منهجه هو حرق الدم.. فاجهزي للفراق

أنا ارتبطت بشخص من 6 شهور تقريباً، وكان هو معجب بيّ أوي، وكلّم صاحبتي عشان يرتبط بيّ، كان بيهتم بيّ جداً؛ كل شوية يكلّمني ويتصل بيّ أوّل ما يصحى يكلمني، وقبل ما ينام يفضل يتكلّم لحد الصبح، وفي نص اليوم على طول بيتصل بيّ، كان بيحسسني بحبه ليّ أوي، فأنا حبيت الاهتمام ده وحبيته أوي، وحسيت إنه قريّب مني أوي في كل حاجة، واتغيّرت كتير أوي أوي عشانه في كل حاجة، بس جيت من فترة وحسيت إن اهتمامه بدأ يقل!! وأقول له ليه؟!! يقول لي عشان إنتِ ما بتتصليش بيّ غير لما تكوني نازلة أو راجعة بس، بس أنا والله بحبه أوي ومش راضية اتصل بيه كتير عشان بيبقى بيشتغل ومش فاضي، فأنا بصراحة تعبت وقلت له لازم نرتاح من بعض شوية، يمكن نرجع زي الأول، وبعدها بيوم وحشني أوي، ورجعت أتصل بيه فكان ردّه عليّ وحش أوي، وقال لي خدي أجازة مني لحد ما تخلّصي امتحانات، وبعدين نبقى نتكلّم، قلت له أنا مش عارفة أذاكر؟!! قال لي: لا.. شليني من دماغك!! قلت له مش هعرف أنا نفسي نبقى كويسين، قال لي مش هينفع، قالي على فكرة اللي بينا ده ما عدتش فارق معايا، ومش فارق معايا أكلّمك أو ما كلمكيش.
أنا تعبت أوي من الكلمتين دول، وقال لي أنا عايز أرد لك الكلام اللي إنتِ قلتيه، كنت كل يوم بعيط، وهو كان وحشني على طول، وحاسة إن في حاجة نقصاني نفسي يرجع زي الأول، اتغيّر أوي معايا وما عدش بيكلمني وحتى لمّا بكلّمه بيرد عليّ وحش أوي، يا ريت تقولوا لي أعمل إيه؟!!
lovelymone

لو عايز تفضفض لنا دوس هنا