صاحبي المسطول مبقاش مسطول

بالبلدى

· الحشيش موجود في مصر من أيام الفراعنة والقدماء المصريين واختفاء الحشيش ده لعبة من بعض المسئولين اللي ليهم مصالح في انتشار الهيروين والكوكايين
رحت لصاحبي المسطول لقيته محبط وزعلان بسبب أزمة الحشيش وقلت له ياصديقي المسطول إيه العمل مع هذه الحكومة...
اللي مفيش فيها أي أمل إنها تحل أزمة الحشيش والحشاشين في مصر.. قال المسطول أولا ما تقلش علي مسطول لأني مابقتش مسطول بعد اللي عملته الحكومة المصرية فيه وفي باقي الحشاشين اللي بقالهم أكثر من شهرين وهمه متعذبين من اللي بيعمله فيهم المسئولين المصريين اللي مش فاهمين إنهم بكده حيخلوا مصر حتقوم فيها ثورة الحشاشين لأول مرة في تاريخ المصريين.
ويتكلم صديقي المسطول اللي مابقاش مسطول ويقول إن الحشيش موجود في مصر من أيام الفراعنة والقدماء المصريين واختفاء الحشيش ده لعبة من بعض المسئولين اللي ليهم مصالح في انتشار الهيروين والكوكايين ولو مش مصدقين روحوا وشوفوا إزاي الهيروين والكوكايين منتشر بين الطبقة الراقية في مصر وأيضا بعض الفنانيين والمطربين بقوا يضربوا هيروين وكوكايين بدل الحشيش إللي هو المزاج الرسمي.. فقلت لصاحبي المسطول سابقا برضه انت ما قلتش إيه الحل للإخوة الحشاشين المصريين اللي مش لاقيين الحشيش.. فقال المسطول اللي مابقاش مسطول.. بص مش فيه أطفال الشوارع بيضربوا كلة وبانجو قلت له : آه في أطفال شوارع، فقال المسطول سابقا الأيام اللي جايه أيام سودة علي الحشاشين اللي بانصحهم يضربوا «كلة وبانجو» وخلاص مش حيبقي فيه أطفال الشوارع حيبقي فيه حشاشين الشوارع.