هاجيبك يا فول

مسحراتى مصر البهية
اصحى وسبّح رب البرية
مشيت ارتل وانشد واجوّد
وصوتى يجرى بين النواصى
هنا بانقر.. هنا باعود
هنا باحوّد عن المعاصى
لو كنت بحرى
لازم أقبّل
وان كنت قبلى.. لازم أبحر
ولحد آخر نفس ف صدرى
هاشد قلبى وتر واسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى احنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبح رب البرية..
■ ■ ■
أسحّر ما اسحّر
أقبّل وابحّر
هادور وافحّر
واجيبك يا فول
يا لوز الغلابة
يا أكل الطيابة
وأهل النجابة ولاد الأصول
زرعتك.. ربحتك
ولا يوم قاوحتك
وبافرح بريحتك
وادق الطبول
مدمس.. مدمس.. ف قلبى ملمس
تعالى وغمس.. تنول القبول
أكلتك بدقة
أكلتك برقة
أكلتك ف شقة
سبقت الخيول
ندشك بصارة
وناكلك ف حارة
وقصر وعمارة
تغذى العقول
بزيت أو بسمنة
تخفف آلامنا
ولادى وحرمنا
جميعا نقول
مدمس.. مدمس.. ف قلبى ملمس
تعالى وغمس.. تنول القبول
هاسيبك يا لحمة
واروح للمزاحمة
عشان سعره رحمة
وأقدر أنول
يا حباية ناعمة
يا طعمية طعمة
ومن ربى نعمة
لا يمكن تزول
يا فول يا حليفى
يا مالى رغيفى
رح اعزم وليفى
واغيظ العزول
مدمس.. مدمس.. ف قلبى ملمس
تعالى وغمس.. تنول القبول
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يارب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يا رب
المصرى بنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب