بقلم صالح شيحة أمانة عليكم لو مت من الفرسة إعدموا الجهل خلصوا عليه علموا الأجيال اللى جاية يعرفوا الصح من الغلط إصرفوا مليارات على التعليم والبحث العلمى إهتموا بالمخترعين ..المصرى مخه حلو والله العظيم بس كانوا بيمنعوه إنه يبدع أو يقول رأيه والحمد لله جه وقت الإبداع . معروف عنى وسط صحابى إن معظم كلامى هزار وضحك بس اللى بيشوفنى الأيام دى على طول بيسألنى ويقولى مالك يابنى فيه إيه أنت مش كان نفسك مبارك يمشى أهو مشى لأ وكمان ممشيش بس 00 ده كمان هيتحاكم 00 ويضحك على نكتة كنت قايلهاله إن لو كان مبارك فضل كنت زمان دلوقتى إتحولت من راجل إلى حاجة متسرش بس الحمد لله إنه مشى . أفتكر أيام إنتخابات الرئاسة 2005 دخلت اللجنة الساعة 12 الظهر وقعدت أدور على إسمى ملقتهوش وكان فى كشوفات بأسماء أعضاء الحزن الوطنى بس ...زهقت وروحت نمت.. صحيت حوالى الساعة 5 المغرب رحت تانى اللجنة ولقيت إسمى بعد دوشة ويومها أنا كنت إديت صوتى للدكتور أيمن نور ووالدى صوته إداه للدكتور نعمان جمعة ورحت قعدت فى الشارع بتاعنا لقيت واحد صاحبى ما رحش إنتخب خدته ساعتها ورحنا عشان ينتخب لقينا اللجنة قفلت قبل الميعاد بنص ساعة . قعدت أهبل شوية وأقول كلام مينفعش طبعا أقوله دلوقتى بس كان غصب عنى أنا مش قليل الأدب بس أعمل إيه كانت كل حاجة بتستفزك ..حتى ساعتها المستشار اللى قاعد إفتكرنى أهبل وقعد يضحك عليا قعدت أقول : عصر الرفاهية هيستمر ربنا يخليك لينا يا حسنى وإحنا .... كلمة وحشة يا بلد أنا قصدى طبعا العكس ليلتها حلمت حلم وحش قوى إنهم خدونى المعتقل وكان هيعملوا حاجة وحشة بس الحمد لله طلع حلم وعلى فكرة فى الحلم بردة معملوش حاجة لحقت نفسى . دلوقتى بعد اللى أنا قلته ده فى ناس لسة زعلانة على حسنى بس أنا عاذر ناس منهم ومضايق من ناس منهم عاذر الإنسان البسيط الجاهل اللى ضحك عليه اللى أنا مضايق منه اللى فاهم كل حاجة بس مش بيراعى ربنا اللى سهل عنده يشوف الناس بتقتل بعض عشان مصلحته تمشى . مشى أحمد شفيق زعلوا عليه وقالك ده كان راجل جدع ده الشباب بتوع ميدان التحرير هما اللى وحشين عيال بتستهبل عيال عايزة الحرق .. هو مش بردة العيال دول هما اللى مشوا الريس اللى كان بيتريأ على الشعب ويقول خليهم يتسلوا ومش هما بردة اللى نفسهم الشعب يتمتع بالحرية ونفسهم تلاقوا العلاج بسهولة مش تتذلوا .. هو أنتوا مش بتقروا جرايد وتشوفوا الفضايح اللى فيها . ناس كتير بتحكى عن اللى بيحصل فى البلد وكأن السبب فيه العيال اللى فى ميدان التحرير أنا أسف فى اللفظ عيال إيه والله العظيم رجالة وربنا يحميهم الناس مش واخدين بالهم إن فى ناس يهمهما الثورة تفشل وممكن يعملوا أى حاجة عشان تفشل زى البلطجة وإشاعة الفتنة بين المسلمين والمسيحيين . على فكرة أنا ليا صحاب كتير مسيحيين و كنت عامل عملية وأنا فى تانية إعدادى وأول واحد جه زارنى كان صاحبى مرقص يعنى مهما يحاولوا يفرقوا بين المسلمين والمسيحيين مش هيقدروا ...أنت ياواد يا مرقص قول للى بيوقع بينى وبينك إحنا إيه سوا ....قوله إن إحنا حبايب .. قوله إن أنت اللى هتدافع عنى لو حد فكر يؤذينى وأنا بردة هدافع عنك لو حد فكر يبصلك ومستحيل نضرب فى بعض ... إحنا ممكن إحنا الإتنين نضربه أما نضرب بعض لأ