حكاية شعب خاين

ياه على الحكاية لما بتبقى حقيقة، بجد بتبقى حاجة فظيعة.
الحكايات بتاعت الحاكم المقرف بتاع زمان بتعيد نفسها تاني بس بشكل مشابه شوية تبتدي الحكاية بمنتهى البساطة كان يا مكان فيه حاكم ظالم باطش مفتري، شعبه زهق منه و مل من حركاته، الحاكم ده عصره أجيال متعرفش غيره حتى في الإمتحانات كانت أغلب الأسئلة عليه، هوا و عيلته هوا بابا و مراته ماما وولاده أنكل و عمو.
جه مجموعة من جيل غريب مش عجبه ام القرف ده، جيل الإنترنت و الإنفتاح على العالم، حبوا يغيروا الوضع شوية حبوا يعيشوا شوية حرية لكن الحاكم معجبهوش الكلام الفاضي ده و قامت عليه جيل من الأجيال الساكتة ديه إلي نفسها في شوية حرية، و طبعاً بالنسبة للحاكم الجيل ده زوبعة في بتنجان، بالعصايا زاي إلي سبقوهم، و لكن المفاجأة إنضم للجيل ده كل الاجيال الساكتة!!!، قالوا كلمتهم و قالوا رأيهم بصوت عالي. شالوا من قلبهم الخوف من الوحش المخيف إلي إسمه الأمن، ضربوا إلي قتلوهم و إغتصبوهم و سرقوهم و أهانوهم، بس الحاكم عشان ظالم مبيحسش بإنه ظالم، طلع و قال انا سيد الموقف انا المسيطر أنا إله البلد نسى حتى إن فيه الله. و طبعاً التخلف العقلي للنظام المرعب طلع و بان و سقط قناع القوة المغلفة بالرحمة و المحبة و الخوف على المصالح وقع، و الوش الحقيقي للنظام بان و عرفه العالم شاف بعينه الظلم و القهر إلي شعب كان عايش فيه و مازال لغاية لما يمشي الحاكم الظالم بتاع التضحية من أجل الوطن. بصراحة الراجل ضيع عمره على الحكم يا عيني، رفع راس المصريين، و الشعب بيبوس إيديه و رجليه عشان يقعد، بس من قلة أدب الشعب طالبوه يمشي بصراحة شعب يعني مينفعش معاه أي حاجة.
المهم ناس كتيرة بره مصر مكانتش تعرف أي حاجة عن مصر غير من تقارير السفارات المصرية إلي بالطبع مالهوش أي واقع نهائي. لدرجة إن التقارير ديه تخليك تخبط راسك في الحيط ألف مرة و تقول لما مصر حلوة قوي كده سبتها ليه ؟؟؟؟ مش عارف!!!!.
السفارات ديه بقى قصة لوحدها شغلتها الوحيدة الدفاع عن نظام و تلميعه، و طبعا تعتبر السفارات المصرية في كل العالم مكان لترفيه الحاشية ، خدماتها مخصصة بس لكبار القوم من المصريين العظماء، أما الباقي من الشعب العميل فليه ربنا، ده حتى البريد الدبلوماسي خلوه خاص بالهدايا ، يعني واحد من الحاشية عاوز لإبنه هدية ماعليه غير إنه يتصل بالسفارة و يدي الإوردر بتاعه و الدبلوماسيين الفظاع بتوعنا يجروا على طول، و طبعا الهدية توصل بالبريد الدبلوماسي.
الواد عاوز يتفسح إبعته على السفارة و هي تقوم بالواجب. و البني أدم العادي إلي المفروض السفارة ديه موجودة عشانه تبقى هيا نفسها مصدر عذابه.
هي إيد النظام بره من بطش و كل شيء جميل يتمتع بيه النظام إلي خايف على الوطن و الكلام الفاضي.
الناس إتخنقت من كل ده بره و جوه متبهدلين، و طبعا الحاكم قاعد فاتح ضبه و متوقع هوا و عيال عياله قاعدين على قلب الشعب إلى ملا نهاية و الناس ماشية وراه بتقول إخترناكم !!!!!!!!!!.
و برضه الحاكم منشف دماغه و إبتدى يبيع رجالته و يضحي بيهم اوك ماشي ، إنت كده دقيت المسمار الأول و هنشوف.
قبل كده الناس وجهتلك رسالة إخرج بكرامة، لكن للأسف مش عاوز، طيب .
أنا زعلان بصراحة على إم -------- كان نفسها تلاقي حتة من جوزها تدفنها و تترحم عليه ، بس للأسف الشعب في الحالة ديه أصبح من أكلي لحوم البشر، و بعدين فرصة لقوا لحمة ببلاش و بعدين لحمه معلوفة سنين علف ممتاز ، يعني ملهومش نفس يكلوا لحمة نظيفة معنها زفرة بس هيعملوا إيه مفيش غيرها مش أحسن ماتترمى في مزبلة التاريخ.
و طبعاً إشتغلنا شغل العيال مش هكلمكوا غير لما تروحوا البيت أنا زعلان منكم، يا سلام شغل عيال بقى، طيب ما الشعب كمان زعلان منكوا كلكم و مش عاوز يكلمكوا و كمان مش عاوزكم خالص و ده للأسف بجد مش لعب.
القصة لسه منتهتش لسه النهاية لغاية دلوقتي مفتوحة و قريب أكيد هيبقالها نهاية!!!!!.