بحبك يا مصر بشكل تانى

أنا حبى ليكى مختلف. أنا حبى ليكى مرتبط بحاجات كتير كتير قوى
بحبك خبر فى جورنال بلوظة عن ست اكلت دراع جوزها
بحبك قرعة فى بوظة وكيس جوافة بيقول أنا جدع
بحبك كوزين أسمنت على السطوح وقولة يا عدوى
بحبك عربية كارو طالعة أبو السعود وندّر فول نابت
بحبك ميكى وسمير وحكاوى بابا ماجد
بحبك مشبك واقع من حبل غسيل
وجوز أرانب مش متروّضين
بحبك صندل ف النيل شايل قلل أو جير
بحبك ملاية لف ومنديل بأوويه
بحبك وردة بلدى وكنبة عمولة
بحبك عيش فى الشوارع وجزم فى باترينه
بحبك أكتر من على وحسين ولاد الريس عبد الواحد
............
بحبك بجنيه جبنة رومى ونشيد يا مصر قومى
ومدد مدد شدى حيلك يابلد
بحبك توت فلل المعادى وأغنيه ع الجدار الفرخة ماشية ع الجدار
بحبك ع الناصية وعيله مرزوق أفندى ووصفات أبلة نظيرة
بحبك النعناعية وعزبة ديمترى
وبحبك أبنوب الحمام وتوماس وعافية
وبحبك عرقسوس خمير وسوبيا
وبحبك وتحت بأطك شبشب زنوبة وماشية حافية
............
عارفة أمتى عرفت أنى بحبك
يوم ما عرفت الألف عيش كام رغيف
ويوم ما عرفت أن البحر بيطلع ف الصيف
ويوم ما عرفت أن الكورة أجوان على رأى كابتن لطيف
............
حتى أيام طفّوا النور كنت بحبك
ويوم ما الأهلى اتغلب بالتلاتة كنت بحبك
ويوم ما وقفت أمى وقفة عرفة فى الحجر الصحى كنت بحبك
............
الناس توشم ع دراعها أسامى حبايبها
وأنا اللى كاتب عريضة دعوى وعايزها تتنفذ ماليش دعوة
حالف متغسّل إلا من نيلك
واندفن ع القبلة من طينك
يا أحلى من وصفك ف مواويلك ......... بحبك
بعلّو صوتى حقّولك بحبك
وأسيحّلك ف وسط أصحابك
ولو قلتلهم معرفهوش وقبل كده ماشفتوش
حعرّّى رأسى وادعى عليكى
وأزعل من اللى يقول أمين