مطلوب عروسة بشروط للمسطول

بالبلدى

الاسبوع إللي فات حضر ليلة عزاء الراحل الكبير محمود السعدني مجموعة كبيرة من رموز مصر في السياسة والرياضة والصحافة والفن ولأن صديقي المسطول كان معايا في العزاء، حأسيب صديقي المسطول هوه إللي ينقل لكم لقطات وملاحظات واسئلة من سرادق العزاء.
يقول المسطول في أول ملحوظة لفتت انتباهه ليه الكاتب الصحفي الكبير محمد حسنين هيكل ما حضرش العزاء مع أنه موجود في مصر ويوم العزاء كان بيتغدي مع سيف الإسلام ابن الرئيس القذافي إللي كان في زيارة لمصر، قلت للمسطول : دي فعلا ملحوظة مهمة ولكن مالفتش انتباهك حضور جمال مبارك فقال لي صاحبي المسطول طبعا لفت انتباهي وكنت عايز أوجه له رسالة بالنيابة عن إخواننا ضريبة الحشيش وهي ياجمال لو عايز تنجح في رئاسة الجمهورية لازم توفر الحشيش لملايين الحشاشين الموجودين في مصر وحزب الحشاشين مش قليل ده فيه أكثر من عشرة ملايين حشاش في مصر وللأسف الحكومة بتحارب فيهم يعني بالبلدي كده ياجمال لازم تقول للحكومة وفروا الحشيش للحشاشين بدلا ماتحاربوا الحشاشين لان اللي بتعمله الحكومة مع الحشاشين ده سوف يؤدي إلي ثورة ملايين الحشاشين المصريين.
حاسيب ليلة عزاء معجزة الصحافة المصرية الأستاذ محمود السعدني ونروح لفرح أحمد ابن عصام فهمي صانع النجوم في بلاط صاحبة الجلالة الصحافة وقبل ما نروح ونشوف صاحبي المسطول حيقول إيه عن فرح أحمد عصام فهمي إللي حضره. قلت لصاحبي المسطول أنت مش ناوي تتجوز بقي فقاللي المسطول ومين قالك إني ما بافكرش في الزواج بس عندي شروط للعروسة إللي بأدور عليها علشان أتجوزها فقلت للمسطول إيه هيه شروطك يا مسطول فقاللي أولا تكون محجبة وبتصلي وتعرف ربنا ثانيا تكون بتعرف تلف سجاير حشيش ثالثا لازم يكون عندها سبعين سنة وتكون كمان عذراء هيه ديه شروط صاحبي المسطول في عروسته.