أرى وأسمع ولا أتكلم

السلام عليكم، أنا من أشد المعجبين بموقعكم وحريص على قراءة كل جديد تقومون بعرضه على الموقع، ويارب تقدموا كل ما يفيد شبابنا وفتياتنا، وأنا بحب أفضض بين كل حين والتاني وبصراحة باكون مستريح، عندي مشكلة عاوز أشوف ردكم إيه، عندي 27 سنة ،وشغال محاسب ودلوقتي اترقيت وبقيت رئيس قسم في إحدى الشركات الخاصة، مشكلتي إني ما بقدرش أحكي حاجة تخصني لحد أو يعني لإنسان أو إنسانة تعرفني، بالرغم من إني اجتماعي وليّ أصحاب كتير وأنا مستمع جيد، بحب أسمع مشكلات الغير ولو كان عندي مقدرة إني أحلها فبحلها، بس مت باحكيش حاجة عن نفسي حتى لأعز أصحابي.
يعني ساعات بتحصل لي مواقف فبخليها لنفسي، ولو حبيتم تسألوا هل في إنسانة في حياتي! آه فيه بس هي كمان قليلة الكلام، يعني مش كل حاجة باحكي لها لأني باحس إني مش ذي أهمية علشان أحكي حاجة، وبصراحة بيني وبينكم باحس بإثارة لما أكون غامض ومحدش يعرف عني حاجة، وأنا من ناحية تانية باعرف كل حاجة عن الآخرين، أنا عارف إن ممكن ده يسبب مشاكل ليّ في حياتي، بس تعرفوا أنا اكتشفت حاجة إن في زمانا ده قليل جدا لما تلقى حد يسمع، الناس كلها بتكون عايزة تتكلم ومفيش حد بيستنى يسمع حاجة، يعني مثلا لما باكون مع أصحابي كلنا بنحكي عن مواقف مرينا بيها، مشاعر حسينا بيها وأنا بافضل أسمع كل واحد منهم، أنا عارف إنه ده مش صح المفروض عليّ إني أتواصل مع البيئة المحيطة بيّ أسمع وأتكلم.
عشان كده بين الحين والتاني بافضفض عندكم شوية أو ممكن أدردش على النت مع ناس طبعا ما يعرفونيش وباكون طبعا في منتهى السعادة لأني باحكي كل حاجة عني أو مواقف حصلت معايا، أو ممكن أكون معقد نفسياً أو عندي مرض نفسي أو وسواس بس أنا عارف إني ما فيّاش حاجة عموما ده أسلوب حياة، بحب أتبعه ونمط بحب أكون مختلف بيه عن الآخرين، إنتم إيه رأيكم؟؟
أ