شواكيش

أمركة الدواعش!

بعد دك معاقل تنظيم «داعش» الإرهابى فى ليبيا.. الشعب المصرى بيقولك: «يا سيسى ما يهزك داعش»!!
بالمناسبة «داعش» صنيعة أمريكا.. و«كفار بيت المقدس» صنيعة الإخوان.. والإخوان مصدر كل الإرهااااب!!
«مبارك» تهكم على المعارضة ب «خليهم يتسلوا» والنهاردة خدوا بالكم من رشاوى فلول البرلمان اللى جاى.. وبرضه «خليهم يتسلوا»!!
بمناسبة الانتخابات الوشيكة.. خدوا بالكم من الفلول.. فِل قاعد مصحصح.. وفِل نايم بعين واحدة.. وفِل ماشى مسطول وبيهذى على طووول: أنا جدع.. وبفلوسى راجعلك يا برلمان»!!
92 مرشحاً يتعاطون المخدرات ومرضى نفسيون.. علشان كده قولوا معانا: «المرشح ده عنده جولة.. ساعة يروح وساعة ييجى»!!
قطر «جرت» سفرها من مصر «زحفاً» على طريقة «ضربنى وبكى وسبقنى وإشتكى»!!
سمع هُس.. الراقصة اللولبية سما المصرى ستخوض انتخابات البرلمان القادم على خُطى «رقصنى على واحدة.. ونص»!!
المطرب مصطفى كامل نقيب المهن الموسيقية سيخوض انتخابات البرلمان الثورى رافعا شعار «قشطة يابا»!!
بعد ارتداء الإعلامى جابر القرموطى بدلة الإعدام.. أكيد «عشماوى» قال فى سره: «هوه أنا ناقص.. كفاية عليا إعدام الإخوان»!!
بدر عبد العاطى المتحدث الدبلوماسي للخارجية نطق بلفظ خارج على الهواء.. سامحه ياااارب!!
كنا نعانى من اختراع «العلاج بالكفتة».. والآن نعانى من إرهاب «الإسلامو فوبيا»!!
7 وجوه إعلامية على أبواب البرلمان.. اضحك علشان الشاشة هتطلع «مشفرة»!!
المرأة الفولاذية سعاد الخولى نائب محافظ الإسكندرية سحبت «البساط الإعلامى» من تحت أقدام المحافظ السكندرى هانى المسيرى.. أصلها مسيطرة دايماً!!
محافظ الشرقية الجديد رضا عبد السلام بيقول لكل موظف فاسد: «فوق مش هسكتلك».. ده تهديد من مسئول ولا وصلة ردح!!
محافظ الجيزة خالد زكريا قال فى المجلس التنفيذي: «اللى هيرصف شارع ها نكتبه باسمه».. تمليك ولا إيجار!!
«الأوقاف» أطلقت حناجر السلفيين على تنظيم «داعش» الإرهابى قبل بدء ماراثون الانتخابات .. وكله «رحمة ونور»!!
على رأى الإعلامى الثورجى توفيق عكاشة: وزير الكهربا نايم تحت السرير « ده أكيد مولع صوابعه شمع»!!
على رأى مولانا الإعلامى المتلون خالد الجندى « الإعلاميين فى مصر ماسكين الطبلة والرق ليل نهار» وطبعا الرقص السياسى للمشاهدين لحد 6 الصبح!!
قناة «القاهرة والناس» أجلت فجأة حوار الصعلوك السياسى «أبو حديد» إلى أجل غير مسمى تحت تحذير «اضرب الحديد يخاف الصفيح»!!
سؤال محيرنى: «من يلتهم تورتة البرلمان القادم.. الفلول أم الفلوس أم الاثنان معاً؟!
مطلوب وزير متخصص فى تفجير الأسعار عن بعد.. ووكيل وزارة لتوصيل الدعم «الجوعى» للغلااااابة !!
على رأى الإعلامي أحمد موسى: «داعش « الجناح العسكري لأمريكا.. وطبعاً ده إرهاب «أمركة الدواعش» فى بلاد العواجز !!
آخر شوكشة
اللى أوله «نور» آخره فلووول.. واللى فات مات.. وإحنا ولاد الفلووول.. واللى يدفع كاش يجعلص علي كرسى الحصانة وينووول الرضا والسرور.. وعجبى على الزمن العجبى!!
‏Elzaky2020 @ gmail.Com