المصرى اللى على حق هو اللى يقول للغلط لأ

من كام يوم كده لفت انتباهى إعلان جميل كده ولذيذ... وكالعادة أول ما تسمع صوت طارق نور تعرف توماتيكى أن الإعلان ده تبع الحكومة... المهم الإعلان ده بتاع سكك حديد مصر... اللى فيه المقولة المشهورة "المصرى اللى على حق هو اللى يقول للغلط لأ"... وطبيعى جدا أن الإعلان ده يستفزك وبالذات لو كنت من رواد السكة الحديد... بس أنا هنا مش زى الناس وهاقولك إن القطر اللى كان موجود فى الإعلان المستحمى النضيف ده مش مصرى... ده من ألمانيا القمح آه والنبى... ومش هاقولك ازاى ولاد الأيه قدروا يعملوا ديكور زى محطة رمسيس بالظبط بس على نضيف شويتين... ولا هانتكلم عن التذكرة المدعمة اللى بيقولوا عليها اللى فارقة عن الميكروباص جنيه واحد... بس القطر أفضل لأنك بتفضل طول الطريق واقف على قفاك... ولا برده هاحكيلك ع البلطجة بتاعة محطة رمسيس اللى عشان تعدى من الميدان وتروح أحمد حلمى ومش هاتركب حاجة والنعمة ما هاتركب حاجة دا أنت هاتعدى بس... يقولك ادفع جنيه ياستاذ رسم مرور اصله شايفنى عربية لانسر... ولا بقى هاقولك عن المواعيد اللى زى الألف بتاعتهم القطر معاده يطلع 4:45 وهو أصلا بيدخل المحطة عشان يركب الناس 5:00 ولا هانقول إن الراجل اللى كان مسطح فى الإعلان كان مسطح عشان مش معاه حق التذكرة لا وحياتك دا بس مش لاقى مكان تحت فقال اطلع الدور التانى أوسع....
لالالالا سيبك من الكلام ده كله واخدين عليه ومتعوده ديما على المرمطة فى القطر دى... إنما أيه بقى حكاية المصرى اللى على حق دى تفتكر قصده يقول إن إحنا مش مصريين... وعشان كده مش بنقول لأ على أى حاجة... ماهو أحنا كل يوم بنشوف ونسمع ألف غلط... وبنحط جوانا مليون لأ ومع ذلك ما بنقدرش نطلعها ونقول للغلط لأ... لما هو كده أمال أحنا مين يكونشى إحنا هنود ومش واخدين بالنا ما هو بردك الشبه قريب من بعضه... ولا تفتكر أنه فى القاموس بتاعه كلمة غلط معناها تزويغ وتسطيح ع القطر وبين قوسين كده ليس لها أى معانى أخرى عندنا... يعنى الميه اللى فيها مجارى دى... والفاكهة اللى بتتروى بالصرف الصحى... والعيش أبو فيران... والزحمة المؤرفة... والكوسة فى كل حاجة... والزبالة فى الشوارع... والبلطجة من سواقين السيرفيس... ولا ياعينى التباعين وكمان مرة التباعين... كل ده مش معناه غلط هو القاموس بيقول كده... ولا يكونش قصده بكلمة المصرى اللى حق دى زى سمر على حق ما هى على الطبلة نزلت ترقص وإحنا على الغلط بقينا نطنش والحكومة علينا نازلة استهبال وتسقع...
أنا عن نفسيتى شكيت فى نفسى وأول حاجة عملتها روحت جريت على إذاعة صوت القاهرة جايز بقى بيقول "هنا بومباى" ولا حاجة بدل "هنا القاهرة"... ده مش إعلان يا أساتذة... ده قصدهم ينكشونا ويقولونا انتوا مالكوش لازمة فى البلد... وبكل بساطة الحكومة بتطلب مننا نقول لأ... يا جماعة حد يقول لأ... زهقنا من كتر ماحدش بيقولنا لأ... ياناس عايزين حد يوقفنا بأه... سايق عليكوا النبى حد يتنحرش ويوقولنا لأ مره ... مفيش فايدة... بس أنا عن نفسى هاقول لأ بس بشرط لما أعرف الأيد اللى فى الإعلان اللى بتقول لأ وتأفش على أفا الغلط أيد مخبر عادى ولا أمن دولة...؟؟؟ يا الله بأه إحنا من زمان يابنى مضحوك علينا... الله يرحمك ياحسن ياعابدين...