أحمد وجرجس.. فى حب مصر

بحبك يا بلدى بحبك يا مصر.. بحبك غنوة ف طريقى.. بحبك يا بلدى بحبك حقيقى.. بحبك راية مزروعة ف جبينى.. ومرسومة ف خدودى.. بحبك تاريخ كتبه جدودى.. بحبك صرخة بتهد ف سدودى.. ومستقبل ملامحه ف وريدى.. وبحبك كلمة بتعلن وجودى.. بحبك يا بلدى بحبك يا مصر.. بحبك نيل ميته ف سمارى.. وخيره ف دارى.. وزرعه ف وادى ودلتا وبرارى.. بحبك يا بلدى بحبك يا مصر.. بحبك حكمة قالها الزمن.. تعيشى قوية رغم المحن.. ما يهمك عدو ولا عادى اغتصب.. ولا يعرف طريقك ف يوم التعب..
ولا تخافى عمرك.. وتحاربى بقوة ولا تهابى قوة.. وزراعة جوه قلوب ولادك زند وعصب.. بحبك يا بلدى بحبك يا مصر.. يا أغلى معنى فى عين.. وكلمة غالية ف شراينى.. بحبك ف كنيسة وجامع.. مدنة وصليب.. وحلم للسما طالع.. بحبك وقانع.. إنى مسلم أو مسيحى.. بلاقيكى بلدى وروحى وضى عينى.. بحبك بقولها وهاقولها لأجل ما تزيد جواى معانى..
وبيكى وليكى وعشانك أحس.. ومستحيل يا أمى تاخدنى غربة.. ف دنيا ضلمة مفيهاش اسمك أو علمك يا مصر.. بحبك بجد ومفيش أى حد.. هياخدك منى.. وأنا عند وعدى يا أمى ونص.. بحبك يا بلدى بحبك يا مصر.. يا مصر ده أنا لو غبت عنك يومين.. برجع وأنا كلى آنين.. أوطى على ترابك أبوسه.. وأنا نص دموعى حنين.. والنص التانى دايب فيك عشق.. يا أم العيون على ولادك سهرانين.. طول عمرى بخاف تزعلى منى.. تخيلى.. وأنا صغير كنت بعمل عشانك الواجب.. وأسهر طول الليل أذاكر.. أيوه لسه فاكر.. لو يوم نمت بدرى.. أقعد تانى يوم.. ألوم ف نفسى وأعاتب..
وفاكر لما كنت أنا وجورج وسعيد.. بنكتب فيكى مواضيع تعبير.. كان القلب يا بلدى ولسه زى ما هو.. ف عشقك بيطير.. حتى اسألى.. جرجس عزيز وصاحبه أمير.. بحبك يا بلدى بحبك يا مصر.. جايز ساعات منكرش.. ياخدنى صوت بناتك.. وعشقى لسكاتك.. لكن ساعة الشدايد.. بتبقى إنت.. إنت وبس.. بحبك يا بلدى بحبك يا مصر.. يا كل الحضارة وأصل التاريخ.. وكفاحك أكيد حقيقى ده فخر.. بحبك يا بلدى بحبك يا مصر.. كنت هنسى فى زحمة نعم المولى عليك.. أقول من تانى النيل.. وإزاى أنسى الأصل ولون الطمى وخير الطين.. وأنسى فلاحين بلادنا.. ولادهم.. حريمهم.. والجيران الطيبين.. بس إزاى أنسى وهما الأصل.. وساعة الجد بيقولوا القول الفصل.. بحبك يا بلدى بحبك يا مصر.
أحمد صلاح محمود