شواكيش

الخلطبيطة والزيطة والزمبليطة !!

بعد ثلاث جلسات من الحوار المجتمعى لمناقشة قانون الانتخابات.. عايزين نسأل : يا قانون قولى رايح على فين؟!
حسب تقرير دولى : الإخوان أصل التنظيمات الإرهابية فى العالم.. وطبعاً «التفجيرات ما بتكدبش»!!
الفنان الشعبى شعبان عبد الرحيم طالب الحكومة بمنحه الدكتوراه الفخرية أسوة بالفنان الهندى «اميتاب باتشان».. وإييييه!!
وصلة رقص لأم قاتل الطفلة «زينة» فى حفل يوم اليتيم.. صحيح اللى قال تقتل القتيل وترقص فى جنازته!!
كيميائى هشم رأسي والديه «بيد الهون» فى الشرقية.. إلحقووونا يا عالم يا هوه.. هيه الدنيا جرى فيها إيه؟!
على رأى الإعلامى تامر أمين للناشطة اليمنية توكل كرمان: «إلى مزبلة التاريخ».. المهم تدفع رسوم النظافة!!
برنامج أبلة «فاهيتا» للكبار فقط .. وطبعاً الصغار يشاهدونه فى حفلة حدوتة ما بعد النوم!!
الراقصة اللولبية «صافيناز» أصبحت ماركة مسجلة فى البرامج التليفزيونية على طريق «الرقص نص النعنشة»!!
على خُطى الريان .. «المستريح» ماركة مسجلة.. لهف تحويشة عمر بلدياته «الصعايدة» وركب الناقة.. وأخيرا وقع فى المصيدة!!
بمناسبة احتفالات شم النسيم.. أصبحت ريحة المصريين بعد الثورة بصل وفسيخ ومولوتوف!!
95 عملية إرهابية منذ حمل اللواء مجدى عبد الغفار حقيبة وزارة الداخلية.. يا إرهاب حياتى يا عين!!
أبصم بالعشرة أن العيش جاااى جاااى.. والحرية جاااية جاااية.. والعدالة الاجتماعية جاااية جااية.. بسن هو فين مفتاح الثورة ؟!
شوفنا 4 فصول السنة فى يوم واحد.. عقبال ما نشوف الأربع صوابع الإخوانية بتنزل فى مشنقة «عشماوى»!!
وزير الكراسة والكشكول محب الرافعى توعد تجاوزات المدارس «الدولية» تحت تهديد: «جرس العزبة ضرب ضرب»!!
على رأى سامح عاشور نقيب المحامين : «التعليم المفتوح بدعة».. ربنا يفتح عليك يا «أفوكاتو مصر»!!
بعد قرار الحكومة بتعيين الدكتور أحمد عبد العال رئيساً لهيئة الأرصاد الجوية. يارب يكون الطقس هذا العام على هوااااا الحكومة!!
أسامة سلامة رئيس رابطة تجار السجاير اقترح تقنين بيع الحشيش على طريقة «حششنى شكراً»!!
بمناسبة دعوة التحشيش العلنى نُهدى أغنية «الحشاشين»: «البلد دى بلدنا.. مش بلد الحشاشين.. وإحنا خلاص يا دنيا قاعدين مهيسين».. وكيييييييف!!
بعد المطالبة بتقنين بيع الحشيش .. ستصبح سلامات أهل الكيف: «مزاج الخير» و«صباح البرامادول» و«100مسا عالناس المهيسة»!!
حشاشو مصر يستهلكون «حشيش» ب42 مليار جنيه سنوياً... وإدينى «القرش» بسرعة ارجوك محتاج الجرعة!!
رئيس نادي الزمالك عايز سندوتش حشيش بالفسدق لحفيده؟؟ هيه ناقصة «عيال مساطيل»!!
على رأى المثل: اللى أوله ثورة شعبية آخره «ثورة هم هم» والحدق يفهمها وهيه طايرة من الجوع!!
فى سالف عصر الثورة وهوان الإخوان.. كانت ليالينا ألف «ليلة ونيلة».. ودلوقتى أصبحت ليالينا ألف «نيلة ونيلة»!!
بما إننا نعيش عصر «الخلطبيطة».. الواحد مننا مش عارف الناصح من ابن العبيطة.. والحظ لما ييجى ميفرقش بين أهل الزيطة ولا الزمبليطة!!
آخر شوكشة
يحدث الآن فى مصر.. ناس شبعانة ..وناس جعانة.. وناس شقيانة.. وناس بتبحث عن لقمة العيش فى صندوق القمامة.. وناس «مستريّحة» بتلعب بفلوس الغلابة لعبة الاستغماية.. وعجبى ع الزمن العجبى!!
‏Elzaky2020 @ gmail.Com