خواطر بعد اسبوع فى الاقصر ..Pretty little things

هكتب كام نقطة كدا سجلتها فى النوت بتاعتى خلال أسبوع فى مدينة الأقصر المصرية
pretty little things
" .. دا عنوان قصة لقتها فى ريسيبشن الفندق اللى نزلنا فيه .. فندق شادى
فعلاً مصر مش ميدان التحرير بس .. مصر أكبر بكتير .. اللى فى الميدان فاهم هو فى الميدان ليه بس لازم بقية الناس تفهم .. فى السوق قابلنا واحد قالنا "" أحنا بنحب أهل مصر وهما عملوا ثورة حلوة .. بس أذونا فى أكل عيشنا " .. دا حتى المرشد السياحى اللى المفروض مثقف وواجهة للبلد تحس كلامه هجوم على الثورة !! .. الناس دى غلابة بجد ودا أكل عيشهم لازم حد ينزل يتكلم معاهم
إدخال الدين فى السياسة بيبوظ الدين وبيبوظ السياسة .. المرشد السياحى كان بيحكى عن تاريخ الأسر الفرعونية وقال أنه لحد الأسرة 26 كان ملوك بيحكموا مصر .. بعد كدا بدأ الكهنة يملكو .. والعصر دا أسمه عصر الأضمحلال !!!
الكوسة أختراع مصرى أصيل .. دا اللى أكده حكاية المرشد السياحى عن الأحتفالات الملكية الفرعونية كل 30 سنة .. المفروض يتم أختبار قوة الملك كل 30 سنة عن طريق مصارعة مع ثور .. لو الفرعون قتل الثور يبقى فرعون قوى ويكمل فى الحكم لو الثور قلب عربية الفرعون يبقى فرعون خيخة ويتم أستبداله .. والمرشد بيقول أن البرديات بتحكى أن الثور أساساً بتيجى مخدرة عشان الملك يقتلها علطول .. تفتكرو فى سر معين ورا رقم 30 دا ؟
لما تقرب من حد أوى بتشوف عيوبه أوى .. عشان كدا أحلى حاجة نظرية القنافد .. الأقتراب عن بعد .. أصل النظرية دى أن القنافد فى الشتا بتكون عاوزة تتدفى بس لو قربت من بعضها اوى هتشوك بعض ولو بعدت عن بعضها أوى مش هتتدفى .. فبتقرب من بعضها بمسافات محسوبة عشان تتدفى وفى نفس الوقت متشوكشش بعضها .. أحنا كبشر محتاجين أوى نظري القنافد دى عشان نعرف نعيش .
(سمير فرج – الأقصر) ... حاول تحطهم فى جملة مفيدة مش هتلاقى .. أى جملة هتكون ضرر للأقصر .. دا بناء على كلام الأهالى هناك محدش بيحبه وواضح من كلام الناس أن وراه بلاوى ياما .. لدرجة أن فى يافطة متعلقة فى شارع رئيسى بتهاجمه !!!
أيه موضوع الناس بتوع طريق الكباش دا !!! .. اللى فهمته أن حكومة نظيف هجرتهم من بيوتهم غصب وأقتدار ومن غير أى تعويضات عشان تكمل طريق الكباش !!! ... يعنى دا كلام ؟ .. محدش أتكلم عن الناس دى ليه ؟ .. هو دا تشجيع السياحة .. هو دا حق المصرى والمواطنة ... ياريت الموضوع دا يوصل للجيش عشان يتصرف .. أو أسهل الجيش يعين محافظ مصرى للأقصر وهو يهتم بالموضوع دا
حركات المراهقة مش بتبقى فى سن المراهقة .. ممكن جداً الواحد يوصل فوق التلاتين ويبقى لسة مراهق .. وساعتها مينفعش حد أصغر منه يقوله أنت مراهق .. طيب الأصغر دا المفروض يعمل أيه يعنى !!! اهو دا اللى مش عارفاه L
أحلى حاجة تيجى من رحلة أسبوع فى الأقصر على امتحانات .. بتحس نفسك كنت طاير فوق فى السما وفجاة جه قفا من الدنيا ظبطك وقفك على الأرض
تذكرة قطار القاهرة أسوان درجة تانية مكيف بقالها 3 سنين – ويمكن من قبل كدا – تمنها ثابت .. فى حاجة تانية ثابتة غير تمن التذكرة ؟
أحياناً بندمن غلطة معينة .. وبنعملها وأحنا عارفين أنها غلطة جامدة أوى فى حق نفسنا .. مش هى دى المشكلة .. المشكلة أن فى ناس قريبة مننا بتزعل بسبب الغلطة دى .. الغلطة مش هتأذيهم هما فى حاجة بتأذينا أحنا ... انما هو بيزعلو عشانا مش مننا .. وأحنا برضه لسه بنغلط نفس الغلطة .
فى شخصيات زى القمر .. بمعنى أنها من بعيد منورة وبتجذب كل البشر وبتنور أوى واللى حواليها كمان ممكن يسهرو مخصوص عشان يشوفوها وممكن يخلوها رمز للحب ورمز للوفاء .. لكن لما تقرب منهم بالظبط زى ما تقرب من القمر .. ماتلاقيش غير شوية حفر وظلمة .. وتكتشف أن النور دا كان مجرد أنعكاس جسم تانى خالص عليهم