مسحراتى مصر البهية.. ف ليلة قدرنا

اصحى وسبح رب البرية
مشيت أرتل وأنشد وأجود
وصوتى يجرى بين النواصى
هنا بانقر.. هنا باعوّد
هنا باحوّد عن المعاصى
لو كنت بحرى.. لازم أقبّل
وإن كنت قبلى.. لازم أبحّر
ولحد آخر نفس ف صدرى
هاشد قلبى وتر وأسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبح رب البرية..
■ ■ ■
مسحراتى داير
والدنيا مرّحبة
يدعيلكوا بالبشاير
والصحة والصبا
بادعى لمصر البهية
بادعى ليكم وليا
يتلم شملنا
ونداوى بالمحبة نفوس متغربة
والحضن اللى يساعنا
يكمل بالطبطبة
بادعى ف ليلى ونهارى
للناس الطيبة
لو ف اجتماع وزارى
أو قعدة مصطبة
■ ■ ■
بادعى ومش كتير
نعوض اللى فات
ولا يبقى فيه فقير
ف بلاد الأهرامات
كوباية ماء نظيف
لكل طفل مصرى
وسيادة الرغيف
مايكونش لحد حصرى
المنهج الدراسى
يتنقى من الغبا
والتعليم الأساسى
يبطل شقلبة
بادعى ف ليلى ونهارى
للناس الطيبة
لو ف اجتماع وزارى
أو قعدة مصطبة
■ ■ ■
يارب أشوف ف بلدى
نور العقول منور
ولا أشوف ضمير مصدى
ولا انتخاب مزور
وبادعى بالهداية
لزمرة الفساد
تلحقهم العناية
بعد فسادهم ما زاد
ونخلص م الزبالة
وتعم الكهربا
والعلم والعدالة
يقولولنا يا مرحبا
بادعى ف ليلى ونهارى
للناس الطيبة
لو ف اجتماع وزارى
أو قعدة مصطبة
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يا رب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يا رب
المصرى بنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب