حبك لوحده مش مبرّر لمطالبتك بحقوق قبل ما تقوم بواجباتك

أنا عندي 19 سنة وبحب واحدة معايا في الجامعة جداً؛ بس اللي حصل إننا في الإجازة دلوقتي، ومش قادر أتصل بيها على الموبايل.. هي قالت لي أنا هابقى أتصل بيك عشان ما يحصلهاش مشاكل في البيت، ووافقت على الموضوع ده عشان مصلحتها.. أنا مش بحب حد يقول لها كلمة تزعّلها.
المهم، حصلت معايا ظروف كتير جداً آخرها إني سقطت في الجامعة وقلت لها في ماسدج إني دبلرت السنة، وكان نفسي أفرّحك، قالت لي في ماسدج: ما تزعّلش نفسك يا محمد، وأنا هاحاول ألاقي أقرب فرصة وأكلّمك فيها عشان عندي مشاكل كتيرة.
لاقيتها بترنّ عليّ كل يوم الفجر رنة وتفصل؛ لكن ما تكلمنيش، ولا سألت عليّ.. هو مش حقي عليها إنها تسأل عليّ وتقف جنبي في الظروف دي؟
والله أنا بحبها، وتعبت جداً لأنها مش جنبي، وزعلان منها أوي، وخايف تكون ما بقيتش تحبني زي زمان؛ بس أنا بحبها.. والله من يوم ما سافرت وأنا حصلت لي حاجات كتير بعدها.
بجد مش عارف أعمل إيه.. أنا بقيت زي الطفل الصغير تايه في الدنيا دي.
م.م
لو عايز تفضفض لنا دوس هنا