غسيل مخ وكرشة

بقلم : صالح شيحة
نفسى أعرف الناس دى بتفكر إزاى ؟ نفسى أفهم ليه للدرجة دى بيحاربوا كل حاجة حلوة فى حياتنا ..يعنى عشان المذيعة فاطمة نبيل حابة تقوم بشغلها وهى ساترة نفسها ..العالم اللى فى قلوبها مرض اللى بتحب تشوف المذيعة وهى عريانة ..يطلعوا إشاعة إن المذيعة المحجبة ليها فيديو وهى بترقص فى فرح شعبى ..وفى الأخر طبعاً طلع الموضوع كله إفتراء وظلم ..يعنى معنى كده يا عم الحلو أنت وهو إن أنتوا باصمين بالمية مش بالعشرة بس ..إن الرقص مش فن ..وإن الرقص حاجة تكسف ..ولا يمكن أكون أنا فاهم غلط يمكن لما دينا بترقص بيكون رقصها يشرف عشان هى دارسة وواخدة دكتوارة فى الرقص ..
كتير قوى بيحاربوا الإسلام ..ومش واخدين بالهم إن الإسلام هيكسب هيكسب ..مفيش أدنى شك عندى إن الأيام اللى جاية هتكون خير بإذن الله ..وربنا يهدى الناس الغلابة اللى معمول ليهم غسيل مخ وكرشة ومصارين كمان ..يعنى بعد ما عرفوا إن أحمد شفيق فى مستندات بتقول إنه فاسد ..تلاقى واحد بيقولك الفريق أحمد شفيق راجل حازم وكان هيقدر يشيل البلطجية ..وندور ونبحث ونشوف هل والده كان بيناديله بالإسم الدلع حازم وسألنا الأقارب والجيران تطلع المعلومة غلط ..
ورداً على ما يقولون حرية الإبداع ..أنا معاهم طبعاً ..فى الإبداع بس الإبداع المفيد المحترم .. مش التقليع والأحضان والإثارة ..وتقولى إبداع ..دى حاجة تنقط ..يعنى لما واحد يفضل طول اليوم شقيان فى صنعته ويبدع فيها ومحدش يقول عليه مبدع ..أما لما واحدة تصور مشهد يكون مُجهد شوية ..فى غرفة النوم ..يقولك الفنانة المبدعة ..والبوسة اللى كانت بينها وبين البطل بوسة فنية محدش منهم إتحرك فيه مشاعر الرجل والأنثى ..