بحبك يا مصر

بحبك يا بلدى بحبك يا مصر بقولها بحرقة بقولها بقهر
وكل حاجة فيكى بحبها يا بلدى حتي لو كانت بتعصرنى عصر
أروح ولما أرجع بحن لترابك وبحب عتابك عشة ولا قصر
وأرجع أغنى وأقولها بتأنى وحرقة ودمعة تفر منى بحبك يا مصر
بأجراس الكنايس وأناشيد المدارس وحى العلم يا فارس وهات النصر
بندى الصبح بدرى وتلميذ بيجرى ميحصلش الطابور ويدخل الفصل
وكلمتين وبس وخمسة لقلبك وهمسة عتاب بس فى إذاعتك يا مصر
وجلابية بلدى عليها عباية وفستان كالوش أو ملاية ملفوفة على الخصر
بحبك وأشوفك جميلة فى خيالى دايمًا قبالى مرسى وبرج الجزيرة وكوبرى أكتوبر وحاجات كثيرة تفوق الحصر
شمالك جنوبك وجمال غزل توبك بيغسل ذنوبك ويعصرها عصر وسدك العالى وأسوان تلالى وبلاد النوبة السمرة الأوروبية شبه الدر
ومداحين الهلايل وسامرين القبايل حبك مالوش دلايل ولا انكشفله سر
وخواجة أعجم يجيلك يحرجم ما يعرف سرك يعد يمر
بحبك ولوكرهونى حتى لوسحلونى عليكي أنا مُصِّر
سفنكس روكسى دوران خلوصى ترعة وكربة ميدان أبو اليسر
طلعت حرب باشا وقهوة عكاشا قدرة فول عماشا بعد أذان الفجر
الست حفلة الساعة كام وتذكرتين تراميا وشيشة حلمى قدام محطة مصر فيصل وعتبة عابدين وشبرا ومدرسة البنات وخروجة بعد العصر
وزحمة طابور العيش وبلا قافية الشاويش ونصب الشهيد
ومعرض الكتاب فى مدينة نصر بحبك بحلوك بحبك بمرك أزقك وأجرك بحبك فى فيصل وسوق العصر
بحبك يا قاسية حنونه وناسية جفيه وعاصية وتأمر فى أمر بحبك وآلاقى فى حبك دوايا وافرح لفرحك وأنسى بكايا والمد والجزر نادينا تلاقينا متفرطيش فينا بنحبك بحرقة يا بنت اللذين لسانك الحر بنحبك بشوق يرفعك لفوق افهمى بالذوق بنحبك يا مصر.