الواد أحمد جارنا الفيلسوف (5)

لمحت باب بيت الواد أحمد جارنا الفيلسوف موارب قمت جريت وندهت علية , شوية وطلع برة عالمصطبة, الناس اتلمت علية عشان كنا قلقانين, قام قعد وقعدنا حوالية. فية اية ؟ خير انت زعلان عشان الاستفتاء؟ قال : أبدا, هوة صحيح أنا اتصدمت فى مولانا لما قال أن الشرع بيقول كذا وكذا رغم ان الشرع مالوش دعوة بالكلام دة ,وكدة يبقى مولانا ضحك علينا واستخدم نظرية فى الكتب اسمها الغاية تبرر الوسيلة بتاعة واحد خواجة اسمة ميكيافللى بس ماعلينا انا اللى عجبنى فى الاستفتاء اننا كلنا خرجنا أول مرة نستفتى لما حسينا اننا ولاد البلد دى, أما موضوع مولانا فربنا يهدينا جميعا.
سألناة : أمال انت ماخرجتش اديلك يومين لية؟, قام ولع السيجار تانى ماهو السيجار دة شكلة مابيخلصش, واتنهد وقال : انتوا عارفين كلكوا اننا من يوم ماتولدنا ولقينا العشر فدادين اللى عالزراعية دول بتوع عيلة أبو سالم وعيلة أبو ماجد شركة عالمشاع مظبوط؟ قلنالة مظبوط. بس انتو عارفين تاريخ الحكاية دى؟ بصينا لبعض وقلنالة : لأ, اية قصتها؟.
قال صلوا بينا عالنبى- علية الصلاة والسلام- من زمان قوى من وقت عمر بن العاص كدة, العشر فدادين دول كان فيها عيلة أبو ماجد وناس تانية كتير معاهم بيزرعوها وعايشين فيها وبعدين جت عيلة أبو سالم من بلد جنبنا وكان عندهم افكار جديدة تنفع الناس كلها, المهم كل الناس عاشوا مع بعض وحبوا بعض وبقوا يزرعوا الارض مع بعض وياكلوا من نفس الاكل ويشربوا من نفس البير, شوية من عيلة أبو ماجد عجبتهم أفكار عيلة أبو سالم وقالولهم احنا عايزين نبقى من عيلتكم , ماشى . مرت الايام وبقت عيلة ابو سالم اكتر فى العدد من عيلة أبو ماجد مافيش مشكلة ماهم كلهم فى الاخر اخوات. انما بقى من كام يوم سمعت شوية متعصبين ومتطرفين من عيلة أبو سالم بيقولوا ان عيلة أبو ماجد مالهاش غير حتة صغيرة فى العشر فدادين والمفروض يدفعوا ايجار , أنا سمعت كدة واتخضيت واتعصبت وقلتلهم بس يابنى انت وهوة بلاش كلام فاضى العيلتين اخوات وحايفضلوا طول عمرهم اخوات غصب عنكم وبعدين جبت الكام واحد اللى قالوا كدة وحكيتلهم حكاية البلد اللى جنبنا. طبعا احنا كلنا قلنالة فى نفس واحد : هي اية حكاية البلد اللى جنبنا؟
قام واخد نفس وقال : طب زيدوا النبى صلاة- عليك افضل صلاة يانبى- البلد اللى جنبنا دى كان فيها ولاد عمنا عايشين وبعدين جالهم ناس من حتت كتير وقعدوا معاهم بالعافية بس الناس دى ماكانتش طيبة زى عيلة أبو سالم وقعدت تضرب وتقتل فى ولاد عمنا وعشان كدة احنا رحنا نتخانق معاهم كذا مرة, وكلنا عايزنهم يمشوا ويسيبوا البلد لولاد عمنا بس عشان همة مفتريين مش عشان همة جم يعيشوا معاهم.
طب اية دخل الحكاية دى فى حكاية العيلتين بتوعنا ؟؟ شوفوا ... ماينفعش شوية المتطرفين اللى من عيلة ابو سالم يقولوا لعيلة ابو ماجد يمشوا يا أما يدفعوا الايجار رغم ان اولاد ماجد أقدم منهم فى العشر فدادين والا يبقى نقول للناس اللى جم على ولاد عمنا ان همة يستنوا وولاد عمنا يمشوا أو يدفعوا الايجار. صح؟ , انا همهمت كدة وقلتلة صح, طب يبقى اية الحل ياواد ياحمد ياجارنا يافيلسوف؟
شوفوا , الحل ان الناس اللى جم على ولاد عمنا يبطلوا افترا ويعيشوا مع ولاد عمنا فى سلام وتبقى بلدهم بلد واحدة وكدة كدة ولاد عمنا عددهم اكتر بس فى النهاية كلة يعيش فى سلام.
أما احنا بقى فالعيلتين مافيش حد فيهم مفترى والارض بقت بتاعة العيلتين سوا ياكلوا ويشربوا منها سوا ويطلعوا محصول الارض منها سوا عشان يربوا عيالهم ويكتروا خيرها ويعيشوا فى سلام, فهمتى حاجة يابلد ؟....
أحمد عبد المقصود محرم