يا رب تحضر كما نريد

مسحراتى مصر البهية
اصحى وسبح رب البرية
مشيت أرتل وأنشد وأجود
وصوتى يجرى بين النواصى
هنا بانقر.. هنا باعوّد
هنا باحوّد عن المعاصى
لو كنت بحرى
لازم أقبّل
وإن كنت قبلى.. لازم أبحّر
ولحد آخر نفس ف صدرى
هاشد قلبى وتر واسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبح رب البرية..
■ ■ ■
مسحراتى يا عيد.. يا عيد
يارب تحضر كما نريد
مش بس زينة على المعالم
وولاد بتلعب على السلالم
يارب تحضر زمن مُسالم
والعقل عالم.. والقلب حالم
والدنيا خالية من كل ظالم
ونقول لفرحك هل من مزيد
يارب تحضر كما نريد
■ ■ ■
يارب تحضر تلقى العدالة
هى اللى واخدة بإيد قانونّا
والليل يغنى غُنا الأصالة
ف يوم ما يسهر مع فنونّا
والقمح يملا الغيطان ويسمع
صوت البلابل على غصونّا
واحنا اللى ندى للغير معونة
ومن شقانا ندفع ديونّا
ونستعد بأمل ف بكرة
وناس تفيدنا ولا تخونّا
ونستعد بأمل ف بكرة
من شر داء النفاق يصونّا
ونقول هانبقى..
بالفعل نبقى
أغانينا تخلص من كان وكُنّا
وبرغم طيشها.. نقدر نعيشها
حرية تهدم جميع سجونّا
يارب تحضر ياعيد وإحنا
معطرينها.. فروض وسنة
نعرف سبيلنا.. ويكون دليلنا
خطوة نبينا ف جميع شؤونا
ياعيد تعالى.. ف كل حالة
جدد لقانا.. بدد ظنونّا
دا الشوق لحضنك مالى عيونّا
ومستخبى جوه الوريد
مسحراتى ياعيد ياعيد
يارب تحضر كما نريد
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يا رب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يا رب
المصرى بنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب