الواد أحمد جارنا الفيلسوف

أنا صحيت النهاردة متلخبط شوية مش عارف لية, قلت اروح للواد احمد جارنا الفيلسوف اشربلى واحد شاى, وأول مارحت لقيتة قاعد مع ناس وبيضحكوا, المهم قالى تعالى خدلك واحد شاى سكر كتير. على طول سألتة انت بتضحك لية عالصبح خير؟. قام ابن اللذين كأنة عارف انى متلخبط قالى اسمع ياسيدى:
كان فى مرة فى الغابة نمر بيمشى يودود كدة لكل واحد على جنب ويقولة احنا أخوان وأخوانكم بس ماتقولش لحد الكلام دة لحسن لو الاسد عرف حايكلنى وياكلك وبعدين يقوم يجرى النمر ويستخبى , المهم في يوم من الايام لما الكل طلع عينهم وزهقوا من الاسد و(مراتة) وعيالة وصحابهم واتجمعوا فى الجرن الكبير وقالولوا خلاص من النهاردة انت مش ملك الغابة احنا حنحكم نفسنا بنفسنا.
مين بقة كان معاهم فى الجرن ؟ اتارى النمر خرج من الكهف بتاعة ودخل معاهم فى زحمة الجرن, ولما الاسد عرف ان مافيش فايدة جرى استخبى هوة واللى معاة, وهاتك الكل زيطة وزمبليطة, واذ فجاة النمر وعيالة جريوا على المكرفون وادوة للنمر وبعلو صوتة قال: اللة ينور عليكو ياولاد خلاص خلص عصر الاستعباد وبما انى انا اللى عملت دة كلة ياللا بسرعة نوافق على تعديلات المراسيم وبعدين تنتخبونى بسرعة ملك الغابة الجديد.
الكل اتخض..., يانهار مش فايت هوة احنا عملنا دة كلة عشان يمشى الدو وييجى شاهين؟ طب دة الاسد كان مفترى وكان بيقول انة مفترى انما انت كدة غامض وياما افتريت فى الخباثة وبعدين شكلك اساسا مش مريحنى, واكيد طالما انت مستعجل كدة يبقى اكيد وراك مصيبة, ثم تعالى هنا , انت بتستعبط ؟ انت اللى عملت دة كلة بأمارة اية؟ مانت كنت فى الكهف انت وعيالك وخايف وطول عمرك بتعمل اتفاقات فى الخباثة مع الاسد والاسد اللى قبلة واللى قبلة, جاى النهاردة تقول انك ملاك؟
احنا قلنا حنحكم نفسنا بنفسنا يعنى حنحكم نفسنا بنفسنا وياسيدى عايز ترشح نفسك استنى كدة على جنب لما الكل يفهم اية اللى بيحصل ويجهز نفسة لعصر مابعد الاستعباد وبلاش استعباط وصيد فى المية العكرة وسربع سربع ونخش فى نفق ضلمة. وتوتة توتة لسة ماخلصتش الحدوتة.
الواد احمد بصلى لقانى فاتح بقى ومذبهل قام مات على روحة من الضحك وقالى ماتخافش انا زيك كنت فاكر النمر جامد قوى بس السربعة اللى هوة فيها دى دليل انة خايف يتكشف.
انا كنت خلصت الشاى ووقفت على حيلى وضحكت وقلتلة , يخرب عقلك ياواد ياحمد ياجارنا يافيلسوف, طب عليا الطلاق انا فهمت انت قصدك على مين. قام ضحك وقالى الحمد للة ياللا روح على شغلك واحكى الحكاية دى لصحابك عشان الكل يفهم ونعرف نكمل الحدوتة وتبقى حلوة مش ملتوتة.
أحمد عبد المقصود محرم