الحكومة قبضت علي الحاجة بتاعة الحشيش

بالبلدى

مفيش فايدة جملة قالها الزعيم الراحل سعد زغلول من حوالي تسعين سنة ولقيت صاحبي المسطول اللي مابقاش مسطول بيقولها لي تعليقا علي أزمة الحشيش والحشاشين المصريين اللي مش لاقيين الحشيش
ويقول المسطول اللي مابقاش مسطول خلاص الأيام الحلوة بتاعة الحشيش والحشاشين خصلت والأيام اللي جاية أيام سودة منيلة بنيلة علي دماغ الحشاشين المصريين يواصل المسطول اللي مبقاش مسطول كلامه قائلا أنا مش عارف ليه الحكومة والمسئولين المصريين نازلين حرب وقبض علي الحشاشين فقلت لصاحبي المسطول سابقا هوه فيه حد من اللي بيبيعوا الحشيش اتقبض عليه فردالمسطول سابقا قائلا أيوه الحكومة قبضت علي « الحاجة بتاعة الحشيش» اللي كانت بتجيب لي الحشيش من الاسكندرية والحاجة دي كانت ست اسكندرانية جدعة وشغاله شغلانه شريفة علشان تقدر تربي عيالها اليتامي من بيع الحشيش ودي مهنة شريفة الحاجة بتاعة الحشيش كانت بتيجي وتجيب ليه «فرشة الحشيش» لكن وزارة الداخلية منها لله قبضت علي الحاجة الاسكندرانية بتاعة الحشيش وقامت الحكومة بمصادرة فرشة الحشيش اللي كانت مع الحاجة بتاعة الحشيش وأنا زعلان علي الحاجة بتاعة الحشيش انه اتقبض عليها وزعلان أكثر علي فرشة الحشيش اللي أخذتها الحكومة.
قلت لصديقي المسطول اللي مابقاش مسطول وبقي مسطول سابقا ياتري ياصاحبي هاتقول إيه فقال المسطول سابقا أنا بأقول نعمل اعتصام للحشاشين علي رصيف مجلس الشعب كما كتبت جريدة الدستور يوم الأربعاء اللي فات.
فقلت لصاحبي المسطول سابقا طيب لو عملنا اعتصام مش ممكن الحكومة تيجي تقبض علينا أنا وإنت واصحابنا الضريبة فقال صاحبي المسطول اللي مابقاش مسطول خلاص نغير مكان الاعتصام ونخليه عند سور سفارة هولندا بالقاهرة ولو جت الحكومة تقبض علينا نعمل لجوء لسفارة هولندا وهي تحمينا وتدافع عنا لان في هولندا الحشيش بيباع في المحلات والكافيهات وهولندا البلد الوحيدة في العالم اللي بتحترم الحشاشين.