طلع النهار

قومى افتحيله الباب والشيش
دا شبابنا غنى ف كل مكان
والكل ردد قاله تعيش
مدى الغناوى يا طراحة
خلينا نحلم بصراحة
من النهاردة مافيش راحة
واللى اتولد ف النور حيعيش
■ ■ ■
بإيدينا هدينا الأسوار
وم الضلام طلعنا نهار
يا مصر أرضك ولادة
وكل يوم حتجيب أحرار
لمى القلوب الموجوعة
وضمى صوت المجموعة
الكلمة تصبح مسموعة
وف أى شدة ماتتهزيش
■ ■ ■
يا صابرة خدنا اللى باقيلك
من إيد لصوص للنيل والطين
دول مش طيور عاشقين نيلك
دول ناس لا ليها ضمير ولا دين
قاسين على تراب بيشيلهم
وترابهم اتبرأ منهم
ولو نطق كان عفرهم
وقال ماشيلش قلوب خفافيش
■ ■ ■
يا بلدى غنى ف كل ميدان
ولو نزل دمعك غنى
صورة شهيدك نور وإيمان
ف كل وقت بيحضنى
من فوق حبال الفجر بادور
وباشد ضحك حروف النور
لطريق لقاك بحرية
طريق مافهش هامان بشاويش
■ ■ ■
خلينى أهرب لميدانى
من جرح قلبى الجوانى
نغزل عذاب ثورتنا ورود
لكل من جرحه يعانى
دا الشعب روح بتكلم روح
وقلب حاسس بالمجروح
مش نبض حس رخيص وهزيل
يمص خيرك ولايديش
■ ■ ■
سقيت ترابك من دمى
وفضلت على أرضك أسمى
ومشيت غريب خايف منك
وساعات باشك إنك أمى
باجر قدمى وبتقوى
وشراعى مش قد النوة
يا حوا م الجوع بتلوى
واللقمة فيك مابتكفيش
■ ■ ■
حلمنا بالحرية سنين
وكان علينا الكون بيضيق
وكنا ف الأحزان عايمين
غريق يمد الإيد لغريق
مافيش لا ساحل ولا مينا
ولا حد بيبص علينا
وطلعنا فاردين خطاوينا
والشعب شاف الموت ماجريش
■ ■ ■
بالصمت عشنا ف ليل وهموم
مافيش أمان ولا طاقة نور
على الآلام بنام ونقوم
والظلم فيك طلع له جدور
صبرت ع الظلم ليالى
والثورة والدم الغالى
خلوا لحقك صوت عالى
وسمعه ناس مابيسمعوكيش
■ ■ ■
يا مصرى صور سحر الكون
لناس كتير مالهمش عيون
وقول يارب اجعلنى أكون
عبير نغم دايما بيفوح
م الكل زى مافاح منى
إملا التاريخ حكمة وإلهام
وخلى ف اللمة فضيلة
تقوى صبرك ع الأيام
وتخلى أحلامنا نبيلة
ومن النهاردة ف كل مكان
الشعب واحد ويا الجيش
■ ■ ■
أحلامنا ما بقتش بعيدة
ودخلنا على دنيا جديدة
بقلوب شباب عرفوا الإصرار
ونفوس على الأرض شهيد
لا يوم حنسكت ونسامح
ولا حد حيعيد إمبارح
حنركب النصر الجامح
ونفرد الجناحات ونعيش
كرم فصاد
شاعر غنائى مولود 16/4/1967م .
صحفى و شاعر غنائى
عضو اتحاد كتاب مصر عضو جمعية أنصار التمثيل والسينما.
عضو جمعية الأدباء بالقاهرة.
صدر له العديد من الدواوين