لقاء حصري مع محمد عدوية

بالصور لقاء حصري مع عدوية من داخل ساقية الصاوي في البروفة قبل الحفل بساعات
فنان بالوراثة... ده أبسط توصيف ممكن نقوله عليه، ومع إنه معاه "جرين كارد" لعالم الفن والغناء باعتباره ابن العبقري "أحمد عدوية"، إلا إنه رفض إنه يمشي في ضل والده، ورفض اشتراط المنتجين فى بدايته إنه يغني شعبي بس، وتحداهم وكان قد التحدي وأثبت نفسه قدام الكل، هو الفنان محمد عدوية، وده كان لقاءنا معاه.
في البداية عايزين نعرف تحضيراتك للحفلة دي.. وخصوصاً إنها متزامنة مع نزول الألبوم، وإنت دايماً متعود تعمل حفلات في ساقية الصاوي؟
نزول الألبوم قَرَّب فهغني نص الأغاني، وهعتذر لجمهوري على تأخير نزول الألبوم.. لأني بعد ما خلصت الألبوم لقيت أغنيتين حسيت إنهم لازم يكونوا في الألبوم، والتأخير برضه لإني حبيت أرجع للجمهور بشكل مختلف وشكل أغاني يحبوها، بالإضافة طبعاً لأغنية النجم أحمد عدوية .
هل إنت شايف إن خطوة الدويتو بينك وبين الفنان أحمد عدوية إتأخرت، وهل حبيت تكون البداية معاك قبل أغنية الناس الرايقة مع رامي عياش؟
كل شيء نصيب، الفنان أحمد عدوية - والدي - جاله فنان محترم قدم أغنية عجبته، ورامي شخص محبوب في بلده وصاحب صوت رائع، حَب يعمل أغنية مع والدي وأنا كنت مرحب جداً بالموضوع لإني مش أناني، أنا حبيت أعمل دويتو قبل كدا بس كل حاجة وليها ظروفها .
لما عرضت عليه أغنية المولد كان رأيه فيها أيه ؟
هو ملقاش إنها مش لون أغانيه لأنها روك، بس هو قالي " أنا ماغنتش اللون ده قبل كده، تعالى نجرب يا محمد"، و عملنا بروفه وطلعت للناس، بس الكلام كان عاجبه لأنها بتقول (في المولد مراجيح وعيال ووحوش) .
مين الملحنين والموزعين والشعراء اللي اتعاملت معاهم في الألبوم؟
كلهم جداد، أنا مش بعتمد على الأسماء.. أنا لو سمعت حاجة حلوة جداً ولشخص مش معروف هخدها، أنا أهم حاجة عندي إن الموضوع يبقى حلو وليه هدف .
سمعنا إن فيه مشاكل بينك وبين شركة كلمة المنتجة للألبوم، وإن يمكن يكون ده هو سبب تأخير الألبوم.. هل ده صحيح؟
أي حد عنده سلبيات وعنده إيجابيات، ممكن أحياناً الواحد يختلف مع حد في حاجات معينة لكن ما يخسروش بعض، أنا أصلاً أول ظهوري كان مع شركة كلمة ( المنتج ياسر حسنين )، وفعلاً الراجل ده وقف معايا كتير أوي، وأول ألبوم كان معاه، وأنا عمري في حياتي ما هخسره، وبشكره جداً لأنه له فضل كبير عليا .
بصراحة شديدة.. عقدك مع كلمة مستمر لإمتى، وهل فيه تعاقد على ألبوم تاني؟
إحنا مفيش بينا عقود، إحنا شغلنا بالكلمة والراحة النفسية .
عرفنا إنك بتحاول تحارب قرصنة الأغاني.. إزاي؟
أنا بعَرَّف الألبوم للناس في حفلاتي اللايف، عشان الناس تعرف الأغاني مني أنا، بدل ما يجروا وراها على النت، وبنحاول نعمل حفلة يكون الدخول فيها بنسخة الألبوم الأصلي .
بحيادية وبصراحة شديدة.. شايف المقارنة بين النجم عمرو دياب وتامر حسني في صالح مين ؟
مقارنة إيه؟.. هو ليه يبقى فيه مقارنة بين عمرو دياب وتامر حسني؟، ليه كل الصحفيين بيسألوني عن الموضوع ده "هو تامر حسني قد عمرو دياب؟" أنا بحب تامر حسني، وهو مكسر الدنيا وشخص مجتهد، بس النجم عمرو دياب ده عملاق، ده بعيد عننا كلنا.. ده تاريخ، وأنا من عشاق عمرو دياب .
إحنا كلنا لسة طالعين.. سواء تامر أو محمد عدوية أو حماقي، محدش يعرف مين نمرة واحد، إحنا في حلبة مفتوحة كلنا بنخبط.. لكن فيه ناس ما ينفعش نبقى معاهم في مقارنة، ولا عمرو دياب ولا إيهاب توفيق ولا هشام عباس، عيب.. الناس دي بنوا تاريخ، لكن إحنا بقالنا 3 أو 4 سنين.. واحد بيعمل ألبوم يفرقع، واحد يمثل فيشتهر أكتر، لكن مقارنات وكدة مينفعش.. أنا صريح جداً ومقتنع بكده .
الحب والزواج... غَيَّروا فيك إيه؟
بقى فيه استقرار في حياتي وتنظيمها، وبقى فيه حالة هدوء جميلة .
بتاخد رأي زوجتك في اختيار الأغاني ؟
آه طبعاً.. هي صاحبتي جداً و بستشيرها في حاجات كتير، حتي هي متواجدة معايا في البروفة النهارده .
أكتر أغنية عجباها في الألبوم أو اختارتها معاك، وقالتلك الأغنية دي هتعلم مع الناس؟
أغنية ( مش مبين )
هل الفنان أحمد عدوية هيظهر معاك في الحفلة في الساقية عشان تغنوا أغنية المولد ؟
لأ مش هيكون الحفلة دي، إن شاء الله في الحفلة اللي جاية بعد نزول الألبوم .
إزاي الفنان أحمد عدوية أثَّر عليك، خصوصاً إن ليك لون أغاني بعيد عن سكة الغناء الشعبي؟
أنا ليا لون الأغاني بتاعي اللي مقتنع بيه جداً، ولكن مقدرش أنكر تأثير والدي عليا.. لولا إسمه أنا كان زماني تعبت كتير عشان أوصل للناس، اتعلمت منه كل حاجة بس ما ينفعش أقارن نفسي بيه، وهو اللي أنتج ليا زمان شرايط وأنا صغير .
التمثيل فين في حساباتك؟
صاحب بالين كداب.. أنا اتعرض عليا أفلام كتير أوي وبمبالغ كبيرة، بس أنا مش بحب التمثيل.. ما بعرفش أمثل، مش عشان كل الناس بتمثل أنا أمثل، يعني عشان البنات تشاور عليا في الشارع؟، بصي.. أنا مش قافل الباب، ممكن تقولي لما ألاقي حاجة لايقة عليا، بس هو مش في حساباتي دلوقتي، أنا موهوب أكتر في الغناء .