محمد دياب يكتب: الجيش والشعب واللعبة المستهبلة

لو بتقري المقاله دي، ارجوك تحاول تحرر نفسك من اي افكار مسبقه ... تعالي ننقاش اللي بيحصل بمنتهي الحياديه ... هنتكلم عن اكتر ملف حساس دلوقتي، الجيش.
كلنا تقريباً متفقين علي وطنيه الجيش و اهميه دوره في الوقوف الي جانب الثوره ... و من كتر ما احنا كشعب دايماً نفسياً محتاجين لكبير، فبسرعه عملنا الجيش كبيرنا و بصراحه الناس كانوا قد المسؤليه، وانا شخصياً و عقلاء كتير طلعنا بندعو بالتهدئه و اهميه الثقه في الجيش
دايماً كلامهم مطمأن، و تأكيد ان كل المطالب هتتحقق بس المشكله الوقت ... كان ناس بتطلع و تقول المشكله مش مشكله وقت ولا حاجه دي مماطله و هناك ما يعد و كل ده جزء من الثوره المضاده ...بصراحه مكانش عندي رأي قاطع و بل بالعكس فضلت اني ابدأ العلاقه بالثقه
بس الواحد بدأ يلاحظ بعض الاشياء
بماتفسر: ان يتم تغيير جميع الوزراء الا وزراء الوزارات السياديه(الوزارات التتي تتحكم حقيقه في مقاليد الامور.
وزاره العدل "السلطه التشريعيه" علي رأسها ممدوح مرعي -المعروف بأنه اكثر من نكل بالقضاه المعارضين
وزاره الداخليه "السلطه التنفيذيه" علي رأسها محمود وجدي – وزير الداخليه يوم موقعه الجمل والذي فاجأ الجميع منذ ايام بتصريحات من العصر القديم عن القله المندسه و القناصه الاجانب و لم يعترف بأي تقصير من جانب الشرطه مما ادي لإعاده الاحتقان بين الشرطه والشعب ... و ظهر مدير امن دمنهور بعدها بنفس الطريقه القديمه يهدد و يتوعد بل و يقر انه يحاول الايقاع بين الشعب والمتظاهريين
وزير الخارجيه "الاتصال بالعالم" علي رأسها احمد ابو الغيط، الذي بشهاده الخبراء هو اسوأ من تولي وزاره الخارجيه، و هدد المتظاهريين اثناء الثوره ان الجيش لن يسمح بالفوضي – أي التظاهرات
عدم تغيير رؤساء الصحف القوميه (المطبلين) حتي الآن – عندما صرح احد قاده المجلس العسكري في العاشره مساءً طالباً منهم ان يستقيلوا اتصل به رئيس الشئون المعنويه اللواء اسماعيل عتمان(علي الهواء) يعاتبه علي تصريحه، و يطلب من رؤساء الصحف القوميه الا يستقيلوا
اللي هيقرا اهرام السبت هيعرف هما مغيروهمش ليه؟؟ الاهرام بتستعبط و تقول ان الناس نزلت امبارح عشان تحاكم مبارك و الفساد!!!!!!! مجابوش السبب الرئيسي و الوحيد للمظاهره و هو اسقاط حكومه شفيق
الا يثير كل هذا الشك في النفوس ... لماذا يختار شفيق ان يظل في مواقع السيطره الحقيقيه اشخاص تابعيين لأقصي درجه للنظام القديم؟!!! مش طبيعي ان الفار يبدأ يلعب في عب ناس كتير؟؟؟
وهبقي اكثر وضوحاً و اسأل بصراحه: لماذا يريد (الجيش) مش (شفيق) ان يظل رجال النظام القديم في السلطه؟
الحقيقه ان الشعب و الجيش بيلعبوا مع بعض لعبه (المستهبله .). الجيش هو اللي بيعمل كل حاجه بس يروح مستهبل و ملبسها لشفيق ... يقوم الشعب عشان عاوز و محتاج يصدق ان الجيش هو بابا و ماما وانور وجدي، يروح مستعبط و مهاجم شفيق و ينزل في مظاهرات ضده ... و يعمل انه مش واخد باله ان المسؤل الحقيقي هو الجيش
الثوره المضاده اللي الناس بتتكلم عليها، بتحصل تحت سمع وبصر الجيش و الشعب يروح مستهبل تاني وفرحان قوي بالبيان اللي بيؤكدوا فيهم تصديهم للثوره المضاده ... طب فيييييين!!!!! عاوزين تقضوا علي الثوره المضاده شيلوا اي واحد ليه علاقه بالنظام القديم
لما يطلع فيديو لمدير امن دمنهور بيقول فيه صراحه انه بيحاول يقوم الناس علي المتظاهريين ... ده مش محاولات ثوره مضاده!!!! دي لوحدها يتشال فيها وزير الداخليه
بعد ده كله ما تفتكروش ان من حق الناس انها تطالب بإقاله حكومه شفيق!!! مش من حق الناس انها تخاف علي ثورتها!!! مش من حق الناس انها تبقي متأكده ان فيه مؤامره ولااااااازم يتصدولها .... مش من حقها انها اضعف الايمان انها تظن ان لو النظام القديم في ايده كل ده، ممكن يدعم مرشح في انتخابات الرئاسه و يبقي كأنك يا ابو زيد ما غزيت! ... مش من حق
الناس انها تتظاهر و تطالب بالتصدي لمحاولات إجهاض الثوره دي و تبات كمان في الميدان زي ما هي عايزه؟
طبعاً كل ده كوم و اللي حصل الجمعه 25 فبراير كوم تاني ... الجيش ضرب المتظاهريين و طردهم بالقوه!!!! انا مش مصدق عدم الحكمه بتاعه اللي خد القرار ده!!!! تضربونا عشان شفيق!!!! هو شفيق اهم من مبارك؟؟؟ هو شفيق اهم من مصر؟؟؟؟ ولا فيه حاجه بتدبر؟؟؟؟؟؟؟؟؟؟؟؟ للأسف مفيش تفسير تاني
هتقولي الكلام الخايب بتاع اصلهم كانوا بيتظاهروا بعد الحظر ... هقولك ان لولا الناس اللي فضلت تتظاهر 18 يوم بعد الحظر مبارك عمره ما كان هيمشي
هتقولي حرام عليك اديهم وقت ... هقولك فووووووووووووووق ... هما كان عندهم وقت يغيروا كل الوزارات و معندهمش وقت يغيروا التلات وزارات المتحكمين في البلد بجد!!!؟
هما ليه اتحججوا قانونياً بأنهم ميقدروش يعزلوا حد من الصحف القوميه و في ثانيه لما حبوا عزلوا نقيب الموسيقين منير الوسيمي!!!؟
هتقولي حرام عليك الجيش هو اخر حاجه نتسند عليها ... هقولك نفس الكلام اللي كنت بقوله ايام اسقاط مبارك .. وجه اتهاماتك و احباطاطك في المكان السليم .. للي بيحاولوا يسرقوا الحلم .. مش المطالبين بالحق ..
للأسف ضرب الجيش للمتظاهريين تسبب في بدايه النهايه للعبه المستهبله ... و الناس هتبدأ تكسر خوفها من ان ميكونلهاش ضهر و هيبدئوا يواجهوا تخوفاتهم الحقيقيه
واوعي تقولي الجيش اعتذر، الاعتذار يكون بتحقيق المطالب اللي الناس عاوزاها ... مشوا حكومه شفيق انهارده قبل بكره ... قبل ما الناس تفقد الثقه تماماً فيكوا و ساعتها هيبقي مطلب اساسي تكوين مجلس رئاسي و هو بصراحه عين العقل
في اعتقادي ان فيه انقسام حاد بين قيادات الجيش، بل انا متأكد ان ده حاصل و بدعي ربنا ان الجانب اللي مع الحق ينتصر بسرعه، لأن الحق و الشعب هينتصر هينتصر بإذن الله
علي فكره معظم اللي بيقولوا نسيب حكومه شفيق، و هو ده عين التعقل هما اللي مش بيفكروا بعقلهم بل بيحركهم العاطفه .. عاطفه الخوف ... اقولك علي دليل؟ فاكر لما كنت بتتفرج علي الثوره في تونس و مشي بن علي و جه الغنوشي .. بذمتك كنت مع التونسيين في انهم يسقطوا الغنوشي ولا لأ؟ مصر كلها كانت مع اسقاط الغنوشي ... طب اقولك علي معلومه ... وزاره الغنوشي احسن من وزاره شفيق ... الغنوشي معندوش ولا وزير من الحكومه القديمه و الوزراء اللي برضه من النظام القديم و ماسكين برضه الوزارات السياديه استقالوا من الحزب الحاكم ...
صارحني بقي بذمتك، لما بتشوف مظاهرات التونسيين ضد الغنوشي ما بتحسش ان عنهم حق؟ الاجابه غالباً بتبقي آه ... يبقي اللي مصبرك علي شفيق هو الخوف ولا لإ؟
والله العظيم انا بقول الكلام ده عشان بتمني ان صوره الجيش متدمرش تماماً في عنين الناس ... و ده مش هيحصل الا بالتخلص من النظام القديم بجد مش كده و كده
ونصيحه اخيره ابوس ايدك ما تكونش رأيك من علي الفيس بوك ... كون رأيك من الجرائد المستقله، من مثقفين حقيقيين ... كون رأيك من المحللين الموثوق في استقلالهم ونزاهتهم ... عمرو حمزاوي، مأمون فندي، عمرو الشبكي، حسنين هيكل ، فهمي هويدي، وائل قنديل ... انا ذكرت بعض المستقليين مش معارضيين عشان متقولش دول كانوا معارضين مالأول .
ننصيحه اخري للساده الزملاء الثوار "العصبيين" بالراحه علي الناس شويه ... لو اختلفوا معاكوا و مش فاهمين وجهه نظركوا فهموهم .. محدش يتعامل انه معاه صك الحقيقه المطلق، هتخسر كده الناس ... و طبيعي ان الناس تبقي متلخبطه، و طبيعي ان خوف الناس كلها بما فيهم انا مخلينا بنتمني نلاقي ضهر نتسند عليه ... حتي لو معني كده اننا نغمي عنينا عن حقايق واضحه ... متخلوش الناس تكره الثوره ، انا عارف انكوا بيصعب عليكوا انكوا بتضحوا و بيطلع عينيكوا و فيه ناس بتنتقدكوا بس القفشهيخسرنا الناس اللي من غيرهم مفيش ثوره
علي المستوي الشخصي، لو اللي بيقري متابع مواقفي، فأنا بحاول ابقي متزن و ناديت مع مجموعه من الناس الي التهدئه و فتح صفحه جديده مع الشرطه بعد الاعتذار و الحساب والتسامح مع فكره القوائم السوداء "يعني مش عناد" بس انهارده بقولها بمنتهي الوضوح ... الثوره في خطر ومحتاجه كل واحد فينا ... و بلاش الناس تكرر اخطائها تاني و تفتكر ان الوطنيه هي التهدئه ... الوطنيه هي التعقل قبل اصدار احكام، و مسانده القرار اللي يحافظ علي مكاسب الثوره .. بدل كل التضحيات دي ما تبقي راحت هدر ... و انا عن نفسي في الشارع.