يا حبيبتى يا مصر

■ ضمى قلبى ضمى.. انتى أبويا وأمى.. دمك هو دمى.. همك هو همى.. فرحك هو فرحى.. مهما يحصل فيكى.. مهما يقولوا عليكى.. يا بلدى بدوب فيكى.. تروح الدنيا تيجى.. يعدى زمن وييجى.. وحب ولادك ليكى ثابت وده بيرضيكى مفيش شىء يساوى.. نظرة عين صغيرى.. مركب وسط نيلى.. ومصرى أسمر ينادى.. بحبك يا بلادى.
أشرف أحمد صالح الطويل
ashrafsaleh.altaweel@gmail.com
■ آلام الحب تكوينى.. ودمع العين يروينى.. وحشتينى.. وحشتينى وأنا ف حضنك.. يا أمى يا مصر ضمينى.. ومن نهرك يا ست الكل اسقينى.. وودينى لصلاح الدين.. وودينى لأجمل عصر.. إحكى لى.. ونسينى شوقى ليكى وحنينى.. وادينى سلاح العلم من دينى.. وبولادك يكون النصر.. وحشتينى.. ومن حضنك بكت عينى.. وعشّه فيكى تكفينى.. تكون أجمل يا ناس من قصر.. بحبك حبى لوليدى.. وفى وريدى.. بدمى أفديكى.. ولا تغلى روحى عليكى.. يا بلدى يا مصر.. يا أهلى وعزوتى وناسى.. وفيكى عمرى ما أقاسى.. وبالصبر يكون النصر.. ولو عصروا قلوبنا عصر.. بنحبك وهانحب.. فيكى بيتنا.. بنحبك وهانحبك.. بلمتنا.. بنحبك وهانحبك.. يا شمعة نور.. لأمتنا.. يا بلدى يا مصر.. مين غيرك.. يجمعنا.. مين غيرك براية مكة يجمعنا.. مين غيرك يا فلسطين.. ما يكون للكلام معنى.. بنحبك وهانحبك.. بإسلامك.. بنحبك وهانحبك.. بأقباطك.. بنحبك بأولادك.. جنود النصر.. يا بلدى يا مصر.
أبو محمد رضا عدلى
■ بعشق ما فيكى.. بعشق شوارعك.. بعشق دروبك.. بعشق حواريكى.. يا أم النخيل العالى.. رملك دا ماس بيلالى.. شعبك نجوم فى السماء.. حالف يضىء للكون.. ويجعلك فنار.. ينور طريق البواخر.. فى ليل البحار.. ونخلى كل البشر.. على وجه الأرض.. سواسية.. مثل الطيور أحرار.. شعبك رواه النيل.. شعبك دا شعب أصيل.. مهما يروح لبعيد.. بيرجع بقلب طفل وليد.. ويحن لمصر أمه.. من بعيد لبعيد.
حسين أحمد حسين عبدالكريم
قنا - ش الحلوى
■ مصر بلدنا دى بدر منور.. ياللى ما تعرف إمشى ودور.. طوف شوارعها عيش لياليها.. فيها جمال سبحان من صور.. تاريخها حضارة بيحكى يقول.. علمنا شعوب نورنا عقول.. بنينا هرمنا حفرنا قنالنا.. عمار فى بلادنا عرض وطول.. لما الأرض فى توشكى اتزرعت.. ومية نيلنا هناك أهى وصلت.. لاقينا الخير باين قدامنا.. قلنا خلاص ياولاد أهى فُرجت.. كل العالم عينه علينا.. سحر بلادنا باين فى عنينا.. طول ما ولادنا السمر بعافية.. راح نستكفى القوت بإيدينا.. راح نستكفى القوت بإيدينا.
م. أحمد إسماعيل محمد عبدالوارث
القاهرة المعادى
■ مالك كده متغيرة.. فيكى إيه؟.. فى حاجة ناقصاكى قوليلى.. ساكتة ليه؟.. مالك كده.. اضحكى صدقينى بضحكتك بقدر أعيش.. وطول ما لسه قلبى عاشقك.. ما تخفيش.. واللى منهم يوم زعلتى.. عشان خاطرى سامحيهم.. بس لو مش قادرة عادى.. مش مهم طظ فيهم!!.. يلا قومى نفسى أشوفك وإنتى قمرة فوق سمايا منورة.. مالك كده متغيرة.. قومى بقى كحلى عنيكى بإيديكى.. وارسمى أجمل رموش.. فتحى وردة شفايفك.. خلى شعرك ف الهوا طاير لفوق.. يا حلم عايشه ومنه مش عايز أفوق.. قولتيلى قوم.. يا مصرى قوم.. والنهارده اسمحيلى إنى أقولك قومى إنتى.. يا حبيبتى. بنت 16 صبية حلوة.. لسة صغيرة.. قومى بقى.. مالك كده متغيرة؟!
مينا مجدى
■ يا بلادى يا حبيبتى يا أميرة.. كل يوم سهران فى حيرة.. لما أشوف الورد يدبل.. فوق خدودك يا أصيلة.. لما أشوف الناس غضبانة وعليلة.. لما أشوف الاعتصام والخلق نايمة ع الحصيرة.. والسكات جرح القلوب.. والقلوب صبحت عليلة ألقى نفسى من سكات.. لما أفكر ف النهارده.. واللى جاى واللى فات.. كل يوم سهران فى حيرة.. نفسى ألقى الورد يظهر.. فوق خدودك يا أصيلة يا بلادى يا أم العبور.. ببعت سلامى للقبور.. وللى فيها من نسور.. اللى هدموا الجسور.. لجل يوم نلاقى نور.. النهارده مفيش نسور.. النهارده فى صقور.. تنهش فى لحم القبور.. النهارده لسة بحلم.. يمكن فى يوم ألاقى نور نفسى يوم ألاقى نور يا بلادى يا غريبة.. فيكى حاجة مزعلانى.. لما أشوف أهلك وناسك.. بيأكلونا م المجارى يا بلادى متشكرين.. فى كل خطوة ألقى كامين.. عايزنى أمضى وأقول آمين أرجع يا حبيبتى وأقولك مستحيل!!
مصطفى السرتى