شبابنا

مسحراتى مصر البهية
اصحى وسبّح رب البّرية
مشيت ارتّل وانشد واجوّد
وصوتى يجرى بين النواصى
هنا بانقر.. هنا باعوّد
هنا باحوّد عن المعاصى
لو كنت بحرى
لازم اقبّل
وإن كنت قبلى.. لازم ابحّر
ولحد آخر نفس ف صدرى
هاشد قلبى وتر واسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبّح رب البّرية..
■ ■ ■
مسحراتى دايماً بيفرح
لما بيلقى ف كل مطرح
شبابنا مصرى
أصيل وعصرى
أمل منور
عايزينه يطرح
■ ■ ■
يا خلق هووه.. يا أهل الهلمُة
من غير شبابنا هانعيش ف غُمة
ولادنا هُمّة أجمل ما فينا
واللى يجدد شبابنا.. هُمّة
جوه المعامل أو ف المظاهرة
شبابنا صادق وروحه طاهرة
أدوا له فرصة يبنى بلاده
بدل العصاية.. أدوا له زهرة
أدوا له فسحة أمل ف بكرة
سيبوه يحب.. أحسن ما يكره
خلوه يحقق ذاته بذاته
هو اللى جى وإحنا اللى ذكرى
■ ■ ■
أولادنا مالهم باللى جرى لنا
لا نهبوا أرض ولا سرقوا مالنا
ما بنوش عمارة وقعت علينا
ولا حد فيهم خيّب أملنا
شبابنا طاقة.. على البراءة
وضميره لسه مليان إضاءة
بكلمة صادقة.. رح توصلوله
ولا بالمنافقة ولا بالحداقة
أدوا له فسحة أمل ف بكرة
سيبوه يحب أحسن ما يكره
خلوه يحقق ذاته بذاته
هو اللى جى وإحنا اللى ذكرى
■ ■ ■
شبابنا أعلم منا بطريقه
بلاش صدوركم وياه يضيقوا
إدوا له فرصة يزرع وروده
بدل ما نرمى يومنا ف حريقة
كلامى واضح.. آخر المتمة
ضُموا شبابا بالعقل ضمة
خلوه يحرر أيام حياته
دا الحُر قادر.. والخنقة سامّة
إدوا له فسحة أمل ف بكرة
سيبوه يحب.. أحسن ما يكره
خلوه يحقق ذاته بذاته
هو اللى جى.. وإحنا اللى ذكرى
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يا رب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يا رب
■ ■ ■
المصرى بَنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب