دعاء المسطول يارب افرجها كمان وكمان ويرجع الحشيش زي زمان

بالبلدى

الحكومة استغلت إن المصريين مشغولين بمتابعة مباريات كأس العالم وقامت باغتيال الشاب خالد سعيد إللي مات شهيد برغم تقارير الحكومة المذيفة إللي عايزة تقنعنا إن خالد سعيد مات بسبب إنه بلع لفة بانجو وطبعا مفيش حد فايق أو مسطول يصدق إن خالد سعيد بسبب ابتلاعه البانجو مات، وحتي لو خالد سعيد مات بسبب ابتلاعه البانجو برضه الحكومة هيه اللي مسئولة عن وفاته أوقتله لان الحكومة لمه عملت أزمة الحشيش خلت الحشاشين المحترمين ينحرفوا ومع عدم وجود حشيش انحرفت مجموعة كبيرة من ضريبة الحشيش مثلا بعض ضريبة الحشيش من اصدقاء صاحبي المسطول انحرفوا مع عدم وجود حشيش من الحشاشين من انحرف وبقي يضرب «بيرة» ومعلومة ليكم مبيعات البيرة والخمرة زادت 200% من ساعة الحكومة ما عملت أزمة الحشيش وبعض الحشاشين المحترمين انحرفوا وبقوا يضربوا كوكايين وهيروين وكمان بانجو.
ومعروف في عرف ضريبة الحشاشين إن الكوكايين والهيروين والبانجو بيلحسوا الدماغ واللي بيضربهم بيبقي مدمن ليهم عكس الحشيش اللي بيضربه عمره ما يكون مدمن ليه وبعدين الحشيش بيهدي الاعصاب وكفاية إن أمريكا اللي بتحكم العالم اكتشفت إن الحشيش علاج كما قلنا وكتبنا الأسبوع اللي فات والأسبوع اللي قبل اللي فات.
وإن شاء الله الاسبوع اللي جاي سوف أواصل الكلام مع صديقي المسطول اللي مابقاش مسطول من ساعة أزمة الحشيش واللي إن شاء الله الاسبوع اللي جاي حيكون صديقي المسطول «مسطول» بعد حدوث انفراجة مؤقتة لأزمة الحشيش وربنا يفرجها كمان وكمان ويرجع الحشيش زي زمان.