لابد أن يعرف أن غلطه كبير ولا عودة إلا في النور

السلام عليكم أنا طالبة حبيت واحد جداً، وهو كمان حبني أوي وما كلمتهوش بالساهل، أنا كلمته بعد 3 سنين، بيترجاني أكلمه، وكان بيحاول معايا كتير، المهم كلمته، وبقالي سنة باكلمه، أنا بصراحة لما كنت باشوفه مرات قليلة كنت باسلّم عليه، والله بعد ما اتحايل عليّ كتير كان بيقول لي أنا هابقى مبسوط كأن العالم كله بين إيديا.
المهم من يومين شفته وطالب مني أبوسه في خده؛ أنا ساعتها انبهرت واستغربت، مش ده اللي حبيته، وزعقت له، بجد بالنسبة لي دي مصيبة، المهم قال لي خلاص ما تزعليش، ومشيت.
بس أنا دلوقتي مش عارفة أعمل إيه بجد زي ما باسمع اللي يعمل كده يبقي واحد مش محترم ومش بيحبني، وعايز يوصل لحاجة واحدة والكلام ده ولا إيه؟!
أنا قلت له مش هاكلمك تاني لغاية دلوقتي بيتذلل لي وبيعتذر لي؛ بس أنا مش قادرة أسامحه لغاية دلوقتي، أنا مش مصدقة إنه يطلب حاجة زي دي، بيقول لي ده من كتر حبي ليكي، والله أنا ما كنت قليل الأدب، أنا باحترمك زي إخواتي وباخاف عليكي، وكلام زي كده.
مع العلم إني متأكدة من حبه ليّ 100% بس مش عارفة أعمل إيه وإنه خلاص كان قدامه شوية ويكلّم بابا، وأنا مامتي عارفة؛ هل أنهي اللي بيننا ده كله والحب ده كله اللي بيحبه لي، ولا أقول له مش هاكلمك فترة عبال ما أحاول أنسى اللي قلته ولا إيه؟
يا ريت تردوا عليّ في أسرع وقت عشان هو مستني ردي، وفعلاً لو أنا رجعت له هيفكر إنه بالساهل كده اللي حصل ولا أعذبه شوية ولا أعمل إيه؟ وشكراً ليكم.
m

لو عايز تفضفض لنا دوس هنا