الواد أحمد جارنا الفيلسوف تانى

عملت زى ماقالى الواد احمد جارنا الفيلسوف ورحت قلت لكل اصحابى بلاش يسمعوا كلام اى حد يضحك عليهم ورجعت بالليل عالقهوة لقيتة قاعد وسط الناس وفطسان على روحة من الضحك و الواد مصيلحى بيسألة :هوة يعنى اية دستور ياسى الاستاذ؟ وكمان الواد متولى بيقولة : ألا هما حيدونا فلوس عشان نروح البندر ننتخب المرة دى كمان؟ اما بفى الواد عليوة فكان عايز يعرف مين الناس اللى كانت ماشية فى البلد بعربية ومكرفون تقول " نعم.. نعم", هما دول من بتوع الحزب القديم ولامؤاخذة؟ طب والعربية اللى كانت ماشية جارهم كانت بتقول "نعم نعم عشان خاطر ربنا", دول يبقوا مين بقى؟ ولية شوية منهم بدقن وشوية من غير دقن؟
المهم نزلت الطلبات وقام الواد احمد جارنا الفيلسوف وقف وقالهم وكأنة بيخطب كدة زى مولانا فى الجامع: ياخوانا احنا بقالنا تلاتين سنة ودى أول مرة نسمع عن حاجة اسمها دستور وكمان بقالنا تلاتين سنة عندنا فى البلد مجلس شعب بيعمل ولا مؤاخذة القوانين قال ويراقب على اللى طلعوا كلهم حرامية, انما المشكلة فين بقى؟ انة بقالة تلاتين سنة بيعمل قوانين تفصيل ومالهاش دعوة بينا خالص, احنا نتعب ونشقى والجماعة يسرقوا ويتغنوا ويجوعونا, ويضحكوا علينا ويدونا كل واحد ميت جنية عشان يديلوا صوتة ويكملوا سرقة واحنا زى الهبل ماشيين وراهم وادى كبيرهم مسكوة مخبى اتنين وتلاتين مليار دولار بس فى امريكا شوفوا بقة فى باقى الدول قد اية والتانيين سرقوا قد اية فلوس و قد اية اثارات بتاعة الفراعنة بتاعتنا , ياولاد دى فلوس واللة تملا التسع فدادين بتاعة ابو سالم واكوام اكوام كمان, حسبنا اللة ونعم الوكيل, المهم جم شوية الشباب اللى زى الفل وقالوا حقنا وحق شعبنا برقبتنا ورجعولنا كلنا حقنا ومات منهم كتير فى كل حتة فى البلد ,وبعدين جم الجماعة بتوع الجيش وقالولهم عفارم عليكو ياولاد, خلاص من هنا ورايح البلد بلدنا كلنا مش بلد الحرامية.
بس عشان احنا بلد كبير فلازم يبقى فية شوية نظام صح؟ طبعا اكبر صح. وعشان الدنيا كانت متسربعة قامو قالوا احنا نغير شوية حاجات فى الدستور بتمنع اى حد عايز يبقى ريس انة يترشح. ولو الشعب وافق يبقى اللى عايز يترشح يترشح والشعب يختارة او ميختاروش براحتة, وبالمناسبة يامصلحى الدستور دة ابو القوانين لازم نرجعلة كدة لو فى مشكلة فى القانون زى بالظبط لما تتخانق مع متولى على حاجة ونقعد قعدة عرب فلو ماوصلناش لحل نقوم نروح للعمدة ناخد رأية عشان هوة الكبير.
قووووم ايييية يارجالة, جم الجماعة بتوع الحزب القديم والجماعة الاخوان واللى كانوا مستخبيين فى الدرة عشان الحزب كان بيقبض عليهم زمان وبعتوا العربيات دى ياواد ياعليوة عشان يضحكوا علينا وبتاع الحزب يقول انا قريبكم ومعايا فلوس حاديكم ونرجع تانى للميت جنية , وبتوع الاخوان يقولولنا لازم توافقوا على التعديلات لييييييية بقى؟؟؟؟ عشان يدخلوا بسرعة على انتخابات مجلس الشعب ويكسبوا ويعملوا همة حكومة من غير ماياخدو راينا ويخلونا نتهبب زى بتوع ايران, ماهم بيقولوا اننا مسلمين وضرورى تنتخبونا, انما لو استنوا لما الناس تشوف بقية اللى عايزين يترشحوا ويخدموا الشعب من غير مصلحة مسلمين ولا مش مسلمين فممكن الشعب يعرف الحقيقة ويرشحوا اللى عايزين مصلحتهم بجد. شفتوا بقة ؟ يعنى عشان نجيب من الاخر الناس اللى بتحب البلد لازم تقول للاستفتاء دة ( لأ ) عشان واحدة واحدة كدة نعرف مين الكويس ومين اللى مش كويس عشان خاطر مصلحة عيالنا ومانتخادش مقلب حرامية. أنا جالى صداع , سلامو عليكم
أحمد عبد المقصود محرم