرة إللي فاضية بس لينا.. جاية بالمال.. ياقوت - دهب- مرجان.. رحمتك يارب.. والعتب علي مين- علي ابن بطني.. وابن وطني.. ولا العتب علي مين.. في شرع مين!
وحياة ترابك.. يا بلدي.. دي سحابة وتعدي.. والديابة لابد ليهم يوم.. والظلم ليكي عمره ما في يوم يدوم.. وبكره نفوق من التوهه ونرفض دخول أي فاكهة من الاناناس.. والموزه.. والتفاحة.. وح ننادي في كل وادي حقنا ح يرجع لنا لو بعد مليون يوم.. ونغني مع الست أم كلثوم.. مصر التي في خاطري وفي دمي. ح تعيشي مرفوعة الرأس رغم التعب .. رغم الهموم.