السلام عليكم ، انا متابعة وباشوف مشكلات كتير على فضفضة بس بجد عمري ما حسيت إني محتاجة أتكلم مع حد زي النهارده ، وممكن مشكلتي تكون سهلة بس بجد مضايقاني أوي .. أنا بنت عندي 22 سنة ، ومخطوبة من 4 شهور لشاب محترم جدا، ومتدين جدا، ودي حاجة أنا حابّاها؛ لأن كان نفسي يكون جوزي أكثر مني تدينا علشان يشدني معاه. المهم هو أكبر مني ب7 سنين ونص ، وماكانش له علاقات بأي بنات قبل كده، حتى لو أصحاب عاديين، والمشكلة إنه بيحبني أوي، وأنا ساعات باحس إني بحبه بجد وأوقات تانية باحس إني حتى مش عايزة أسمع صوته، وأنا مش عارفة ده من إيه، ومع أي مشكلة بتحصل بافكر إني أسيبه وهو بيحاول يعمل كل حاجة علشان يرضيني .. وبصراحة أنا ساعات بازوّدها في زعلي شوية وأوقات بيكون من غير سبب ، أنا ساعات باحس إني باعمل كده لأنه مش بيزعلني.. وماتقولوش عليّ مريضة نفسيا، أنا بجد أوقات كتير باكون محتاجة إنه يزعق لي أو حتى يزعل مني؛ لكن هو مش بيعمل كده حتى لما بيزعل مني بيتكلم معايا بالراحة، ومشكلته كمان إنه بيحاول يتطبع بطبعي أنا، وأنا مش عارفة أنا مش عايزة أتكلم مع حد من البيت علشان لو كمّلنا مايحسوش بقلق في علاقتي معاه .. وعلى فكرة هو مش إنسان ضعيف الشخصية بس هو متخيل إن ده بيرضيني .. وأنا زهقت أنا مش حابة إن علاقتنا تكون كده .. ممكن تقولوا لي أعمل إيه أكمل ولا كفاية كده ؟ وهو اللي أنا فيه ده صح ولا لأ .. بجد أنا مخنوقة أوي ومحتارة وكمان تاعباه هو معايا لأني يوم كويسة أوي ويوم مش عارفة حتى أتكلم معاه .. أسفة إني طولت وعارفة إن كلامي مش مترتب بس أنا كتبت اللي جه على بالي وشكرا. منى فضفضة الصراحة .. أنت تظلمين خطيبك معك .. لدرجة أثارت شفقتي عليه منك , أنت لست مريضة نفسيا كما ذكرتي ولا هو ضعيف الشخصة كما ذكرتي أيضا .. بل أنت إنسانة فاقدة لتقدير رجل لايستحق سوى التقدير وليس معنى أنه يصبر على غضبك أن طوال الوقت سيظل هكذا .. إتقي شر الحليم إذا غضب , وفي إعتقادي أنك نوعية من النساء لا تنضبط إلا ( بالعين الحمراء ) , فإن بادر خطيبك بذلك تأكدي من عدم وجود رسالتك اليوم معنا , للأسف أحيانا لا نقدر البشر إلا بعد ما نفقدهم أو بعد أن تصفعنا الدنيا بقوة لنبدأ وقتها في إعادة الحسابات . كفاك ( دلع ) غير مبرر و إذهبي لخطيبك وإعتذري له وكوني إنسانة على قدر ما تأخذي منه من إحترام وتقدير ودلال وإلا أنت الخاسرة .